ಆಂಧ್ರ ಡಿಸಿಎಂ, ನಟ ಪವನ್‌ ಕಲ್ಯಾಣ್‌ ಮೂರನೇ ಮದುವೆಯೂ ಅಂತ್ಯ

ಆಂಧ್ರಪ್ರದೇಶದ ಉಪಮುಖ್ಯಮಂತ್ರಿ, ಜನಸೇನಾ ಪಕ್ಷದ ಅಧ್ಯಕ್ಷ ಹಾಗೂ ಪ್ರಸಿದ್ಧ ನಟ ಪವನ್ ಕಲ್ಯಾಣ್ ಹಾಗೂ ಅವರ ಮೂರನೇ ಪತ್ನಿ ಅನ್ನಾ ಕೊನಿಡೆಲಾ (ಅನ್ನಾ ಲೆಜ್ನೆವಾ) ತಮ್ಮ 13 ವರ್ಷಗಳ ದಾಂಪತ್ಯ ಜೀವನಕ್ಕೆ ಅಧಿಕೃತವಾಗಿ ತೆರೆ ಎಳೆದಿದ್ದಾರೆ. ಪರಸ್ಪರ ಒಪ್ಪಿಗೆಯ ಮೇರೆಗೆ ತಾವು ಬೇರೆಯಾಗುತ್ತಿರುವುದಾಗಿ ಇಬ್ಬರೂ ಜಂಟಿ ಪ್ರಕಟಣೆಯ ಮೂಲಕ ಘೋಷಿಸಿದ್ದಾರೆ.

Sponsored

ತಾವು ಜೀವನದ ಒಂದು ಸುದೀರ್ಘ ಹಾದಿಯನ್ನು ಒಟ್ಟಾಗಿ ಕಳೆದಿದ್ದರೂ, ಈಗ ಪರಸ್ಪರ ಆಲೋಚನೆಗಳು ಹಾಗೂ ಗೌರವದೊಂದಿಗೆ ಬೇರೆ ಬೇರೆ ದಾರಿಯಲ್ಲಿ ಸಾಗಲು ನಿರ್ಧರಿಸಿರುವುದಾಗಿ ತಿಳಿಸಿದ್ದಾರೆ. ಭಾಷಾ ಮತ್ತು ಬಾಂಧವ್ಯದ ಸಂಬಂಧಗಳು ಬದಲಾದರೂ, ತಾವು ಇನ್ನುಮುಂದೆಯೂ ಉತ್ತಮ ಸ್ನೇಹಿತರಾಗಿ ಮುಂದುವರಿಯುವುದಾಗಿ ಸ್ಪಷ್ಟಪಡಿಸಿದ್ದಾರೆ. ಇಬ್ಬರ ಜೀವನದಲ್ಲಿ ಮಕ್ಕಳ ಸಂಕ್ಷೇಮ ಮತ್ತು ಸಂತೋಷವೇ ಅತ್ಯಂತ ಮುಖ್ಯವಾಗಿದ್ದು, ಜವಾಬ್ದಾರಿಯುತ ತಂದೆ-ತಾಯಿಗಳಾಗಿ ಮಕ್ಕಳನ್ನು ಒಟ್ಟಾಗಿ ನೋಡಿಕೊಳ್ಳುವುದಾಗಿ ತಿಳಿಸಿದ್ದಾರೆ.
​
ಈ ವೈಯಕ್ತಿಕ ನಿರ್ಧಾರವನ್ನು ಗೌರವಿಸುವಂತೆ ಹಾಗೂ ತಮ್ಮ ಗೋಪ್ಯತೆಗೆ ಧಕ್ಕೆ ತರದಂತೆ ಮಾಧ್ಯಮಗಳು, ಅಭಿಮಾನಿಗಳು ಹಾಗೂ ಶ್ರೇಯೋಭಿಲಾಷಿಗಳಲ್ಲಿ ಅವರು ಕೋರಿದ್ದಾರೆ.

ರಷ್ಯಾ ಮೂಲದ ಮಾಡೆಲ್ ಹಾಗೂ ನಟಿ ಅನ್ನಾ ಲೆಜ್ನೆವಾ ಅವರು ಪವನ್ ಕಲ್ಯಾಣ್ ಜೊತೆ ‘ತೀನ್ ಮಾರ್’ ಸಿನಿಮಾದ ಚಿತ್ರೀಕರಣದ ಸಂದರ್ಭದಲ್ಲಿ ಪರಿಚಯವಾಗಿದ್ದರು. ಬಳಿಕ ಕೆಲವು ವರ್ಷಗಳ ಕಾಲ ಒಟ್ಟಿಗೆ ಇದ್ದ ಇವರು, 2013ರಲ್ಲಿ ಅಧಿಕೃತವಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು. ಈ ದಂಪತಿಗೆ ಪೊಲೆನಾ ಅಂಜನಾ ಪವನೊವಾ (ಮಗಳು) ಹಾಗೂ ಮಾರ್ಕ್ ಶಂಕರ ಪವನೊವಿಚ್ (ಮಗ) ಎಂಬಿಬ್ಬರು ಮಕ್ಕಳಿದ್ದಾರೆ.

​ಪವನ್ ಕಲ್ಯಾಣ್ ಅವರ ವೈಯಕ್ತಿಕ ಜೀವನವು ಈ ಹಿಂದೆ ಕೂಡ ಹಲವು ಬಾರಿ ಚರ್ಚೆಗೆ ಗ್ರಾಸವಾಗಿತ್ತು. 1997ರಲ್ಲಿ ನಂದಿನಿ ಎಂಬುವವರನ್ನು ವಿವಾಹವಾಗಿದ್ದರು. ನಂತರ ವೈಮನಸ್ಸುಗಳು ಮೂಡಿ 2008ರಲ್ಲಿ ಅಧಿಕೃತವಾಗಿ ವಿಚ್ಛೇದನ ಪಡೆದರು. ನಟಿ ರೇಣು ದೇಸಾಯಿ ಅವರನ್ನು ಪ್ರೀತಿಸಿ ಮದುವೆಯಾಗಿದ್ದರು. ಈ ದಂಪತಿಗೆ ಅಕಿರಾ ನಂದನ್ ಮತ್ತು ಅದ್ಯಾ ಮಕ್ಕಳಿದ್ದಾರೆ. ಕೆಲ ಕಾಲದ ಬಳಿಕ ಇವರೂ ಪರಸ್ಪರ ಒಪ್ಪಿಗೆಯಿಂದ 2012ರಲ್ಲಿ ವಿಚ್ಛೇದನ ಪಡೆದರು. ರೇಣು ದೇಸಾಯಿ ಬಳಿಕ 2013ರಲ್ಲಿ ರಷ್ಯಾ ಮೂಲದ ಅನ್ನಾ ಲೆಜ್ನೆವಾ ಅವರನ್ನು ವರಿಸಿದ್ದರು. ಸದ್ಯ 13 ವರ್ಷಗಳ ದಾಂಪತ್ಯದ ಬಳಿಕ ಈಗ ಇವರೊಂದಿಗೆಯೂ ವಿಚ್ಛೇದನ ಪಡೆದುಕೊಂಡಿದ್ದಾರೆ.
​
ಸದ್ಯ ರಾಜಕೀಯ ಮತ್ತು ಸಿನಿಮಾರಂಗದಲ್ಲಿ ಅತ್ಯಂತ ಬ್ಯುಸಿಯಾಗಿರುವ ಪವನ್ ಕಲ್ಯಾಣ್ ಅವರ ಈ ವೈಯಕ್ತಿಕ ನಿರ್ಧಾರವು ಆಂಧ್ರಪ್ರದೇಶ ರಾಜಕೀಯ ವಲಯದಲ್ಲೂ ಹಾಗೂ ಚಿತ್ರರಂಗದಲ್ಲೂ ತೀವ್ರ ಸಂಚಲನ ಮೂಡಿಸಿದೆ