ಐಫೋನ್ ಮೇಲಿನ ಆಸೆಗೆ ಅತ್ತೆಯ 53 ಗ್ರಾಂ ಚಿನ್ನ ಕದ್ದು ಮಾರಿದ ಸೊಸೆ
ನಾಗ್ಪುರ: ಆಪಲ್ ಐಫೋನ್ ಖರೀದಿ ಮಾಡಬೇಕೆಂಬ ಆಸೆಯಿಂದ ಸೊಸೆಯೊಬ್ಬಳು ತನ್ನ ಅತ್ತೆಯ ಚಿನ್ನಾಭರಣಗಳನ್ನು ಕದ್ದು ಮಾರಾಟ ಮಾಡಿರುವ ಆರೋಪ ಕೇಳಿ ಬಂದಿದೆ. ಸುಮಾರು ಎರಡೂವರೆ ಲಕ್ಷದ ಚಿನ್ನಾಭರಣಗಳನ್ನು ಮಾರಾಟ ಮಾಡಿ ಬಂದ ಹಣದಿಂದ ಹೊಸ ಆಪಲ್ ಐಫೋನ್ ಖರೀದಿಸಿರುವುದಾಗಿ ಆಕೆ ಒಪ್ಪಿಕೊಂಡಿದ್ದಾಳೆ ಎನ್ನಲಾಗಿದೆ.
Sponsoredಈ ಘಟನೆ ನಡೆದಿರುವುದು ಮಹಾರಾಷ್ಟ್ರದ ನಾಗ್ಪುರದಲ್ಲಿ. ರಾಧಾ ವರ್ಮಾ ಅವರು ಶಿರಡಿ ಯಾತ್ರೆಗೆ ತೆರಳಲು ಸಿದ್ಧತೆ ಮಾಡುತ್ತಿದ್ದಾಗ, ತಮ್ಮ ಬೀರುವಿನಲ್ಲಿಟ್ಟಿದ್ದ ಚಿನ್ನಾಭರಣಗಳನ್ನು ಪರಿಶೀಲನೆ ಮಾಡಿದ್ದು, ಆಗ ಅವರ ಗಮನಕ್ಕೆ ಚಿನ್ನ ನಾಪತ್ತೆಯಾಗಿರುವುದು ಗಮನಕ್ಕೆ ಬಂದಿದೆ. ಒಟ್ಟು 53 ಗ್ರಾಂ ತೂಕದ ಚಿನ್ನಾಭರಣಗಳು ಲಾಕರ್ನಿಂದ ನಾಪತ್ತೆಯಾಗಿತ್ತು.
ಮನೆಮಂದಿಯ ವಿಚಾರಣೆ ಮಾಡಿದಾಗ ರಾಧಾ ವರ್ಮ ಅವರು ತಮ್ಮ ಸೊಸೆ ಗ್ರಂಥಾಲಿ ಆಕಾಶ್ ವರ್ಮಾ ಅವರನ್ನು ಕೂಡಾ ಪ್ರಶ್ನೆ ಮಾಡಿದ್ದಾರೆ. ಈ ವೇಳೆ ಸೊಸೆಯೇ ಆಭರಣ ಕದ್ದಿರುವುದು ಬೆಳಕಿಗೆ ಬಂದಿದೆ. ಗ್ರಂಥಾಲಿ ಐಫೋನ್ಗಾಗಿ ಚಿನ್ನ ಕದ್ದೆ ಎನ್ನುವುದನ್ನು ಒಪ್ಪಿಕೊಂಡಿದ್ದಾಳೆ. ಕದ್ದ ಚಿನ್ನವನ್ನು ಮರಳಿ ತಂದು ಕೊಡುವುದಾಗಿ ಗ್ರಂಥಾಲಿ ಭರವಸೆ ನೀಡಿದ್ದಾಳೆ ಎನ್ನಲಾಗಿದೆ. ಆದರೆ ಭರವಸೆ ನೀಡಿದಂತೆ ಚಿನ್ನಾಭರಣಗಳನ್ನು ವಾಪಸ್ ನೀಡದ ಹಿನ್ನೆಲೆಯಲ್ಲಿ ರಾಧಾ ವರ್ಮಾ ಅವರು ಪೊಲೀಸರಲ್ಲಿ ಸೊಸೆಯ ವಿರುದ್ಧ ದೂರನ್ನು ದಾಖಲು ಮಾಡಿದ್ದಾರೆ.
ವಿಚಾರಣೆ ಸಂದರ್ಭ ಗ್ರಂಥಾಲಿ ಆಕಾಶ್ ವರ್ಮಾ ಈ ಹಿಂದೆ ಕೂಡಾ ಕಳ್ಳತನ ಮಾಡಿರುವುದು ಈ ಕುರಿತು ಪ್ರಕರಣ ದಾಖಲಾಗಿರುವ ಮಾಹಿತಿ ಬೆಳಕಿಗೆ ಬಂದಿದೆ ಎಂದು ತಿಳಿದು ಬಂದಿದೆ. ತನಿಖೆ ಬಳಿಕ ಸಂಪೂರ್ಣ ವಿವರಗಳು ತಿಳಿದು ಬರಬೇಕಿದೆ.




