ದೇಶದಲ್ಲಿ ಪಂಚ ರಾಜ್ಯಗಳ ವಿಧಾನಸಭಾ ಚುನಾವಣೆಗೆ ಮತದಾನ ನಡೆಯುತ್ತಿದೆ. ಪಶ್ಚಿಮ ಬಂಗಾಳದಲ್ಲಿ ಒಂದು ಹಂತದ ಮತದಾನ ನಡೆದಿದೆ. ಈ ಮತದಾನದ ವೇಳೆ ಅಪರೂಪದ ಘಟನೆಯೊಂದು ಮುನ್ನಲೆಗೆ ಬಂದಿದ್ದು, ಎರಡು ವರ್ಷದ ಹಿಂದೆ ಓಡಿ ಹೋಗಿದ್ದ ಹೆಂಡತಿಯನ್ನು ಗಂಡನೊಬ್ಬ ವೋಟ್ ಹಾಕಲು ಬಂದಾಗ ಪತ್ತೆ ಮಾಡಿ ಮತಗಟ್ಟೆಯಲ್ಲೇ ಹಿಡಿದಿದ್ದಾನೆ.
ಸಿಲಿಗುರಿ ಉಪವಿಭಾಗದ ಮತಿಗರಾ-ನಕ್ಸಲ್ಬರಿಯಲ್ಲಿ, ಫನ್ಸಿದೇವದ ತಾರಾಬರಿಯಲ್ಲಿರುವ ತಾರಾಬರಿ ಪ್ರಾಥಮಿಕ ಶಾಲೆಯಲ್ಲಿ ಏಪ್ರಿಲ್ 23 ರಂದು ಈ ಘಟನೆ ನಡೆದಿದೆ. ತನ್ನ ಪತ್ನಿ ವೋಟ್ ಮಾಡೋಕೆ ಬಂದೇ ಬರ್ತಾಳೆ ಎಂದು ನಿರೀಕ್ಷಿಸಿದ್ದ. ಮತದಾನ ಕೇಂದ್ರದಲ್ಲಿದ್ದ ಜನರು ಈತ ಯಾಕೆ ಹೀಗೆ ನಿಂತಿದ್ದಾನೆ ಎಂದು ಆಶ್ಚರ್ಯದಿಂದ ನೋಡುತ್ತಲೇ ಇದ್ದರು. ಆದರೆ ಆತ ತಾಳ್ಮೆಯಿಂದ ಯಾರೊಂದಿಗೂ ಮಾತನಾಡದೆ ಗಂಟೆಗಟ್ಟಲೆ ಅದೇ ಸ್ಥಳದಲ್ಲಿ ನಿಂತು ಕಾಯುತ್ತಿದ್ದ. ಸಮಯ ಕಳೆಯುತ್ತಲೇ ಇತ್ತು. ಮಧ್ಯಾಹ್ನ ಸುಮಾರು 2 ಗಂಟೆಗೆ, ಆತನ ಓಡಿ ಹೋದ ಪತ್ನಿ ತನ್ನ ಐಡಿ ಹಿಡಿದು ಮತಗಟ್ಟೆಗೆ ತಲುಪಿದ್ದಾಳೆ.
ಹೆಂಡತಿಯ ಆಗಮನವಾಗುತ್ತಿದ್ದಂತೆ ಆ ವ್ಯಕ್ತಿ ತಕ್ಷಣ ಓಡಿ ಅವಳ ವೋಟರ್ ಐಡಿ ಕಿತ್ತುಕೊಳ್ಳೋಕೆ ಪ್ರಯತ್ನಿಸ್ತಾನೆ. ಅವಳ ಕೂದಲನ್ನು ಎಳೆದು ಹಿಂದಿನಿಂದ ಹಿಡಿದುಕೊಳ್ತಾನೆ. ಅಲ್ಲಿ ಪರಿಸ್ಥಿತಿ ಕೈಮೀರುತ್ತದೆ. ಆ ಮಹಿಳೆ ತನ್ನ ಮೊದಲ ಗಂಡನಿಂದ ತಪ್ಪಿಸಿಕೊಳ್ಳೋಕೆ ಪರದಾಡ್ತಾಳೆ. ನಂತರ ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಗಳ (CAPF) ಸಿಬ್ಬಂದಿ ಧಾವಿಸಿ ಇಬ್ಬರನ್ನು ದೂರ ಮಾಡುತ್ತಾರೆ.
ನಂತರ ಮಹಿಳೆಯನ್ನು ಗಂಡನಿಂದ ರಕ್ಷಿಸುತ್ತಾರೆ. ಆದರೆ ತನ್ನನ್ನು ಬಿಟ್ಟು ಪ್ರಿಯಕರನ ಜೊತೆ ಓಡಿ ಹೋದ ಹೆಂಡತಿಯನ್ನು ನೋಡಿದ ಗಂಡ ಜೋರಾಗಿ ಕೂಗಾಡ್ತಾ ಬೈಯುತ್ತಲೇ ಇರುತ್ತಾನೆ. ಕೊನೆಗೆ ಆಕೆ ಆತನ ಮೊದಲ ಹೆಂಡತಿ ಎನ್ನುವುದು ಅಲ್ಲಿದ್ದ ಜನರಿಗೂ ಗೊತ್ತಾಗಿದೆ. ಆಗ EPIC ಕಾರ್ಡ್ನಿಂದ ಆಕೆಯ ಪತಿ ಎಂದು ತನ್ನ ಹೆಸರನ್ನು ತೆಗೆದುಹಾಕುವವರೆಗೆ ಅಧಿಕಾರಿಗಳು ಆಕೆಗೆ ಮತ ಹಾಕಲು ಅವಕಾಶ ನೀಡಬಾರದು ಎಂದು ಆತ ಒತ್ತಾಯಿಸಿದ್ದಾನೆ. ಕೊನೆಗೆ ಭದ್ರತಾ ಸಿಬ್ಬಂದಿಗಳ ರಕ್ಷಣೆಯಿಂದ ಆ ಮಹಿಳೆ ವೋಟ್ ಮಾಡಿದ್ದಾಳೆ. ಬಳಿಕ ಗಂಡನನ್ನು ಭದ್ರತಾ ಸಿಬ್ಬಂದಿಗಳು ದೂರಕ್ಕೆ ಕರೆದೊಯ್ದು ಸಮಾಧಾನಪಡಿಸಿ ಕಳಿಸಿದ್ದಾರೆ ಎನ್ನಲಾಗಿದೆ.
