ಸೈನಿಕನೆಂಬ ಹೆಸರಿನಲ್ಲಿ ಕುಳಾಯಿಯ ವ್ಯಕ್ತಿಗೆ ಕುಳಿತಲ್ಲೇ ಬ್ಲೇಡ್ | ಅಕೌಂಟ್ ನಿಂದ ಹರಿದು ಹೋಯಿತು 2.23 ಲಕ್ಷ !!
ಸೈನಿಕನೆಂದು ನಂಬಿಸಿ ವ್ಯಕ್ತಿಯೊಬ್ಬ ಫ್ಲ್ಯಾಟ್‌ ಬಾಡಿಗೆಗೆ ಪಡೆಯುವ ನೆಪದಲ್ಲಿ ಲಕ್ಷಾಂತರ ರೂ. ವಂಚನೆ ಮಾಡಿರುವ ಬಗ್ಗೆ ಸೈಬರ್‌ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಮಂಗಳೂರಿನ ಕುಳಾಯಿಯಲ್ಲಿ ಫ್ಲ್ಯಾಟ್‌ ಹೊಂದಿರುವ ವ್ಯಕ್ತಿಯೊಬ್ಬರು ಮ್ಯಾಜಿಕ್‌ ಬ್ರಿಕ್‌ ವೆಬ್‌ಸೈಟ್‌ನಲ್ಲಿ ಫ್ಲ್ಯಾಟ್‌ನ್ನು ಬಾಡಿಗೆ ನೀಡುವ ಬಗ್ಗೆ ಜಾಹೀರಾತು ಹಾಕಿದ್ದರು. ಇದನ್ನು ನೋಡಿದ ಅಂಕಿತ್‌ ವಿಜಯ್ ಎಂಬಾತ ಜು. 20 ರಂದು ಫ್ಲ್ಯಾಟ್‌ ಮಾಲೀಕರಿಗೆ ಕರೆ ಮಾಡಿ ‘ತಾನು ಸೈನಿಕನಾಗಿದ್ದು ಪ್ರಸ್ತುತ ಅಹಮದಾಬಾದ್‌ನಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದು, ಮಂಗಳೂರಿಗೆ ವರ್ಗಾವಣೆಯಾಗಿದ್ದೇನೆ. ತನಗೆ ಕುಳಾಯಿಯಲ್ಲಿರುವ ಫ್ಲ್ಯಾಟ್‌ ಬಾಡಿಗೆಗೆ ಬೇಕೆಂದು ತಿಳಿಸಿ ಮಿಲಿಟರಿ ಸಮವಸ್ತ್ರದಲ್ಲಿರುವ ತನ್ನ ಭಾವಚಿತ್ರ, ಹಾಗೂ ಆಧಾರ್‌ ಕಾರ್ಡ್‌ನ್ನು ವಾಟ್ಸಪ್‌ ಮೂಲಕ ಕಳುಹಿಸಿಕೊಟ್ಟು, ಫ್ಲ್ಯಾಟ್‌ನ ಭಾವಚಿತ್ರಗಳನ್ನು ಕಳುಹಿಸಿಕೊಡುವಂತೆ ಕೇಳಿದ್ದಾನೆ.
ಅದರಂತೆ ಮಾಲೀಕರು ಫ್ಲ್ಯಾಟ್‌ನ ಭಾವಚಿತ್ರವನ್ನು ಆತನ ಮೊಬೈಲ್‌ಗೆ ಕಳುಹಿಸಿದ್ದು, ಜು.20ರಂದು ಆರೋಪಿ ಕರೆಮಾಡಿ ನನ್ನ ಮನೆಯವರಿಗೆ ಫ್ಲ್ಯಾಟ್‌ ಇಷ್ಟವಾಗಿದ್ದು, ಫ್ಲ್ಯಾಟ್‌ ಬಾಡಿಗೆಗೆ ನೀಡಿ ಎಂದು ತಿಳಿಸಿದ್ದಾನೆ. ಅದರಂತೆ ಫ್ಲಾಟ್‌ಗೆ ತಿಂಗಳಿಗೆ 10 ಸಾವಿರ ರೂ. ಬಾಡಿಗೆ ಹಾಗೂ 25 ಸಾವಿರ ರೂ. ಡೆಪಾಸಿಟ್‌ ನೀಡಲು ತಿಳಿಸಿದ್ದರು. ಈ ಬಗ್ಗೆ ಆರೋಪಿತನು ಫ್ಲ್ಯಾಟ್‌ ಮುಂಗಡ ಹಣವನ್ನು ತನ್ನ ಅಕೌಂಟೆಂಟ್‌ ಹಾಗೂ ಮೇಲಾಧಿಕಾರಿ ಪಾವತಿಸುವುದಾಗಿ ತಿಳಿಸಿರುತ್ತಾನೆ.
ನಂತರ ಆರೋಪಿ ಫ್ಲ್ಯಾಟ್‌ ಮಾಲೀಕರಿಗೆ 50 ರೂ.ವನ್ನು ಎಚ್‌ಡಿಎಫ್‌ಸಿ ಬ್ಯಾಂಕ್‌ ಖಾತೆ ಸಂಖ್ಯೆಗೆ ವರ್ಗಾಯಿಸಿದ್ದಾನೆ. ತದನಂತರ ಅವರ ಬ್ಯಾಂಕ್‌ ಖಾತೆಯಿಂದ ಹಂತ ಹಂತವಾಗಿ 2,23,500 ರೂ. ತನ್ನ ಖಾತೆಗೆ ವರ್ಗಾಯಿಸಿದ್ದಾನೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಘಟನೆ ಸಂಬಂಧ ಸೈಬರ್‌ ಕ್ರೈಂ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
