ದಿಢೀರ್‌ ಯು ಟರ್ನ್‌ ಹೊಡೆದ ಕೆಎಸ್‌ಆರ್‌ಟಿಸಿ ಬಸ್‌-ಇನ್ನೋವಾ ಕಾರಿನಲ್ಲಿದ್ದ ಪುತ್ತೂರಿನ ಏಳು ಮಂದಿಗೆ ಗಾಯ

ಪುತ್ತೂರು: ಕುಮಟಾ ತಾಲೂಕಿನ ಮಿರ್ಜಾನ್‌ ಬೆಳಗರಣಿ ಕ್ರಾಸ್‌ ಸಮೀಪ ರಾಷ್ಟ್ರೀಯ ಹೆದ್ದಾರಿ 66 ರಲ್ಲಿ ಯಾವುದೇ ಸಿಗ್ನಲ್‌ ಇಲ್ಲದೆ ಯು ಟರ್ನ್‌ ಮಾಡಿದ ಬಸ್‌ನಿಂದ ಸಂಭವಿಸಿದ ಇನ್ನೋವಾ ಕಾರು ಅಪಘಾತದಲ್ಲಿ ಕಾರಿನಲ್ಲಿದ್ದ ಏಳು ಮಂದಿ ಗಾಯಗೊಂಡಿರುವ ಘಟನೆ ಕುರಿತು ಕುಮಟಾ ಠಾಣೆಯಲ್ಲಿ ದೂರು ದಾಖಲಾಗಿದೆ.

Sponsored

ಅಪಘಾತದಿಂದ ಕಾರಿನ ಎದುರು ಭಾಗ ಜಖಂ ಗೊಂಡಿದೆ. ಕಾರು ಚಾಲಕ ಚಂದ್ರಕಾಂತ ಸಿ, ಪ್ರಯಾಣಿಕರಾದ ಅವನೀಶ್‌, ಆದಿತ್ಯ, ಧನ್ಯಶ್ರೀ, ಕೀರ್ತನಾ, ಸಾವಿತ್ರಿ ಅವರಿಗೆ ಸಣ್ಣಪುಟ್ಟ ಗಾಯವಾಗಿದೆ. ಅಕ್ಷರಿ ಎನ್ನುವವರಿಗೆ ತುಟಿ, ಮುಖಭಾಗಕ್ಕೆ ಗಂಭೀರ ಗಾಯವಾಗಿದ್ದು, ಅವರನ್ನು ಮಂಗಳೂರು ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಪುತ್ತೂರಿನಿಂದ ಗೋಕರ್ಣ ಮಠಕ್ಕೆ ತೆರಳುತ್ತಿದ್ದ ಇನ್ನೋವಾ ಕಾರು ಮಿರ್ಜಾನ್‌ ಬೆಳಗರಣಿ ಕ್ರಾಸ್‌ ಬಳಿ ಹೆದ್ದಾರಿಯ ಬಲಬದಿಯ ಪಥದಲ್ಲಿ ಸಾಗುತ್ತಿದ್ದ ವೇಳೆ, ಕುಮಟಾ ಕಡೆಯಿಂದ ಬರುತ್ತಿದ್ದ ಬಸ್‌ ಏಕಾಏಕಿ ಯು ಟರ್ನ್‌ ಹೊಡೆದು, ಬಲಭಾಗಕ್ಕೆ ತಿರುಗಿದೆ. ಕಾರು ಚಾಲಕ ಸುಳ್ಯ ನಿವಾಸಿ ಚಂದ್ರಕಾಂತ ಅವರು ದೂರು ದಾಖಲು ಮಾಡಿದ್ದು, ಅಜಾಗರೂಕತೆಯಿಂದ ಬಸ್‌ ಚಾಲನೆ ಆರೋಪದಡಿ ಪ್ರಕರಣ ದಾಖಲಿಸಿಕೊಂಡು ಕುಮಟಾ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.