Maharastra : ಮಹಾರಾಷ್ಟ್ರದಲ್ಲಿ ಒಂದು ವಿಚಿತ್ರವಾದ ನಿಗೂಢ ವಶೀಕರಣ ಪ್ರಕರಣ ಬೆಳಕಿಗೆ ಬಂದಿದ್ದು ಕಣ್ಣೆದುರು ಇದ್ದ ಯುವತಿ ಸಡನ್ ಆಗಿ ನಾಪತ್ತೆಯಾಗಿರುವ ಘಟನೆ ನಡೆದಿದೆ. ಈ ಕುರಿತಾದ ವಿಡಿಯೋ ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಯಸ್, ಕಣ್ಣೆದುರೇ ಇದ್ದ ಯುವತಿಯೊಬ್ಬಳು ಹಠಾತ್ತನೆ ನಾಪತ್ತೆಯಾಗಿದ್ದು, ಆಕೆ ಹೋಗುವ ಮುನ್ನ ಸೆರೆಯಾಗಿರುವ ಸಿಸಿಟಿವಿ (CCTV) ದೃಶ್ಯಗಳು ಈಗ ಪ್ಯಾರಾನಾರ್ಮಲ್ (ಅತಿಮಾನುಷ ಶಕ್ತಿ) ಅಥವಾ ವಶೀಕರಣ (Hypnosis) ಎಂಬ ಚರ್ಚೆಗೆ ಗ್ರಾಸವಾಗಿವೆ.
ಸಂಜೀವನಿ ರಾಹುಲ್ ವರಡೆ (18) ಎಂಬಾಕೆ ಏಪ್ರಿಲ್ 17ರಂದು ಮಧ್ಯಾಹ್ನ 12 ಗಂಟೆಗೆ ಮನೆಯಿಂದ ಹೊರಬಂದವಳು ಮರಳಿ ಬಂದಿಲ್ಲ. ಮೇಲ್ನೋಟಕ್ಕೆ ಇದು ಸಾಧಾರಣ ನಾಪತ್ತೆ ಪ್ರಕರಣದಂತೆ ಭಾವಿಸಲಾಗಿತ್ತು. ಆದರೆ ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಅಸಲಿ ವಿಚಾರ ಬೆಳಕಿಗೆ ಬಂದಿದೆ.
ವೈರಲ್ ಆದ ವಿಡಿಯೋದಲ್ಲಿ ಮನೆಯಿಂದ ಹೊರಬರುವಾಗ ಆಕೆ ಯಾರನ್ನೋ ಕಂಡು ಹೆದರಿದಂತೆ ಪದೇ ಪದೇ ಹಿಂದೆ-ಮುಂದೆ ನೋಡುತ್ತಿದ್ದಾಳೆ. ರಸ್ತೆಯಲ್ಲಿ ಹೋಗುತ್ತಿದ್ದಾಗ ಇದ್ದಕ್ಕಿದ್ದಂತೆ ಆಕೆ ತನ್ನ ತಲೆಯನ್ನು ಕೆಳಕ್ಕೆ ಬಗ್ಗಿಸಿ, ಒಂದು ಕೈಯನ್ನು ಗಾಳಿಯಲ್ಲಿ ಮೇಲೆತ್ತುತ್ತಾಳೆ. ವಿಡಿಯೋ ನೋಡಿದರೆ ಯಾರೋ ಅದೃಶ್ಯ ವ್ಯಕ್ತಿ ಆಕೆಯ ಕೈ ಹಿಡಿದು ಎಳೆದುಕೊಂಡು ಹೋಗುತ್ತಿರುವಂತೆ ಭಾಸವಾಗುತ್ತಿದೆ. ಸ್ವಲ್ಪ ದೂರದವರೆಗೆ ಹೀಗೆಯೇ ನಡೆದು ಹೋದ ಆಕೆ ನಂತರ ಸಂಪೂರ್ಣವಾಗಿ ನಾಪತ್ತೆಯಾಗಿದ್ದಾಳೆ. ಇದು ಸ್ಥಳೀಯ ಜನರನ್ನು ಬೆಚ್ಚಿ ಬೀಳಿಸಿದೆ.
ಇದು ಹಿಪ್ನಾಸಿಸ್ (Hypnosis) ಅಥವಾ ಮಂತ್ರವಿದ್ಯೆಯ ಮೂಲಕ ನಡೆದ ಅಪಹರಣ ಇರಬಹುದು ಎಂದು ಶಂಕಿಸಲಾಗಿದೆ. ಅಪಹರಣಕಾರರು ದೂರದಿಂದಲೇ ಯುವತಿಯನ್ನು ಮರುಳು ಮಾಡಿ, ತಮ್ಮತ್ತ ಸೆಳೆದುಕೊಂಡಿರಬಹುದು ಎಂಬ ಚರ್ಚೆಗಳು ಜೋರಾಗಿವೆ.