Central Govt : ಕೇಂದ್ರ ಸರ್ಕಾರವು ಟ್ರಾನ್ಸ್ಜೆಂಡರ್ ವ್ಯಕ್ತಿಗಳು, ಪುರುಷರೊಂದಿಗೆ ಲೈಂಗಿಕ ಸಂಬಂಧ ಹೊಂದಿರುವ ಪುರುಷರು (MSM) ಮತ್ತು ಮಹಿಳಾ ಲೈಂಗಿಕ ಕಾರ್ಯಕರ್ತೆಯರನ್ನು (FSW) ರಕ್ತದಾನ ಮಾಡುವಂತಿಲ್ಲ ಎಂದು ಹೇಳಿ, ಸುಪ್ರೀಂ ಕೋರ್ಟ್ ನಲ್ಲಿ ತನ್ನ ನೀತಿಯನ್ನು ಸಮರ್ಥಿಸಿಕೊಂಡಿದೆ.
ಭಾರತದ ಸುಪ್ರೀಂ ಕೋರ್ಟ್ಗೆ ಸಲ್ಲಿಸಿದ ಅಫಿಡವಿಟ್’ಗಳಲ್ಲಿ ತಜ್ಞರ ಸಮಿತಿಯ ವರದಿಗಳನ್ನು ಉಲ್ಲೇಖಿಸಿ, ಕೇಂದ್ರ ಸರ್ಕಾರವು ಈ ವಾದವನ್ನು ಹೂಡಿದೆ. ಇದು ತಾರತಮ್ಯವಲ್ಲ ಆದರೆ HIV ಮತ್ತು ಹೆಪಟೈಟಿಸ್’ನಂತಹ ರಕ್ತಪೂರೈಕೆಯಿಂದ ಹರಡುವ ಸೋಂಕುಗಳಿಂದ (TTIs) ರಕ್ತ ಪೂರೈಕೆಯ ಸಮಗ್ರತೆಯನ್ನು ರಕ್ಷಿಸಲು ವಿನ್ಯಾಸಗೊಳಿಸಲಾದ ಅಗತ್ಯ ಸುರಕ್ಷತಾ ಕ್ರಮಗಳಾಗಿವೆ ಎಂದು ಸರ್ಕಾರ ವಾದಿಸಿದೆ.
ಜಗತ್ತಿನ ಅನೇಕ ದೇಶಗಳಲ್ಲಿ ಈ ನಿರ್ಬಂಧ ಹಲವು ವರ್ಷಗಳಿಂದ ಜಾರಿಯಲ್ಲಿದೆ. 1970- 1980ರ ದಶಕದಲ್ಲಿ ಅಮೆರಿಕದಲ್ಲಿ ಏಡ್ಸ್ ಸಮಸ್ಯೆ ಬಿಗಡಾಯಿಸಿತ್ತು. ಆಗ ಸಲಿಂಗಿಗಳು ಮತ್ತು ಲಿಂಗತ್ವ ಅಲ್ಪಸಂಖ್ಯಾತರು ರಕ್ತದಾನ ಮಾಡದಂತೆ ಸಂಪೂರ್ಣ ನಿಷೇಧ ವಿಧಿಸಲಾಗಿತ್ತು. 2015ರಲ್ಲಿ ಇದರಲ್ಲಿ ಕೆಲವು ಸಡಿಲಿಕೆಗಳನ್ನು ಮಾಡಲಾಗಿತ್ತು. ಕನಿಷ್ಠ ಒಂದು ವರ್ಷದಿಂದ ಸೆಕ್ಸ್ ಮಾಡದ ಸಲಿಂಗಿ ಪುರುಷರು ರಕ್ತದಾನ ಮಾಡಬಹುದು ಎಂದು ನಿಯಮ ಬದಲಿಸಲಾಗಿತ್ತು.