ತಮ್ಮ ಸ್ವಂತ ಗಂಡಂದಿರಿಗೆ , ಪ್ರೇಮಿಗಳಿಗೆ ಹೆದರದೆ ಅವರೆಲ್ಲರನ್ನೂ ತಮ್ಮ ಕಪಿಮುಷ್ಠಿಯಲ್ಲಿ ಬಿಗಿ ಹಿಡಿದುಕೊಳ್ಳುವ ಮಹಿಳೆಯರು ಅಥವಾ ಯುವತಿಯರು, ಹೋಗಲಿ ಬಿಡಿ ಹುಡುಗಿಯರು ಗಡಗಡನೆ ನಡುಗುವ, ನೋಡಿ ಹೆದರುವ ಏಕೈಕ ಜೀವಿ ಎಂದರೆ ಅದು ಜಿರಳೆ ಮಾತ್ರ. ಜಿರಳೆಯೊಂದು ದೂರದಲ್ಲಿ ಹೋಗುತ್ತಿದೆ ಎಂದರು ಕೂಡ ಕಿಟಾರನೆ ಕೇರಿ ಏನೋ ದೊಡ್ಡ ಅನಾಹುತ ಸಂಭವಿಸಿದೆ ಎಂಬಂತೆ ರದ್ದಾಂತ ಮಾಡುತ್ತಾರೆ. ಆದರೆ ಈ ಹುಡುಗಿಯರೇಕೆ ಜಿರಳೆ ಕಂಡರೆ ಇಷ್ಟೊಂದು ಹೆದರುತ್ತಾರೆ ಎಂದು ನೀವೆಂದಾದರೂ ಯೋಚಿಸಿದ್ದೀರಾ?
ಇಂದು ಮಹಿಳೆಯರು ಜಿರಳೆ ಕಂಡರೆ ಅತಿಯಾಗಿ ಭಯಪಡುತ್ತಾರೆ ಎಂಬುದು ಒಂದು ಸಾಮಾನ್ಯ ನಂಬಿಕೆಯಾಗಿದೆ. ಆದರೆ, ಈ ಭಯ ಕೇವಲ ನಂಬಿಕೆಯ ವಿಷಯವಲ್ಲ. ಇದರ ಹಿಂದೆ ಗಂಭೀರವಾದ ವೈಜ್ಞಾನಿಕ ಮತ್ತು ಮಾನಸಿಕ ಕಾರಣಗಳಿವೆ ಎಂದು ತಜ್ಞರು ಹೇಳುತ್ತಾರೆ. ಹಾಗಿದ್ರೆ ಇಲ್ಲಿದೆ ನೋಡಿ ಕಾರಣ.
ಜಿರಳೆಗೆ ಹೆದರುವುದೇಕೆ?
ಜಿರಳೆಗಳ ಮೇಲಿನ ಈ ವಿಪರೀತ ಭಯವನ್ನು “ಕ್ಯಾಟ್ಸರಿಡಾಫೋಬಿಯಾ” (Katsaridaphobia) ಎಂದು ಕರೆಯಲಾಗುತ್ತದೆ. ಜಿರಳೆಗಳು ಮಾಡುವ ಅನಿಯಮಿತ ಚಲನೆ, ಅವುಗಳ ರೆಕ್ಕೆಗಳ ಸದ್ದು ಮತ್ತು ಅಚಾನಕ್ ಆಗಿ ನಮ್ಮ ಮೈಮೇಲೆ ಹಾರುವ ಗುಣವು ಮನುಷ್ಯನ ಮೆದುಳಿನಲ್ಲಿ ‘ಅಪಾಯದ ಮುನ್ಸೂಚನೆ’ಯನ್ನು ನೀಡುತ್ತದೆ. ನಮ್ಮ ಮೆದುಳು ನಮಗೆ ಜಿರಳೆ ಒಂದು ಅಪಾಯಕಾರಿ ಜೀವಿ ಎಂಬಂತೆ ಸಂದೇಶ ರವಾನಿಸಿ ನಮ್ಮ ಕಾಲು ಕೀಳುವಂತೆ ಮಾಡುತ್ತದೆ.
ಅಸಹ್ಯ ಮತ್ತು ರೋಗದ ಭಯ:
ಜಿರಳೆಗಳು ಸಾಮಾನ್ಯವಾಗಿ ಚರಂಡಿ, ಕಸದ ಬುಟ್ಟಿ ಅಥವಾ ಅಸ್ವಚ್ಛ ಜಾಗಗಳಲ್ಲಿ ವಾಸಿಸುತ್ತವೆ. ಹೀಗಾಗಿ ಅವುಗಳನ್ನು ಕಂಡ ತಕ್ಷಣ ನಮಗೆ ಅಸಹ್ಯದ ಭಾವನೆ ಮೂಡುವುದು ಸಹಜ. ಅವು ತಮ್ಮ ದೇಹದ ಮೇಲೆ ಸಾವಿರಾರು ಬ್ಯಾಕ್ಟೀರಿಯಾಗಳನ್ನು ಹೊತ್ತು ತರುತ್ತವೆ ಎಂಬುದು ನಮಗೆ ಉಪಪ್ರಜ್ಞೆ ಮನಸ್ಸಿನಲ್ಲಿ ತಿಳಿದಿರುತ್ತದೆ. ಈ ‘ಅಸ್ವಚ್ಛತೆಯ ಭಯ’ವೇ ನಮ್ಮನ್ನು ಅವುಗಳಿಂದ ದೂರವಿರುವಂತೆ ಮಾಡುತ್ತದೆ.