ಶ್ರೀಮತಿ ಅಶ್ವಿಜ ಶ್ರೀಧರ್ ಬೆಳ್ತಂಗಡಿ ಅವರ ‘ಶ್ರವಣದೀಪ್ತಿ’ ಕವನ ಸಂಕಲನ ಬಿಡುಗಡೆ

ಶ್ರೀಮತಿ ಅಶ್ವಿಜ ಶ್ರೀಧರ್ ಬೆಳ್ತಂಗಡಿ ಅವರ ‘ಶ್ರವಣದೀಪ್ತಿ’ ಕವನ ಸಂಕಲನ ಬಿಡುಗಡೆಯಾಗಿದೆ ​ಒಂದು ಉಪನ್ಯಾಸ ಮಾಲಿಕೆಯನ್ನು ಕೇಳುವುದು ಸುಲಭ, ಆದರೆ ಆಲಿಸಿದ ಜ್ಞಾನವನ್ನು ಕಾವ್ಯವಾಗಿಸಿ, ಅದಕ್ಕೊಂದು ಕೃತಿಯ ರೂಪ ಕೊಡುವುದು ಸಾಮಾನ್ಯ ತಪಸ್ಸಲ್ಲ. ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ ಬೆಳ್ತಂಗಡಿ ತಾಲೂಕಿನ ಪ್ರೊ. ಗಣಪತಿ ಭಟ್ ಕುಳಮರ್ವ ಅವರ ವಿದ್ವತ್ಪೂರ್ಣ ಮುನ್ನುಡಿ ಹಾಗೂ ಸುಭಾಷಿನಿ ಬೆಳ್ತಂಗಡಿ ಅವರ ಆಶಯ ಗೀತೆ ಮತ್ತು ಬೆನ್ನುಡಿಯ ಹಾರೈಕೆಗಳು ಈ ಕೃತಿಯ ತೂಕವನ್ನು ಮತ್ತಷ್ಟು ಹೆಚ್ಚಿಸಿವೆ.

Sponsored

​ಕಾವ್ಯದ ಒಳಪುಟಗಳಲ್ಲಿ ಗೀತಾಸಾರದ ದರ್ಶನ

​ಪುಸ್ತಕದ ಒಳಪುಟಗಳನ್ನು ತಿರುವಿದಾಗ ಭಗವದ್ಗೀತೆಯ ೧೮ ಅಧ್ಯಾಯಗಳ ದರ್ಶನ ನಮಗಾಗುತ್ತದೆ. ವಿಷಾದವದು ಆವೇಶಿಸಿದಾಗ ದಿಂದ ಆರಂಭವಾಗಿ ‘ಮೋಕ್ಷ ಸಂನ್ಯಾಸದಿ ತ್ಯಾಗದ ಬಲ’ಮತ್ತು ಶಾಂತಿ ಮಂತ್ರ ದವರೆಗೆ ಒಟ್ಟು ೨೦ ಕವನಗಳು ಇಲ್ಲಿವೆ.
​ಮಹತ್ವವಾದ ವಿಚಾರಗಳ ಚಿಂತನೆಗಳಲ್ಲಿ ಪ್ರಸ್ತುತಿ,
​ಭಗವಂತನೇ ಇಲ್ಲಿ ವರ್ಣಿಸಿ ಅರ್ಥೈಸಬಲ್ಲ ಸಾರಥಿ.
​ಕವಯತ್ರಿಯ ಈ ಸಾಲುಗಳು ಕೃತಿಯ ಮೂಲ ಉದ್ದೇಶವನ್ನು ಸ್ಪಷ್ಟಪಡಿಸುತ್ತವೆ. ಬದುಕಿನ ಗಹನವಾದ ತತ್ವಗಳನ್ನು ತೀರ ಸರಳವಾಗಿ ಪ್ರಸ್ತುತಪಡಿಸಲಾಗಿದೆ. ಅರ್ಜುನನಿಗೆ ಕೃಷ್ಣ ಸಾರಥಿಯಾದಂತೆ, ಇಲ್ಲಿ ವಾಚಕನಿಗೆ ಕವಯತ್ರಿಯ ಲೇಖನಿಯೇ ಸಾರಥಿಯಾಗಿ ಆಧ್ಯಾತ್ಮದ ಹಾದಿ ತೋರಿಸುತ್ತದೆ. ಕ್ಷೇತ್ರ-ಕ್ಷೇತ್ರಜ್ಞ, ಗುಣತ್ರಯ ವಿಭಾಗ, ಪುರುಷೋತ್ತಮ ಯೋಗದಂತಹ ಕಠಿಣ ವಿಷಯಗಳು ಇಲ್ಲಿ ಕಾವ್ಯದ ಸಿಹಿಯಾಗಿ ಮಾರ್ಪಟ್ಟಿವೆ. ​ಕಮಲದ ಹೂವಿನಂತಹ ಬದುಕಿನ ಸಂದೇಶ. ​ಕವನ ಸಂಕಲನದ ಅತ್ಯಂತ ಸುಂದರ ಮತ್ತು ದಾರ್ಶನಿಕ ಸಾಲುಗಳೆಂದರೆ:
​’ಕೆಸರಲ್ಲಿದ್ದರೂ ಕಮಲದ ಹೂವದರ ಅರ್ಚನೆಯು
ಸಲ್ಲಿಸಬೇಕಾದ ಗೌರವವಲ್ಲಿ ಗೌರವಪೂರ್ವಕವಾಗಿ ಸಲ್ಲಿಕೆಯು’
​ಲೌಕಿಕ ಪ್ರಪಂಚದ ಜಂಜಾಟ, ಕಷ್ಟ-ಕಾರ್ಪಣ್ಯಗಳು ಎಂಬ ‘ಕೆಸರಿನಲ್ಲಿ’ ನಾವಿದ್ದರೂ, ನಮ್ಮ ಮನಸ್ಸು ಮಾತ್ರ ‘ಕಮಲದಂತೆ’ ಪವಿತ್ರವಾಗಿರಬೇಕು. ಕೆಸರಿನಲ್ಲಿದ್ದರೂ ಕಮಲವು ದೇವರೆಡೆಗೆ ಮುಖ ಮಾಡಿ ನಿಲ್ಲುವಂತೆ, ಮನುಷ್ಯನು ಸಂಸಾರದಲ್ಲಿದ್ದೂ ಭಗವಂತನ ಆರಾಧನೆಗೆ ಅರ್ಹನಾಗಬೇಕು ಎಂಬ ಉದಾತ್ತ ಚಿಂತನೆ ಇಲ್ಲಿದೆ. ಭಗವಂತನಿಗೆ ಸಲ್ಲಿಸುವ ಗೌರವವು ಅಷ್ಟೇ ಗೌರವಪೂರ್ವಕವಾಗಿ, ಶ್ರದ್ಧೆಯಿಂದ ಸಲ್ಲಿಕೆಯಾಗಬೇಕು ಎಂಬುದನ್ನು ಕವಯತ್ರಿ ಮನೋಜ್ಞವಾಗಿ ಬಣ್ಣಿಸಿದ್ದಾರೆ.
​
​’ಶ್ರವಣದೀಪ್ತಿ’ ಕೇವಲ ಕವನಗಳ ಸಂಕಲನವಲ್ಲ. ಇದು ಭಗವದ್ಗೀತೆಯ ತತ್ವಗಳನ್ನು ಆಧುನಿಕ ಬದುಕಿಗೆ ಅನ್ವಯಿಸಿಕೊಳ್ಳಲು ನೆರವಾಗುವ ಒಂದು ದಿವ್ಯ ದೀಪ. ಶ್ರೀಮತಿ ಅಶ್ವಿಜ ಶ್ರೀಧರ್ ಅವರ ಶ್ರವಣ ಶಕ್ತಿ ಮತ್ತು ಅಭಿವ್ಯಕ್ತಿ ಶಕ್ತಿಗೆ ಹಿಡಿದ ಕನ್ನಡಿಯಿದು. ಭಕ್ತಿ ಮತ್ತು ಸಾಹಿತ್ಯಾಸಕ್ತರ ಮನ ಗೆಲ್ಲುವಲ್ಲಿ ಈ ಕೃತಿ ಸಂಪೂರ್ಣ ಯಶಸ್ವಿಯಾಗಿದೆ.

ಲೇಖಕ: ನಾರಾಯಣ ಕುಂಬ್ರ, ನೆಹರುನಗರ, ಪುತ್ತೂರು.