Recharge : ಕೆಲವೊಂದು ಸಂದರ್ಭಗಳಲ್ಲಿ ನಾವು ನಮ್ಮ ಮೊಬೈಲ್ ನಂಬರ್ ಗೆ ರಿಚಾರ್ಜ್ ಮಾಡುವುದನ್ನು ಮರೆತು ಬಿಡುತ್ತೇವೆ. ಇದರಿಂದ ಮೊಬೈಲಿಗೆ ಯಾವುದೇ ಸಮಸ್ಯೆಗಳು ಉಂಟಾಗುವುದಿಲ್ಲ. ಆದರೆ ಸಿಮ್ ಕಾರ್ಡ್ ಬಂದ್ ಆಗುವ ಸಾಧ್ಯತೆಗಳು ಹೆಚ್ಚಿವೆ. ಹೀಗಾದಾಗ ಆ ಸಿಮ್ ಕಾರ್ಡ್ ಎಷ್ಟು ದಿನಗಳವರೆಗೆ ಚಾಲ್ತಿಯಲ್ಲಿರುತ್ತದೆ ಮತ್ತು ಯಾವಾಗ ಬಂದ್ ಆಗುತ್ತದೆ ಎಂಬ ಪ್ರಶ್ನೆ ನಿಮ್ಮಲ್ಲಿರಬಹುದು. ಅದಕ್ಕೆ ಇಲ್ಲಿದೆ ಉತ್ತರ.
ಇನ್ ಕಮಿಂಗ್ ಸೇವೆ ರದ್ದು :
ಸಾಮಾನ್ಯವಾಗಿ ನಿಮ್ಮ ರಿಚಾರ್ಜ್ ವ್ಯಾಲಿಡಿಟಿ ಮುಗಿದ ತಕ್ಷಣ, ಔಟ್ ಗೋಯಿಂಗ್ ಕರೆ ಮಾಡುವ ಸೌಲಭ್ಯ ಸ್ಥಗಿತಗೊಳ್ಳುತ್ತದೆ. ಆದರೆ, ಇನ್ ಕಮಿಂಗ್ ಕರೆ ಸೌಲಭ್ಯವು ಕಂಪನಿಗಳ ಆಧಾರದ ಮೇಲೆ ಮುಂದಿನ 7 ರಿಂದ 15 ದಿನಗಳವರೆಗೆ ಚಾಲ್ತಿಯಲ್ಲಿರಬಹುದು.
ಸಿಮ್ ಕಾರ್ಡ್ ಸಂಪೂರ್ಣವಾಗಿ ಯಾವಾಗ ಬಂದ್ ಆಗುತ್ತದೆ?
ಭಾರತೀಯ ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರ (TRAI) ಮತ್ತು ಟೆಲಿಕಾಂ ಕಂಪನಿಗಳ ನಿಯಮಗಳ ಪ್ರಕಾರ, ನೀವು ಸತತವಾಗಿ 90 ದಿನಗಳವರೆಗೆ (ಸುಮಾರು 3 ತಿಂಗಳು) ಯಾವುದೇ ರಿಚಾರ್ಜ್ ಮಾಡದಿದ್ದರೆ ಅಥವಾ ಯಾವುದೇ ಚಟುವಟಿಕೆ (ಕರೆ ಅಥವಾ ಸಂದೇಶ) ನಡೆಸದಿದ್ದರೆ, ಆ ಸಿಮ್ ಕಾರ್ಡ್ ಅನ್ನು ನಿಷ್ಕ್ರಿಯಗೊಳಿಸಲಾಗುತ್ತದೆ. ನಿಮ್ಮ ಸಿಮ್ ಬಂದ್ ಆದ 15 ದಿನಗಳ ಒಳಗಾಗಿ ನೀವು ಹತ್ತಿರದ ಟೆಲಿಕಾಂ ಆಫೀಸ್ಗೆ ಹೋಗಿ ದಂಡ ಪಾವತಿಸಿ ಅಥವಾ ರಿಚಾರ್ಜ್ ಮಾಡಿಸಿ ಅದನ್ನು ಮತ್ತೆ ಪಡೆಯಲು ಅವಕಾಶವಿರುತ್ತದೆ. ಆದರೆ ದೀರ್ಘಕಾಲದವರೆಗೆ ರಿಚಾರ್ಜ್ ಮಾಡದಿದ್ದರೆ ಆ ನಂಬರ್ ನಿಮ್ಮ ಕೈಯಿಂದ ಶಾಶ್ವತವಾಗಿ ತಪ್ಪಿಹೋಗಬಹುದು.
ನಂಬರ್ ಬೇರೆಯವರಿಗೆ ಸಿಗುತ್ತದೆಯೇ?
ಒಮ್ಮೆ ನಿಮ್ಮ ಸಿಮ್ ಕಾರ್ಡ್ ನಿಷ್ಕ್ರಿಯಗೊಂಡರೆ, ಆ ನಂಬರ್ ಅನ್ನು ಕಂಪನಿಯು ತನ್ನ ‘ನಂಬರ್ ಪೂಲ್’ಗೆ ಸೇರಿಸುತ್ತದೆ. ಅಂದರೆ, ಕೆಲವು ದಿನಗಳ ನಂತರ ಅದೇ ನಂಬರ್ ಅನ್ನು ಹೊಸ ಗ್ರಾಹಕರಿಗೆ ಮಾರುಕಟ್ಟೆಯಲ್ಲಿ ಮಾರಾಟ ಮಾಡಲಾಗುತ್ತದೆ.