ನನ್ನ ಗೆಳತಿಯರ ಆಸೆನೂ ಈಡೇರಿಸು ಎಂದ ಹೆಂಡತಿ ಆಫರ್‌ ಕೇಳಿ ಪೊಲೀಸ್‌ ಠಾಣೆಗೆ ಬಂದ ಗಂಡ

ಬೆಂಗಳೂರು ಮಾ.29: ಪತಿಯೋರ್ವ ತನ್ನ ಪತ್ನಿಯ ಲೈಂಗಿಕ ವಾಂಛೆ ಹಾಗೂ ಆಕೆಯ ವಿಕೃತ ನಡವಳಿಕೆಯಿಂದ ಬೇಸತ್ತು ಇದೀಗ ಪೊಲೀಸ್‌ ಠಾಣೆ ಮೆಟ್ಟಿಲೇರಿರುವ ಘಟನೆ ನಡೆದಿದೆ.

ಬೆಂಗಳೂರಿನ ಅಮೃತಹಳ್ಳಿ ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ಈ ಘಟನೆ ನಡೆದಿದೆ. ಪತ್ನಿಯಿಂದ ನಿರಂತರವಾಗಿ ಲೈಂಗಿಕವಾಗಿ ಮತ್ತು ಮಾನಸಿಕವಾಗಿ ಟಾರ್ಚರ್‌ ಅನುಭವಿಸುತ್ತಿದ್ದೇನೆ ಎಂದು ಪತಿ ದೂರಿನಲ್ಲಿ ಆರೋಪ ಮಾಡಿದ್ದಾರೆ. ಮದುವೆಯಾದ ಹೊಸದರಲ್ಲಿ ಎಲ್ಲಾ ಚೆನ್ನಾಗಿತ್ತು. ಆದರೆ ದಿನ ಕಳೆದ ರೀತಿಯಲ್ಲಿ ಪತ್ನಿಯ ಅಸಲಿ ಮುಖ ತಿಳಿಯಿತು ಎಂದು ಪತಿ ಆರೋಪ ಮಾಡಿದ್ದಾನೆ.

ಪತಿ ಆರೋಪ ಮಾಡಿರುವ ಪ್ರಕಾರ, ಪತ್ನಿ ಆಕೆಯ ಜೊತೆ ಮಾತ್ರವಲ್ಲದೇ ಆಕೆಯ ಸ್ನೇಹಿತೆಯ ಜೊತೆಗೂ ದೈಹಿಕ ಸಂಬಂಧ ಹೊಂದುವಂತೆ ಪತಿಯನ್ನು ಒತ್ತಾಯ ಮಾಡುತ್ತಿದ್ದಾಳೆ. ವಿಕೃತ ದೈಹಿಕ ಸಂಪರ್ಕಕ್ಕೆ ಪತಿ ಒಪ್ಪದೇ ಇದ್ದಾಗ ಆತನಿಗೆ ದೈಹಿಕ, ಮಾನಸಿಕ ಕಿರುಕುಳ ನೀಡಲು ಪ್ರಾರಂಭ ಮಾಡಿದ್ದಾಳೆ. ಅಲ್ಲದೇ, ಅಶ್ಲೀಲ ವಿಡಿಯೋ ಹಾಗೂ ರೆಕಾರ್ಡಿಂಗ್‌ ಕಳುಹಿಸಿ ವಿಕೃತಿ ಮೆರೆಯುತ್ತಿದ್ದಳು. ಪತ್ನಿಯ ಸ್ನೇಹಿತೆಯರ ಜೊತೆ ಇದ್ದ ನೆನಪುಗಳನ್ನು ಹಂಚಿಕೊಳ್ಳಲು ಪೀಡಿಸುತ್ತಿದ್ದಾಳೆ. ಪತ್ನಿಯ ಈ ನಡೆಯಿಂದ ಪತಿಗೆ ತೀವ್ರ ಮುಜುಗುರವುಂಟಾಗಿದೆ.

ನನಗೆ ಹಲವು ಜನರ ಜೊತೆ ಸಂಬಂಧವಿತ್ತು ಎಂದು ಹೇಳಿ ಹೇಳಿ ನೆಮ್ಮದಿ ಕೆಡಿಸುತ್ತಿದ್ದಳು. ಅಷ್ಟೇ ಅಲ್ಲದೇ, ಪ್ರತಿದಿನ ಕುಡಿದು ಬರುವುದು, ತಡರಾತ್ರಿ ತನಕ ಸ್ನೇಹಿತರ ಜೊತೆ ಸುತ್ತುವುದು ತನಗೆ ಸಾಮಾನ್ಯ ಎಂದು ಪತ್ನಿ ವಾದ ಮಾಡುತ್ತಿದ್ದಳು ಎಂದು ದೂರಿನಲ್ಲಿ ಉಲ್ಲೇಖ ಮಾಡಲಾಗಿದೆ.

ಮದುವೆಯ ನಂತರ ಲಕ್ಷಾಂತರ ಮೌಲ್ಯದ ಚಿನ್ನಾಭರಣಗಳನ್ನು ಪತಿ ತನ್ನ ಪತ್ನಿಯ ಕೈಗೆ ನೀಡಿದ್ದು, ಇದೀಗ ಅದನ್ನು ವಾಪಸ್‌ ಕೊಡದೆ ಸತಾಯಿಸುತ್ತಿದ್ದಾಳೆ. ರಾಜಿ ಪಂಚಾಯಿತಿ ನಡೆದರೂ ಆಕೆಯ ವರ್ತನೆಯಲ್ಲಿ ಬದಲಾವಣೆ ಆಗಿಲ್ಲ.

ಪತ್ನಿಯ ಕಾಟ ತಾಳಲಾರದೆ ಕೊನೆಗೂ ಪತಿ ಬೆಂಗಳೂರಿನ ಅಮೃತಹಳ್ಳಿ ಪೊಲೀಸ್‌ ಠಾಣೆಯಲ್ಲಿ ದೂರನ್ನು ದಾಖಲು ಮಾಡಿದ್ದಾರೆ.