ಮಂಗಳೂರು: ಅಮ್ಮುಂಜೆ ವೃದ್ಧೆ ಕೊಲೆ ಪ್ರಕರಣ: ಮೂವರಿಗೆ ಜೀವಾವಧಿ ಶಿಕ್ಷೆ ಪ್ರಕಟಿಸಿದ ನ್ಯಾಯಾಲಯ

ಮಂಗಳೂರು; ಅಮ್ಮುಂಜೆ ಗ್ರಾಮದ ಪಾಂಡೀಲಿ ಎಂಬಲ್ಲಿ ವಾಸವಿದ್ದ ಬೆನೆಡಿಕ್ಟ್‌ ಕಾರ್ಲೊ (80) ಕೊಲೆ ಪ್ರಕರಣದಲ್ಲಿ ಮನೆಯ ಕೆಲಸದಾಕೆ ಸೇರಿ ಮೂವರಿಗೆ ಮಂಗಳೂರಿನ 2ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ (ವಿಶೇಷ) ನ್ಯಾಯಾಲಯವು ಜು.28 ರ ಮಂಗಳವಾರ ಜೀವಾವಧಿ ಶಿಕ್ಷೆಯನ್ನು ವಿಧಿಸಿದೆ.

Sponsored

ಅಮ್ಟಾಡಿ ಗ್ರಾಮದ ವಿಲ್ಮಾ ಪ್ರಶ್ಚಿತಾ ಬರೆಟ್ಟೊ (30), ನರಿಕೊಂಬು ಗ್ರಾಮದ ಸತೀಶ್‌ (33) ಮತ್ತು ಚರಣ್‌ ಕುಮಾರ್‌ (34) ಶಿಕ್ಷೆಗೊಳಗಾದವರು.

ಜ.25,2021 ರಂದು ಈ ಘಟನೆ ನಡೆದಿದೆ. ಬೆನೆಡಿಕ್ಟ್‌ ಕಾರ್ಲೋ ಅವರು ಅನಾರೋಗ್ಯ ಪೀಡಿತ ಪತಿ ಇನಾಸ್‌ ಕಾರ್ಲೋ ಅವರ ಜೊತೆ ಅಮ್ಮುಂಜೆ ಗ್ರಾಮದ ಪಾಂಡೀಲಿಯಲ್ಲಿ ವಾಸವಿದ್ದು, ಪ್ರಕರಣ ನಡೆಯುವ ಎರಡು ತಿಂಗಳ ಮೊದಲು ವಿಲ್ಮಾ ಆರೈಕೆ ಕೆಲಸಕ್ಕೆಂದು ವಾರದಲ್ಲಿ ಎರಡು ಮೂರು ದಿನ ಹೋಗುತ್ತಿದ್ದಳು. ಈ ವೇಳೆ ಕಾರ್ಲೋರವರ ಚಿನ್ನದ ಕರಿಮಣಿ ಸರ ಹಾಗೂ ಮನೆಯಲ್ಲಿ ಇತರ ಚಿನ್ನಾಭರಣ ಇರುವುದನ್ನು ಗಮನಿಸಿದ್ದಳು. ಅದನ್ನು ಕದಿಯುವ ಉದ್ದೇಶದಿಂದ ತನ್ನ ಸ್ನೇಹಿತ ಸತೀಶ್‌ ಎನ್ನುವಾತನನ್ನು ಸಂಪರ್ಕ ಮಾಡಿ ಕೊಲೆಗೆ ಸಹಕರಿಸುವ ನಿಟ್ಟಿನಲ್ಲಿ ವಿಷ ಪದಾರ್ಥ ಒದಗಿಸುವಂತೆ ತಿಳಿಸಿದ್ದಳು. ಸತೀಶ ಇದನ್ನೆಲ್ಲ ಒದಗಿಸಿದ್ದ. ವಿಲ್ಮಾ ಅದನ್ನು ಬೆನೆಡಿಕ್ಟ್‌ ಕಾರ್ಲೋ ಅವರ ಆಹಾರದಲ್ಲಿ ಬೆರೆಸಿ ನೀಡಿದ್ದಳು.

ರಾತ್ರಿ 11 ಗಂಟೆಯಾದರೂ ಸಾಯದ ಹಿನ್ನೆಲೆಯಲ್ಲಿ, ಹೇಗಾದರೂ ಮಾಡಿ ಆಕೆಯನ್ನು ಸಾಯಿಸಬೇಕು ಎಂದು ಮತ್ತೆ ಸತೀಶನಿಗೆ ಕರೆ ಮಾಡಿ ಒಬ್ಬ ಯುವಕನನ್ನು ಕಳುಹಿಸಿದ್ದು, ಉಸಿರುಗಟ್ಟಿಸಿ ಸಾಯಿಸಬಹುದು ಎಂದು ಹೇಳಿದ್ದಳು. ಅದರಂತೆ ಸತೀಶ ತನ್ನ ಸ್ನೇಹಿತ ಚರಣ್‌ ಕುಮಾರ್‌ ನನ್ನು ಷರತ್ತಿನಂತೆ ಕಳುಹಿಸಿ, ಇಬ್ಬರೂ ಸೇರಿ ಮಲಗಿದ್ದ ಬೆನೆಡಿಕ್ಟ್‌ ಕಾರ್ಲೊ ಅವರ ಮೇಲೆ ತಲೆದಿಂಬು ಹಾಗೂ ಬೈರಾಸ್‌ನಿಂದ ಬಾಯಿ ಮತ್ತು ಮೂಗನ್ನು ಒತ್ತಿ ಹಿಡಿದು ಉಸಿರುಗಟ್ಟಿಸಿ ಕೊಲೆ ಮಾಡಿದ್ದರು.

ನಂತರ ಕುತ್ತಿಗೆಯಲ್ಲಿದ್ದ ಚಿನ್ನದ ಕರಿಮಣಿ ಸರ ಹಾಗೂ ಮನೆಯಲ್ಲಿದ್ದ ಚಿನ್ನದ ಕಿವಿಯೋಲೆ, ಕೈ, ಬಳೆ,ಉಂಗುರಗಳು, ಚೈನು ಸೇರಿ ರೂ.2,75,000 ಮೌಲ್ಯದ ಚಿನ್ನಾಭರಣವನ್ನು ಸುಲಿಗೆ ಮಾಡಿದ್ದಾರೆ. ಇದರಲ್ಲಿ ಚರಣ್‌ ಕರಿಮಣಿಸರ ತೆಗೆದುಕೊಂಡು ಹೋಗಿದ್ದ. ಉಳಿದ ವಿಷ ಪದಾರ್ಥವನ್ನು ರಸ್ತೆ ಬದಿಯ ತೋಡಿನಲ್ಲಿ ಎಸೆದು ಸಾಕ್ಷ್ಯ ನಾಶಪಡಿಸಿದ್ದ.

ಜ.26 ರಂದು ಸಂಜೆ ವೇಳೆ ಈ ಘಟನೆ ತಿಳಿದು ಬಂದಿದೆ. ಪಕ್ಕದ ಮನೆ ಮಂದಿ ಮಾತನಾಡಿಸಲೆಂದು ಹೋದಾಗ ಬೆನೆಡಿಕ್ಟ್‌ ಇರಲಿಲ್ಲ. ಪಾರ್ಶ್ವವಾಯು ಪೀಡಿತರಾಗಿ ಮನೆಯಲ್ಲಿ ಮಲಗಿದ್ದ ಇನಾಸ್‌ ಅವರಲ್ಲಿ ಬೆನೆಡಿಕ್ಟ್‌ ಎಲ್ಲಿ ಎಂದು ಕೇಳಿದಾಗ ಕೋಣೆ ತೋರಿಸಿದ್ದು, ಅಲ್ಲಿ ನೋಡಿದಾ ಮೃತಪಟ್ಟ ಸ್ಥಿತಿಯಲ್ಲಿದ್ದರು. ಈ ವಿಚಾರ ಆಕೆಯ ಸೊಸೆಗೆ ತಿಳಿಸಲಾಯಿತು.

ವಿಲ್ಮಾ ಸಂಪರ್ಕಕ್ಕೆ ಸಿಗದಿರುವುದು, ಚಿನ್ನ ಇಲ್ಲದಿರುವುದು ನಂತರ ಅನುಮಾನ ಮೂಡಿದೆ. ಮೃತದೇಹವನ್ನು ಸ್ನಾನ ಮಾಡಿಸುವಾಗ ದೇಹದಲ್ಲಿ ಊತದ ಗಾಯ ಕಂಡು ಬಂದಿದೆ. ಈ ಅನುಮಾನದಲ್ಲಿ ದೂರನ್ನು ನೀಡಲಾಯಿತು. ನಂತರ ಮರಣೋತ್ತರ ವರದಿಯಲ್ಲಿ ವಿಷ ಪದಾರ್ಥ ಸೇವನೆ ಮಾಡಿರುವುದು ತಿಳಿದು ಬಂದಿದೆ. ನಂತರ ಮೃತರ ಪುತ್ರ ರೊನಾಲ್ಡ್‌ ಕಾರ್ಲೋ ನೀಡಿದ ದೂರಿನಂತೆ ಬಂಟ್ವಾಳ ಗ್ರಾಮಾಂತರ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

ಮೂವರು ಅಪರಾಧಿಗಳಿಗೆ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ಮತ್ತು ತಲಾ ಐದು ಸಾವಿರ ರೂ.ದಂಡ, ಆರು ತಿಂಗಳ ಸಾದಾ ಸಜೆ ಹಾಗೂ ರೂ.5000 ದಂಡ, ಸಾಕ್ಷ್ಯ ನಾಶ ಪಡಿಸಿದ ಹಿನ್ನೆಲೆಯಲ್ಲಿ ಒಂದು ವರ್ಷದ ಸಾದಾ ಸಜೆ ಮತ್ತು ತಲಾ 1000 ರೂ. ದಂಡ, ದಂಡ ಪಾವತಿ ಮಾಡಲು ತಪ್ಪಿದ್ದಲ್ಲಿ 15 ದಿನದ ಸಾದಾ ಸಜೆ.

ಒಟ್ಟು ದಂಡ ಮೊತ್ತ ರೂ.33000 ನಲ್ಲಿ ರೂ.8000 ಸರಕಾರಕ್ಕೆ ಪಾವತಿ ಮಾಡಲು ಹಾಗೂ ರೂ.25000 ವನ್ನು ಮೃತರ ಪುತ್ರನಿಗೆ ನೀಡಲು ನ್ಯಾಯಾಧೀಶರು ಆದೇಶ ನೀಡಿದ್ದಾರೆ. ಪ್ರಕರಣದಲ್ಲಿ ವಶಪಡಿಸಲಾದ ಮೊಬೈಲ್‌ಗಳನ್ನು ಸರಕಾರಕ್ಕೆ ಮುಟ್ಟುಗೋಲು ಹಾಕಲು ಆದೇಶ ನೀಡಿದ್ದಾರೆ.