ದೇವರ ಸಿನಿಮಾ ಶೂಟಿಂಗ್ ಸಂದರ್ಭ ಅಪಚಾರ | ಶೂ ಧರಿಸಿ ದೇವರ ಭಂಡಾರ ಮುಟ್ಟಿದ ಕೋರಿಯೋಗ್ರಾಫರ್ | ಡ್ಯಾನ್ಸರ್ ಮೈಮೇಲೆ ಬಂದ ದೇವಿ ಹೇಳಿದ್ದಾದರೂ ಏನು?

ಕೊಪ್ಪಳ: ಸಿನಿಮಾ ಚಿತ್ರೀಕರಣದ ಸಂದರ್ಭದಲ್ಲಿ ದೇವಿಗೆ ಅಪಮಾನ ಆಗಿದೆ ಎಂದು ಡ್ಯಾನ್ಸರ್ ಮೈ ಮೇಲೆ ದೇವಿ ಬಂದಿದ್ದಳು ಎನ್ನಲಾಗಿದ್ದು, ನಂತರ ಚಿತ್ರೀಕರಣ ನಿಂತು ಹೋದ ಘಟನೆಯೊಂದು ಕೊಪ್ಪಳದಲ್ಲಿ ನಡೆದಿದೆ.
ಹೌದು, ಕೊಪ್ಪಳ ತಾಲೂಕಿನ ಪ್ರಮುಖ ಧಾರ್ಮಿಕ ಕೇಂದ್ರವಾಗಿರುವ ಹುಲಿಗಿ ದೇವಸ್ಥಾನದಲ್ಲಿ ಈ ಘಟನೆ ನಡೆದಿದೆ.

ನಟಿ ಪ್ರಿಯಾಂಕಾ ಉಪೇಂದ್ರ ವಿಶ್ವರೂಪಿಣಿ ಹುಲಿಗೆಮ್ಮ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಸಾಯಿಪ್ರಕಾಶ್ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಆಗಸ್ಟ್ 9ರಂದು ಹುಲಿಗಿಯ ಹುಲಗೆಮ್ಮ ದೇವಸ್ಥಾನದಲ್ಲಿ ಸಿನಿಮಾ ಸೆಟ್ಟೇರಿದೆ.

ಈ ಸಿನಿಮಾದ ಶೂಟಿಂಗ್ ವೇಳೆ ಡ್ಯಾನ್ಸ್ ಕೊರಿಯೋಗ್ರಾಫರ್ ಮದನ್ ಎಂಬುವವವರು ಶೂ ಹಾಕಿಕೊಂಡು ಭಂಡಾರ ತುಳಿದಿದ್ದು ಘಟನೆಗೆ ಕಾರಣವಾಗಿದೆ ಎಂದು ಹೇಳಲಾಗಿದೆ. ಈ ವೇಳೆ ಪೂಜಾ ಮೈಮೇಲೆ ಹುಲಿಗೆಮ್ಮ ದೇವಿ ಬಂದಿದ್ದು, ಶೂ ಕಳಚಿ, ಭಂಡಾರ ತುಳಿಬೇಡಿ ಎಂದು ಕಿರುಚಿದ್ದಾಳೆ.

ಕೂಡಲೇ ನಿರ್ಮಾಪಕರು ಪೂಜಾಗೆ ತುಂಗಭದ್ರಾ ನದಿಯಲ್ಲಿ ಸ್ನಾನ ಮಾಡಿಸಿದ್ದಾರೆ. ನಂತರ ಹಸಿರು ಬಳೆ ತೊಡಿಸಿ, ಹುಲಿಗೆಮ್ಮನಿಗೆ ಜೋಡುಗಾಯಿ ಒಡೆಸಿ ವಿಶೇಷ ಪೂಜೆ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಆಗಿರುವ ತಪ್ಪು ಏನು ಕೇಳಿದಾಗ, ಶೂಟಿಂಗ್‌ ನನ್ನ ವಿರೋಧವಿಲ್ಲ. ಆದರೆ, ನನ್ನ ಭಂಡಾರ ತುಳಿಯಬೇಡಿ ಎಂದಿದ್ದಾಳೆ. ಇದಕ್ಕೆ ಒಪ್ಪಿಕೊಂಡ ನಂತರ ಮತ್ತೆ ಚಿತ್ರೀಕರಣ ಆರಂಭವಾಗಿದೆ.