ತಾಯಿ ಅಂದ್ರೇನೆ ಕರುಣಾಮಯಿ ಅನ್ನುತ್ತೇವೆ. ಅದೇ ರೀತಿ ತಾಯಿಯ ವರ್ತನೆಯು ಇರುತ್ತೆ. ಮಕ್ಕಳು ಅದೇನೇ ತಪ್ಪು ಮಾಡಿದರೂ ಹೊಟ್ಟೆಗೆ ಹಾಕಿಕೊಂಡು ಪ್ರೀತಿಯಿಂದ ಸಾಕುವವಳೇ ಅಮ್ಮಾ. ಆದ್ರೆ ಇಲ್ಲೊಂದು ಕಡೆ ಆ ತಾಯಿಯೇ ಕ್ರೂರಿಯಾಗಿದ್ದಾಳೆ.ಹೌದು. ಪ್ರಪಂಚದಲ್ಲಿ ಕೆಟ್ಟ ತಾಯಿಯೂ ಇದ್ದಾಳೆ ಎಂಬುದಕ್ಕೆ ಈಕೆಯೇ ಸಾಕ್ಷಿ.
ಈ ಮಹಾ ತಾಯಿ, ತನ್ನದೇ ಮಗುವನ್ನು ಚಿತ್ರಹಿಂಸೆಗೆ ಗುರಿಪಡಿಸಿದ್ದಾಳೆ. ಒಂಭತ್ತು ತಿಂಗಳ ಪುಟ್ಟ ಕಂದಮ್ಮನಿಗೆ ತಾಯಿ ಮನಬಂದಂತೆ ಥಳಿಸಿರೋ ವಿಡಿಯೋ ವೈರಲ್ ಆಗಿದ್ದು,ಈ ಘಟನೆ ಜಮ್ಮು-ಕಾಶ್ಮೀರದ ಸಾಂಬಾ ಜಿಲ್ಲೆಯಲ್ಲಿ ನಡೆದಿದೆ.
ಈ ವಿಡಿಯೋದಲ್ಲಿ ಮಹಿಳೆಯೊಬ್ಬಳು ಬೆಡ್ ಮೇಲೆ ಕುಳಿತು ಯಾರೊಂದಿಗೋ ಜಗಳ ಮಾಡ್ತಿದ್ದಾಳೆ. ಈ ವೇಳೆ ಪುಟ್ಟ ಮಗು ಒಂದೇ ಸಮನೆ ಅಳಲಾರಂಭಿಸಿದೆ. ಮಗು ಸುಮ್ಮನಾಗದೇ ಇದ್ದಾಗ ಸಿಟ್ಟಿಗೆದ್ದ ಮಹಿಳೆ, ಮಗುವಿಗೆ ಹೊಡೆದಿದ್ದಾಳೆ. ಬಲವಾಗಿ ಗುದ್ದಿ, ಹಾಸಿಗೆ ಮೇಲೆ ಎಸೆದಿದ್ದಾಳೆ.ಯಾರೊಬ್ಬ ಮನುಷ್ಯನಿಗೂ ಈ ವಿಡಿಯೋ ನೋಡಿದ ಬಳಿಕ ಕೋಪ ನೆತ್ತಿಗೇರುವುದರಲ್ಲಿ ಒಂದು ಮಾತಿಲ್ಲ.
ಅದೇ ರೀತಿ ಈ ವಿಡಿಯೋದ ಬೆನ್ನು ಹತ್ತಿದ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದಿದ್ದಾರೆ. ಈ ಮಹಿಳೆ ಸಾಂಬಾ ಜಿಲ್ಲೆಯವಳು ಅನ್ನೋದು ಪತ್ತೆಯಾಗಿದೆ. ಆಕೆಯ ವಿರುದ್ಧ ಎಫ್ಐಆರ್ ದಾಖಲಿಸಿಕೊಂಡಿರುವ ಪೊಲೀಸರು, ವಿಚಾರಣೆ ನಡೆಸಿದ್ದಾರೆ. ಅಂದ ಹಾಗೆ ಈ ವಿಡಿಯೋ ಒಂದು ತಿಂಗಳ ಹಿಂದಿನದ್ದಾಗಿದ್ದು, ಈಗ ವೈರಲ್ ಆಗಿದೆ.