ಚಳಿಗಾಲದಲ್ಲಿ ನಮ್ಮ ದೇಹವನ್ನು ಕಾಳಜಿಯಿಂದ ಕಾಪಾಡಿಕೊಳ್ಳಬೇಕು. ಈ ಸಮಯದಲ್ಲಿ ರೋಗ ನಿರೋಧಕ ಶಕ್ತಿಯ ಪ್ರಮಾಣ ಕಡಿಮೆಯಾಗಿರುತ್ತದೆ. ದೇಹ ಬೆಚ್ಚಗಾಗಲು ಹೇಗೆ ನಾವು ಕಿಟಕಿ, ಬಾಗಿಲುಗಳನ್ನು ಮುಚ್ಚಿ, ಸ್ವೆಟರ್, ಹೊದಿಕೆ ಹಾಕಿಕೊಳ್ಳುತ್ತೇವೊ ಹಾಗೆಯೇ, ನಮ್ಮ ದೇಹವನ್ನು ಆರೋಗ್ಯಕರವಾಗಿ ಮತ್ತು ಒಳಗಿನಿಂದ ಬೆಚ್ಚಗಾಗಿಸುವುದು ಅವಶ್ಯಕ. ಚಳಿಗಾಲದಲ್ಲಿ ಜ್ವರ, ನೆಗಡಿ, ಕೆಮ್ಮು ಇತ್ಯಾದಿ ರೋಗಗಳು ಹೆಚ್ಚು. ಇದಕ್ಕಾಗಿ, ದೇಹದ ರೋಗನಿರೋಧಕ ಶಕ್ತಿ ತುಂಬಾ ಹೆಚ್ಚಿರಬೇಕು.
ಸಾಮಾನ್ಯವಾಗಿ ನಮಗೆಲ್ಲಾ ತಿಳಿದಿರುವಂತೆ ಒಂದು ಸೇಬು ಹಣ್ಣನ್ನು ಸೇವಿಸಿದರೆ ನಮ್ಮನ್ನು ಹೃದ್ರೋಗ ವೈದ್ಯರಿಂದ ದೂರ ಇಟ್ಟುಕೊಳ್ಳಬಹುದು ಎಂದು. ಆದರೆ ದಿನಕ್ಕೊಂದು ಮೊಟ್ಟೆ ಇದನೆಲ್ಲಾ ಮೀರಿ ನಮ್ಮ ಸಂಪೂರ್ಣ ದೇಹದ ಗುಣಮಟ್ಟವನ್ನು ಹೆಚ್ಚಿಸಿ ನಮ್ಮನ್ನು ಎಲ್ಲಾ ರೀತಿಯ ವೈದ್ಯರುಗಳಿಂದ ದೂರವಿಡುತ್ತದೆ. ಮೊಟ್ಟೆಗಳು ಅಂತಹ ಒಂದು ಪ್ರೋಟೀನ್ ಮೂಲವಾಗಿದೆ. ಶೀತ ಮತ್ತು ಶುಷ್ಕ ವಾತಾವರಣದಲ್ಲಿ ಸಾಂಕ್ರಾಮಿಕ ಸೂಕ್ಷ್ಮಜೀವಿಗಳು ಬಲವಾಗಿ ಬೆಳೆಯುತ್ತವೆ. ಮೊಟ್ಟೆಗಳ ಮುಖ್ಯ ಪ್ರಯೋಜನವೆಂದರೆ ದೇಹವು ಹಾನಿಕಾರಕ ಸೂಕ್ಷ್ಮಜೀವಿಗಳ ವಿರುದ್ಧ ಹೋರಾಡಲು ಮತ್ತು ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸಲು ಸಹಾಯ ಮಾಡುತ್ತದೆ. ಹಾಗಾಗಿ ಚಳಿಗಾಲದಲ್ಲಿ ಮೊಟ್ಟೆ ತಿನ್ನುವುದು ಬಹಳ ಮುಖ್ಯ.
ಬಹುಪಯೋಗಿ ಮೊಟ್ಟೆಗೆ ಪಾಕಶಾಲೆಯಲ್ಲಿ ವಿಶೇಷ ಸ್ಥಾನವಿದೆ. ನಾಲಗೆಯ ರುಚಿ ಹೆಚ್ಚಿಸುವ ವ್ಯಂಜನಗಳ ತಯಾರಿಯಲ್ಲಿ ಸದಾ ಉಪಯೋಗಕ್ಕೆ ಬರುವ ಮೊಟ್ಟೆ ಆರೋಗ್ಯಕರ ಅಂಶಗಳ ಖಜಾನೆ ಎಂದರೆ ತಪ್ಪಾಗದು. ಮೊಟ್ಟೆಗಳು ಯಾವಾಗಲೂ ಪೌಷ್ಟಿಕಾಂಶ ಮತ್ತು ಆರೋಗ್ಯ ವರ್ಧನೆಗೆ ಬಹಳ ಪ್ರಯೋಜನಕಾರಿ ಆಹಾರವಾಗಿದೆ. ವಿಶ್ವದ ಅತ್ಯಂತ ಪೌಷ್ಟಿಕ ಆಹಾರಗಳಲ್ಲಿ ಮೊಟ್ಟೆಯೂ ಒಂದಾಗಿದೆ ಮತ್ತು ವಿಶ್ವ ಆಹಾರ ದಿನದಂದು ವಿಶ್ವಸಂಸ್ಥೆಯಿಂದ ಸೂಪರ್ ಫುಡ್ ಎಂದು ಗುರುತಿಸಲಾಗಿದೆ. ಈ ಸೂಪರ್ ಫುಡ್ ಮೊಟ್ಟೆಯ ಆರೋಗ್ಯ ಪ್ರಯೋಜನಗಳನ್ನು ತಿಳಿಯೋಣ ಬನ್ನಿ.
ತೂಕ ನಿಯಂತ್ರಣ:- ಮೊಟ್ಟೆಗಳು ಪ್ರೋಟೀನ್, ಕೊಬ್ಬು ಮತ್ತು ಪೋಷಕಾಂಶಗಳ ಮಿಶ್ರಣವಾಗಿದೆ. ಮೊಟ್ಟೆ ತಿಂದರೆ ಹೊಟ್ಟೆ ತುಂಬಿದ ಅನುಭವ ಆಗುತ್ತದೆ. ಇದರಿಂದ ತೂಕವು ನಿಯಂತ್ರಣದಲ್ಲಿರುತ್ತದೆ. ಮೊಟ್ಟೆಗಳು ಕೀಟೊ ಆಹಾರದ ಪ್ರಮುಖ ಅಂಶಗಳಲ್ಲಿ ಒಂದಾಗಿದೆ ಏಕೆಂದರೆ ಅವು ತೂಕ ನಷ್ಟಕ್ಕೆ ಸಹಾಯ ಮಾಡುತ್ತದೆ.
ನೆಗಡಿ:- ಮೊಟ್ಟೆಯ ಹಳದಿಗಳಲ್ಲಿ ವಿಟಮಿನ್ ಡಿ ಇದ್ದು ಇದು ನೆಗಡಿ ಮತ್ತು ಜ್ವರದಿಂದ ಚೇತರಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಇದು ದೇಹವನ್ನು ಆರೋಗ್ಯಕರವಾಗಿಡಲು ಅಗತ್ಯವಿರುವ ವಿವಿಧ ಜೀವಸತ್ವಗಳು ಮತ್ತು ಖನಿಜಗಳನ್ನು ಒಳಗೊಂಡಿರುವ ಕಾರಣ ಇದು ಉತ್ತಮ ರೋಗನಿರೋಧಕ ಬೂಸ್ಟರ್ ಆಗಿ ಕಾರ್ಯನಿರ್ವಹಿಸುತ್ತದೆ.
ಮೂಳೆಗಳ ಆರೋಗ್ಯ:- ದೇಹದ ಮೂಳೆಗಳು ಮತ್ತು ಸ್ನಾಯುಗಳನ್ನು ನಿರ್ಮಿಸಲು ಪ್ರೋಟೀನ್ ತುಂಬಾ ಅವಶ್ಯಕ ಎಂಬುವುದು ಎಲ್ಲರಿಗೂ ತಿಳಿದಿದೆ. ಪ್ರೋಟೀನ್‌ನ ಖಜಾನೆಯನ್ನು ಹೊಂದಿರುವ ಮೊಟ್ಟೆಗಳ ಸೇವನೆಯಿಂದ ಮೂಳೆಗಳ ಆರೋಗ್ಯ ಉತ್ತಮವಾಗಿರುತ್ತದೆ. ಮಧ್ಯಮ ಗಾತ್ರದ ಮೊಟ್ಟೆಯು 6 ಗ್ರಾಂ ಪ್ರೋಟೀನ್ ಅನ್ನು ಹೊಂದಿರುತ್ತದೆ. ದೇಹವು ಪ್ರತಿಜೀವಕಗಳನ್ನು ತಯಾರಿಸಲು ಮತ್ತು ಅನಗತ್ಯ ಸೂಕ್ಷ್ಮಜೀವಿಗಳ ವಿರುದ್ಧ ಹೋರಾಡಲು ಸಹಾಯ ಮಾಡುವ ಮೂಲಕ ಪ್ರೋಟೀನ್ ಸೋಂಕನ್ನು ತಡೆಯಲು ಸಹಾಯ ಮಾಡುತ್ತದೆ.
ತ್ವಚೆ:- ಮೊಟ್ಟೆಗಳು ಸೆಲೆನಿಯಮ್‌ನ ಅತ್ಯುತ್ತಮ ಮೂಲವಾಗಿದೆ, ಇದು ಆರೋಗ್ಯಕರ ಚರ್ಮವನ್ನು ಕಾಪಾಡಿಕೊಳ್ಳಲು ಮುಖ್ಯವಾಗಿದೆ. ಪ್ರತಿನಿತ್ಯ ಮೊಟ್ಟೆಯನ್ನು ತಿನ್ನುವುದರಿಂದ ತ್ವಚೆಗೆ ಪೋಷಣೆ ಸಿಗುತ್ತದೆ ಮತ್ತು ಆರೋಗ್ಯಕರವಾಗಿರುತ್ತದೆ. ಮೊಟ್ಟೆಗಳಲ್ಲಿ ಕಂಡುಬರುವ ಅನೇಕ ಅಗತ್ಯ ಪೋಷಕಾಂಶಗಳು ಸೂರ್ಯನ ಹಾನಿಕಾರಕ ಯುವಿ ಕಿರಣಗಳ ವಿರುದ್ಧ ರಕ್ಷಿಸುತ್ತದೆ.
ದೃಷ್ಟಿ ಸುಧಾರಿಸಲು ಸಹಾಯ:- ಮೊಟ್ಟೆಯ ಹಳದಿ ಲೋಳೆಯು ಶಕ್ತಿಯುತವಾದ ಉತ್ಕರ್ಷಣ ನಿರೋಧಕಗಳಾದ ಲುಟೀನ್ ಮತ್ತು ಜಿಯಾಕ್ಸಾಂಥಿನ್‌ಗಳಲ್ಲಿ ಸಮೃದ್ಧವಾಗಿದೆ. ಈ ಉತ್ಕರ್ಷಣ ನಿರೋಧಕಗಳು ಕಣ್ಣುಗಳ ರೆಟಿನಾದಲ್ಲಿ ಸೇರಿಕೊಳ್ಳುತ್ತವೆ. ಕಣ್ಣಿನ ಪೊರೆ ಮತ್ತು ಮ್ಯಾಕ್ಯುಲರ್ ಡಿಜೆನರೇಶನ್ ಸೇರಿದಂತೆ ಕೆಲವು ಕಣ್ಣಿನ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುವಲ್ಲಿ ಈ ಎರಡು ಉತ್ಕರ್ಷಣ ನಿರೋಧಕಗಳು ರಕ್ಷಣಾತ್ಮಕ ಪಾತ್ರವನ್ನು ವಹಿಸುತ್ತವೆ. ಮೊಟ್ಟೆಯಲ್ಲಿ ವಿಟಮಿನ್ ಎ ಮತ್ತು ಒಮೆಗಾ-3 ಕೊಬ್ಬಿನಾಮ್ಲಗಳು ಅಧಿಕವಾಗಿದ್ದು, ನಿಮ್ಮ ಕಣ್ಣುಗಳನ್ನು ಆರೋಗ್ಯವಾಗಿಡಲು ಸಹಾಯ ಮಾಡುತ್ತದೆ.
