ಬೆಂಗಳೂರು: ರಾಜ್ಯದಲ್ಲಿ ರೇಬೀಸ್ ಪ್ರಕರಣಗಳು ಕಡಿಮೆಯಾಗಿದ್ದರೂ ರೇಬೀಸ್ನಿಂದ ಸಾವನ್ನಪ್ಪಿರುವವರ ಪ್ರಮಾಣವು ಏರಿಕೆಯಾಗಿದೆ. 2022ರಲ್ಲಿ ರೇಬಿಸ್’ಗೆ 1 ಬಲಿಯಾಗಿದ್ದರೆ, 2024ರಲ್ಲಿ ಇದರ ಪ್ರಮಾಣ 42ಕ್ಕೆ ತಲುಪಿದೆ.
ಕರ್ನಾಟಕದಲ್ಲಿ ಕಳೆದ 3 ವರ್ಷಗಳಲ್ಲಿ ರೇಬೀಸ್ ಪ್ರಕರಣಗಳ ಸಂಖ್ಯೆಯಲ್ಲಿ ಗಣನೀಯ ಇಳಿಕೆ ಕಂಡು ಬಂದಿದ್ದರೂ, ಇದೇ ಅವಧಿಯಲ್ಲಿ ಸಾವಿನ ಸಂಖ್ಯೆಯಲ್ಲಿ ಭಾರೀ ಅಂಕಿ ಅಂಶದ ಏರಿಕೆ ಕಂಡು ಬಂದಿದೆ. ಇದರಿಂದಾಗಿ ಸಾವಿನ ಪ್ರಮಾಣದಲ್ಲಿ ಕರ್ನಾಟಕ ದೇಶದಲ್ಲೇ ನಂ. 2 ರಾಜ್ಯವಾಗಿದೆ.
2025ರ ಅ. 5ರಂದು ಲೋಕಸಭೆಯಲ್ಲಿ ಮಂಡಿಸಲಾದ ಮಾಹಿತಿಯ ಪ್ರಕಾರ, ಕರ್ನಾಟಕದಲ್ಲಿ 2022ರಲ್ಲಿ 321, 2023ರಲ್ಲಿ 267ಕ್ಕೆ, 2024ರಲ್ಲಿ 139ಕ್ಕೆ ಇಳಿಕೆಯಾಯಿತು. ಈ 3 ವರ್ಷಗಳ ಅವಧಿಯಲ್ಲಿ ವರದಿಯಾದ ಪ್ರಕರಣಗಳಲ್ಲಿ ಶೇ.56.7ರಷ್ಟು ಗಣನೀಯ ಇಳಿಕೆ ಆಗಿದೆ. ಆದರೆ, ಪ್ರಕರಣ ಇಳಿಕೆಯಾಗಿದ್ದರೂ ಸಾವಿನ ಸಂಖ್ಯೆಯಲ್ಲಿ ಭಾರೀ ಏರಿಕೆ ಕಂಡು ಬಂದಿದೆ. 2022ರಲ್ಲಿ ಕೇವಲ 1 ಸಾವು, 2023ರಲ್ಲಿ ಆ ಸಂಖ್ಯೆ 18, 2024ರಲ್ಲಿ 42ಕ್ಕೆ ತಲುಪಿದೆ.
2024ರಲ್ಲಿ ಕರ್ನಾಟಕವು ಎರಡನೇ ಅತಿ ಹೆಚ್ಚು ರೇಬೀಸ್ ಸಾವು ದಾಖಲಿಸಿದ ರಾಜ್ಯವಾಗಿದೆ. ತಮಿಳುನಾಡು 43 ಸಾವುಗಳೊಂದಿಗೆ ಮೊದಲ ಸ್ಥಾನದಲ್ಲಿದೆ. ರೇಬೀಸ್ನ ಹೆಚ್ಚಿನ ಪ್ರಭಾವವಿರುವ ಇತರ ರಾಜ್ಯಗಳಲ್ಲಿ ಮೇಘಾಲಯ 13 ಸಾವುಗಳು, ಕೇರಳ 8 ಮತ್ತು ಗುಜರಾತ್ 7 ಸೇರಿವೆ. ಅಚ್ಚರಿಯೆಂದರೆ, ಉತ್ತರ ಪ್ರದೇಶ ಮತ್ತು ಮಧ್ಯಪ್ರದೇಶ ಅತ್ಯಂತ ಹೆಚ್ಚಿನ ಪ್ರಕರಣಗಳ ಸಂಖ್ಯೆ ಹೊಂದಿದ್ದರೂ ಈ ರಾಜ್ಯಗಳು ಶೂನ್ಯ ರೇಬೀಸ್ ಸಾವು ವರದಿ ಮಾಡಿವೆ. ಇದು ಉತ್ತಮ ವೈದ್ಯಕೀಯ ಸ್ಪಂದನೆಯನ್ನು ಅಥವಾ ವರದಿಯ ವ್ಯತ್ಯಾಸ ಅಥವಾ ಗಣಕ ದೋಷ ಆಗಿರಬಹುದು ಎನ್ನಲಾಗಿದೆ.
