ಸೌಜನ್ಯ ಪ್ರಕರಣ ಮರು ತನಿಖೆ – ‘ಚೂಡಿದಾರ್ ಟಾಪ್’ ಈಗ ಕೇಸ್‌’ನ ಪ್ರಮುಖ ಸಾಕ್ಷಿ?

ದಶಕಗಳಿಂದ ಹಾಗೆ ಉಳಿದಿದ್ದ ಧರ್ಮಸ್ಥಳದ ಸೌಜನ್ಯ ಕೊಲೆ ಪ್ರಕರಣದ ಮರು ತನಿಖೆ ನಡೆಸಲು ಸುಪ್ರೀಂ ಕೋರ್ಟ್ ಮಹತ್ವದ ಆದೇಶವನ್ನು ಹೊರಡಿಸಿ ಸರ್ಕಾರಕ್ಕೆ ಮೂರು ತಿಂಗಳ ಗಡುವು ನೀಡಿದೆ. ಈ ಆದೇಶದ ಬೆನ್ನಲ್ಲೇ ಸೌಜನ್ಯ ಎಂದು ಧರಿಸಿದ್ದ ‘ಚೂಡಿದಾರ್’ ಪ್ರಮುಖ ಸಾಕ್ಷಿ ಆಗಲಿದೆ ಎಂದು ಮೂಲಗಳು ತಿಳಿಸಿವೆ. 

Sponsored

ಹೌದು, ಸೌಜನ್ಯ ಪ್ರಕರಣದ ಮರುತನಿಖೆಯ ಆದೇಶದ ಬೆನ್ನಲ್ಲೇ, ಪ್ರಕರಣದಲ್ಲಿ ‘ಮೆಟೀರಿಯಲ್ ಆಬ್ಜೆಕ್ಟ್ ನಂ 15’ ಎಂದು ಗುರುತಿಸಲಾಗಿದ್ದ ಸೌಜನ್ಯ ಅವರ ‘ಚೂಡಿದಾರ್ ಟಾಪ್’ ಇದೀಗ ಅತ್ಯಂತ ನಿರ್ಣಾಯಕ ಸಾಕ್ಷ್ಯವಾಗಿ ಮುನ್ನೆಲೆಗೆ ಬಂದಿದೆ. ಈ ವಸ್ತುವಿಗೆ ಇನ್ನೂ ಸಂಪೂರ್ಣ ಸಾಕ್ಷಿ ಮೌಲ್ಯವಿದೆ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದ್ದು, ಪ್ರಕರಣಕ್ಕೆ ಹೊಸ ತಿರುವು ಲಭಿಸಿದೆ.

ಹಿಂದೆ ವಿಧಿವಿಜ್ಞಾನ ತಜ್ಞರಾದ ವಿನೋದ್ ಜೆ. ಲಕ್ಕಪ್ಪನ್ ಅವರು ನೀಡಿದ್ದ ಸಾಕ್ಷ್ಯದ ಪ್ರಕಾರ, ಸೌಜನ್ಯ ಅವರ ಚೂಡಿದಾರ್ ಟಾಪ್‌ನಲ್ಲಿ ಪ್ರಕರಣದ ಮುಖ್ಯ ಆರೋಪಿ ಎಂದು ಬಿಂಬಿತರಾಗಿದ್ದ ವ್ಯಕ್ತಿಯನ್ನು ಹೊರತುಪಡಿಸಿ ಇತರ ಕೆಲವು ವ್ಯಕ್ತಿಗಳ ಕೂದಲುಗಳು ಪತ್ತೆಯಾಗಿದ್ದವು. ಈಗ ಪತ್ತೆಯಾಗುವ ಹೊಸ ಶಂಕಿತರ ರಕ್ತದ ಮಾದರಿ ಅಥವಾ ಡಿಎನ್‌ಎಯನ್ನು ಈ ಚೂಡಿದಾರ್ ಟಾಪ್‌ನಲ್ಲಿ ಸಿಕ್ಕ ಮಾದರಿಗಳೊಂದಿಗೆ ಹೋಲಿಸಿ ಪರೀಕ್ಷಿಸಲು ಅವಕಾಶವಿದೆ. ಇದೇ ಅಂಶವನ್ನು ಸುಪ್ರೀಂ ಕೋರ್ಟ್ ಪ್ರಮುಖವಾಗಿ ಪರಿಗಣಿಸಿ ಮರುತನಿಖೆಗೆ ಅಸ್ತು ಎಂದಿದೆ.

ಇದರ ಜೊತೆಗೆ, ಅರ್ಜಿದಾರರು ಉಲ್ಲೇಖಿಸಿದ್ದ ಎಂಟು ಸಂಭಾವ್ಯ ಸಾಕ್ಷಿಗಳಿಗೆ ರಕ್ಷಣೆ ನೀಡುವಂತೆ ಕೋರ್ಟ್ ಸೂಚಿಸಿದ ಕೆಲವೇ ದಿನಗಳಲ್ಲಿ ರಾಜ್ಯ ಸರ್ಕಾರ ಅವರನ್ನು ಪತ್ತೆಹಚ್ಚಿತ್ತು. ಹಿಂದಿನ ಮೂರು ತನಿಖಾ ಸಂಸ್ಥೆಗಳು ಈ ಸಾಕ್ಷಿಗಳನ್ನು ಸಮಯಕ್ಕೆ ಸರಿಯಾಗಿ ತನಿಖೆ ಮಾಡದಿರುವುದನ್ನು ಕೋರ್ಟ್ ಪ್ರಶ್ನಿಸಿದೆ. ಅಲ್ಲದೆ, ಈಗಾಗಲೇ ವಿಚಾರಣೆ ಎದುರಿಸಿ ಖುಲಾಸೆಯಾಗಿರುವ ಸಂತೋಷ್ ರಾವ್ ಅವರನ್ನು ಸಂವಿಧಾನದ ನಿಯಮಗಳ ಪ್ರಕಾರ ಮತ್ತೆ ತನಿಖೆಗೆ ಒಳಪಡಿಸಲು ಬರುವುದಿಲ್ಲ ಎಂದು ಸ್ಪಷ್ಟಪಡಿಸಿರುವ ಸುಪ್ರೀಂ ಕೋರ್ಟ್, ಮಲ್ಲಿಕ್ ಜೈನ್, ದೀರಜ್ ಜೈನ್ ಹಾಗೂ ಉದಯ್ ಜೈನ್ ಅವರ ಪಾತ್ರದ ಬಗ್ಗೆ ಸ್ವತಂತ್ರವಾಗಿ ತನಿಖೆ ನಡೆಸಲು ಹೊಸ ಎಸ್‌ಐಟಿಗೆ ಸಂಪೂರ್ಣ ಅಧಿಕಾರ ನೀಡಿದೆ.