ಇಂದು ಇಡೀ ಜಗತ್ತೇ ಸೆಲ್ಫಿಮಯವಾಗಿಬಿಟ್ಟಿದೆ. ಎಲ್ಲಿನೋಡಿದರಲ್ಲಿ ಜನರು ಅಡ್ಡಡ್ಡ, ಉದ್ದುದ್ದವಾಗಿ ಮೊಬೈಲ್ ಹಿಡಿದುಕೊಂಡು ಸೆಲ್ಫಿಗೆ ಫೋಸ್ ಕೊಡುತ್ತಿರುತ್ತಾರೆ. ಸೆಲ್ಫಿ ಕ್ರೇಜ್ ಎಷ್ಟರ ಮಟ್ಟಿಗೆ ಇದೆ ಅಂದರೆ, ಇದರಿಂದಾಗಿ ಅದೆಷ್ಟೋ ಜನರು ಪ್ರಾಣವನ್ನು ಕಳೆದುಕೊಂಡಿದ್ದಾರೆ. ಆದರೆ ಈ ಸೆಲ್ಫಿ ಕ್ರೇಜ್ ಮನುಷ್ಯರಲ್ಲಿ ಮಾತ್ರವಲ್ಲ, ಪ್ರಾಣಿಗಳಲ್ಲಿಯೂ ಶುರುವಾಗಿದೆ. ಸೆಲ್ಫಿ ಗೀಳು ಕಾಡು ಪ್ರಾಣಿಗಳನ್ನೂ ಬಿಟ್ಟಿಲ್ಲ ಅನ್ಬೋದು. ಅರೇ ಈ ಸೆಲ್ಫಿಗೂ ಕಾಡು ಪ್ರಾಣಿಗೂ ಎಲ್ಲಿಂದ ಸಂಬಂಧ ಎಂದು ಯೋಚಿಸ್ತಿದ್ದೀರಾ? ಇಲ್ಲಿದೆ ನೋಡಿ ಗಮ್ಮತ್ತಿನ ವಿಚಾರ! ಇಲ್ಲೊಂದು ಕರಡಿ ಬರೋಬ್ಬರಿ 400 ಸೆಲ್ಫಿಗೆ ಪೋಸ್ ಕೊಟ್ಟಿದ್ದು, ಬಾರೀ ಸುದ್ದಿಯಾಗ್ತಿದೆ. ಇದೇನಾಪ್ಪ ಅಂಥಾ ಅನ್ಕೋತಾ ಇದ್ದೀರಾ? ಹೌದು ಅಮೇರಿಕಾದಲ್ಲಿ ಈ ಘಟನೆ ನಡೆದಿದ್ದು ಇದೀಗಾ ಸಾಮಾಜಿಕ ಜಾಲತಾಣದಲ್ಲಿ ಕರಡಿಯ ಸೆಲ್ಫಿಗಳು ಸಕ್ಕತ್ತ್ ಆಗಿ ವೈರಲ್ ಆಗುತ್ತಿದೆ.
ದಿನಬೆಳಗಾದರೆ ಸಾಕು, ಯಾವುದಾದರೂ ಒಂದು ಫೋಟೋ, ವಿಡಿಯೋ ಅಥವಾ ಒಂದು ವಿಚಿತ್ರವಾದ ಸನ್ನಿವೇಶಗಳಾದರೂ ಸಾಕಷ್ಟು ಸುದ್ದಿಮಾಡಿ, ವೈರಲ್ ಆಗಿಬಿಟ್ಟಿರುತ್ತವೆ. ಅವುಗಳಲ್ಲಿ ಕೆಲವೊಂದು ಮಿಲಿಯನ್ ಗಟ್ಟಲೆ ವೀಕ್ಷಣೆ ಪಡೆಯುವ ಮೂಲಕ ಅಷ್ಟೇ ಟ್ರೆಂಡ್ ಕ್ರಿಯೇಟ್ ಮಾಡುತ್ತಿರುತ್ತವೆ. ಈಗ ಕರಡಿಯೊಂದು 400 ಸೆಲ್ಫಿ ತೆಗೆಯುವ ಮೂಲಕ ವೈರಲ್ ಆಗಿ ಒಂದು ಟ್ರೆಂಡ್ ಕ್ರಿಯೆಟ್ ಮಾಡಿದೆ. ಹೌದು, ಅಮೆರಿಕಾದ ಈ ಕರಡಿ ಕೊಲೊರಾಡೋದ ವನ್ಯಜೀವಿ ಕ್ಯಾಮೆರಾದಲ್ಲಿ ಸೆಲ್ಫಿಗಳನ್ನು ಸೆರೆಹಿಡಿದಿದೆ. ಅದು ಬರೋಬ್ಬರಿ 400 ಸೆಲ್ಫಿಗೆ ಪೋಸ್ ಕೊಟ್ಟಿದೆ!
ಕೊಲೊರಾಡೋದ ವನ್ಯಜೀವಿಧಾಮದಲ್ಲಿ, ವನ್ಯಜೀವಿ ಛಾಯಾಗ್ರಾಹಕರೊಬ್ಬರು ರಾತ್ರಿ ವೇಳೆ ಕ್ಯಾಮರಾವನ್ನು ಅಳವಡಿಸಿದ್ದರು, ಮರುದಿನ ನೋಡಿದಾಗ ಅದರಲ್ಲಿ ಒಟ್ಟು 580 ಫೋಟೋಗಳು ಕ್ಲಿಕ್ಕಿಸಿದ್ದವು. ಆಶ್ಚರ್ಯ ಏನಂದ್ರೆ ಆದರಲ್ಲಿ ಸುಮಾರು 400 ಆ ಕರಡಿಯ ಸೆಲ್ಫಿಗಳೇ ಇದ್ದವು! ಬೌಲ್ಡರ್ ಓಪನ್ ಸ್ಪೇಸ್ ಮತ್ತು ಮೌಂಟೇನ್ ಪಾರ್ಕ್ಸ್ ಅವರು ತಮ್ಮ ಖಾತೆಯಲ್ಲಿ ಜನವರಿ 24 ರಂದು ಕರಡಿ ತೆಗೆದ ಚಿತ್ರಗಳನ್ನು ಟ್ವೀಟರ್ನಲ್ಲಿ ಹಂಚಿಕೊಂಡಿದ್ದಾರೆ. ಈ ಪೋಸ್ಟ್ ಈಗಾಗಲೇ 1ಮಿಲಿಯನ್ ವೀಕ್ಷಣೆ ಕಂಡಿದೆ. ಜೊತೆಗೆ 8ಸಾವಿರ ಲೈಕ್ ಹಾಗೂ 2ಸಾವಿರದಷ್ಟು ರಿಟ್ವಿಟ್ಗಳನ್ನು ಪಡೆದುಕೊಂಡಿದೆ. ಇದರಿಂದ ಸೆಲ್ಫಿ ಕ್ರೇಜ್ ಪ್ರಾಣಿಗೂ ಬಂತಲ್ಲಾ ಎಂದು ಸಾಕಷ್ಟು ಜನ ಪ್ರತಿಕ್ರಿಯಿಸಿದ್ದಾರೆ.
