ಸಚಿವ ಅಜಯ್ ಸಿಂಗ್ ಉಂಗುರ ಕದಿಯಲು ಯತ್ನಿಸಿದ ಕಳ್ಳರು!!

ಮೆರವಣಿಗೆಯ ವೇಳೆ ಸಚಿವ ಡಾ. ಅಜಯ್ ಸಿಂಗ್  ಅವರ ಕೈಯಲ್ಲಿದ್ದ ಉಂಗುರವನ್ನು ಕದಿಯಲು ಕಳ್ಳರು ಯತ್ನಿಸಿರುವ ಘಟನೆ ಜಿಲ್ಲೆಯ ಯಡ್ರಾಮಿ ತಾಲೂಕಿನಲ್ಲಿ ನಡೆದಿದೆ. 

Sponsored

ಸಚಿವರಾದ ನಂತರ ಮೊದಲ ಬಾರಿಗೆ ತವರು ಕ್ಷೇತ್ರಕ್ಕೆ ಆಗಮಿಸುತ್ತಿದ್ದರು. ಈ ವೇಳೆ ಅಜಯ್ ಸಿಂಗ್ ಅವರನ್ನು ಜೇವರ್ಗಿ-ಯಡ್ರಾಮಿ ತಾಲ್ಲೂಕಿನ ನೂರಾರು ಕಾರ್ಯಕರ್ತರು ಮತ್ತು ಅಭಿಮಾನಿಗಳು ಭಾನುವಾರದಂದು ಅದ್ಧೂರಿಯಾಗಿ ಬರಮಾಡಿಕೊಂಡರು. ಬಳಿಕ ಬೆಂಬಲಿಗರು ಹೆಗಲ ಮೇಲೆ ಹೊತ್ತುಕೊಂಡು ಮೆರವಣಿಗೆಯಲ್ಲಿ ಸಾಗುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ.

ಮೆರವಣಿಗೆ ವೇಳೆ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಸಚಿವರ ಸುತ್ತ ಜಮಾಯಿಸಿದ್ದರಿಂದ ಕಳ್ಳತನಕ್ಕೆ ಯತ್ನ ನಡೆದಿದೆ. ಸಚಿವರ ಕೈಯಲ್ಲಿದ್ದ ಉಂಗುರವನ್ನು ಕದಿಯಲು ದುಷ್ಕರ್ಮಿ ಪ್ರಯತ್ನಿಸಿದಾಗ ಈ ವೇಳೆ ಅಜಯ್ ಸಿಂಗ್ ಬೆಚ್ಚಿಬಿದ್ದು ಕಿರುಚಾಡಿ ಕೂಡಲೇ ತಮ್ಮ ಕೈ ಹಿಂದಕ್ಕೆ ಎತ್ತಿಕೊಂಡಿದ್ದಾರೆ. ಘಟನೆಯ ದೃಶ್ಯ ಮೊಬೈಲ್​​ನಲ್ಲಿ ಸೆರೆಯಾಗಿದ್ದು, ವಿಡಿಯೋ ವೈರಲ್ ಆಗಿದೆ. ಘಟನೆ ಸಂಬಂಧ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.