ದೇಶದ ದಿನಗೂಲಿ ಕಾರ್ಮಿಕರ ಬಡತನ ನಿರ್ಮೂಲನೆ ಮಾಡಲು ಹಾಗೂ ಬಡವರ ಜೀವನಮಟ್ಟವನ್ನು ಸುಧಾರಿಸಲು ಕೇಂದ್ರ ಸರ್ಕಾರ ಭರ್ಜರಿ ಸಿದ್ಧತೆಯನ್ನು ರೂಪಿಸಿದೆ. ಹೌದು, ಕಾರ್ಮಿಕ ಸಚಿವಾಲಯವು ದಿನಗೂಲಿ ನೌಕರರಿಗೆ ಕನಿಷ್ಠ ವೇತನದ ಬದಲಿಗೆ ಜೀವನ ವೇತನವನ್ನು ನೀಡಲು ಕ್ಷಿಪ್ರ ಯೋಜನೆ ರೂಪಿಸುತ್ತಿದೆ. ಪ್ರಸ್ತುತ ದೇಶದಲ್ಲಿ ಸುಮಾರು 22.89 ಕೋಟಿಯಷ್ಟು ಜನರು ಬಡತನ ರೇಖೆಗಿಂತ ಕೆಳಗಿದ್ದಾರೆ.
ದೇಶದ ಬಡವರಿಗೆ ನೀಡುವ ಭತ್ಯೆಯಲ್ಲಿ ಹೊಸ ಬದಲಾವಣೆಯನ್ನು ತರಲು ಸರ್ಕಾರವು ಹೊರಟಿದೆ. ಈ ಯೋಜನೆಯಿಂದ ಬಡವರ ಜೀವನ ಮಟ್ಟವನ್ನು ಸುಧಾರಿಸಬಹುದು ಅಥವಾ ಮತ್ತೊಂದು ರೀತಿಯಲ್ಲಿ ಹೇಳುವುದಾದರೆ, ದೇಶದಿಂದ ಬಡತನವನ್ನು ನಿರ್ಮೂಲನೆ ಮಾಡಬಹುದು. ಇದಕ್ಕಾಗಿ ಸರ್ಕಾರವು ಹಣದುಬ್ಬರವನ್ನು ಗಮನದಲ್ಲಿಟ್ಟುಕೊಂಡು ಕೆಲ ಬದಲಾವಣೆಗಳನ್ನು ತರುತ್ತಿದೆ.
ಎಕನಾಮಿಕ್ ಟೈಮ್ಸ್‌ನಲ್ಲಿ ಪ್ರಕಟವಾದ ವರದಿಯ ಪ್ರಕಾರ, ದೈನಂದಿನ ಕೂಲಿ ಕಾರ್ಮಿಕರ ಸ್ಥಿತಿಯನ್ನು ಸುಧಾರಿಸಲು ಮತ್ತು 2030 ರ ವೇಳೆಗೆ ಲಕ್ಷಾಂತರ ಕಾರ್ಮಿಕರನ್ನು ತೀವ್ರ ಬಡತನ ಸಮಸ್ಯೆಯಿಂದ ಹೊರತರಲು, ಕಾರ್ಮಿಕ ಸಚಿವಾಲಯವು ಕನಿಷ್ಠ ವೇತನದ ಬದಲಿಗೆ ಜೀವನ ವೇತನವನ್ನು ನೀಡಲು ಯೋಜಿಸುತ್ತಿದೆ. ಕಾರ್ಮಿಕ ಸಚಿವಾಲಯದಲ್ಲಿ ಈ ಯೋಜನೆಗೆ ಕ್ಷಿಪ್ರ ಮಂಥನ ನಡೆಯುತ್ತಿದೆ. ಇದಕ್ಕಾಗಿ ಅಂತರರಾಷ್ಟ್ರೀಯ ಕಾರ್ಮಿಕ ಸಂಸ್ಥೆ (ಐಎಲ್‌ಒ) ಯಿಂದಲೂ ಸಹಾಯವನ್ನು ತೆಗೆದುಕೊಳ್ಳಲಾಗುವುದು ಎನ್ನಲಾಗುತ್ತಿದೆ, ಇದರಿಂದ ಈ ಯೋಜನೆಯನ್ನು ಅಡಿಪಾಯದಿಂದ ಅನುಷ್ಠಾನಗೊಳಿಸಲು ನೆರವಾಗಲಿದೆ ಎಂದು ಅಧಿಕಾರಿಗಳೊಬ್ಬರು ಮಾಹಿತಿ ನೀಡಿದ್ದಾರೆ.
ಕಾರ್ಮಿಕ ಸಚಿವಾಲಯವು ಈ ಯೋಜನೆಯ ಫಲಿತಾಂಶಗಳನ್ನು ಮೌಲ್ಯಮಾಪನ ಮಾಡಿದ ನಂತರ ಅದರ ಪ್ರಯೋಜನಗಳು ಮತ್ತು ಅನಾನುಕೂಲಗಳನ್ನು ತಿಳಿದುಕೊಳ್ಳಲು ವರದಿಯನ್ನು ಸಿದ್ಧಪಡಿಸಲು ತನ್ನ ಅಧಿಕಾರಿಗಳಿಗೆ ಸೂಚಿಸಿದೆ. ಅಷ್ಟೇ ಅಲ್ಲ, ILO ಸದಸ್ಯರು ಈ ಯೋಜನೆಯನ್ನು ತ್ವರಿತವಾಗಿ ಮರುಸ್ಥಾಪಿಸಲು ಜೀವನ ವೇತನವನ್ನು ಅರ್ಥಮಾಡಿಕೊಳ್ಳಲು ವಿಶ್ವಸಂಸ್ಥೆಯ ಸಹಾಯವನ್ನು ಸಹ ಕೋರಿದ್ದಾರೆ.
2024ರಲ್ಲಿ ನಡೆಯಲಿರುವ ಚುನಾವಣೆಗಿಂತ ಮುಂಚಿತವಾಗಿ ಈ ಯೋಜನೆಯನ್ನು ಜಾರಿಗೊಳಿಸಲು ಸರ್ಕಾರ ಬಯಸಿದೆ. ವಾಸ್ತವವಾಗಿ, ಕಾರ್ಮಿಕ ಸಚಿವಾಲಯದ ಜೀವನ ವೇತನವು ಭಾರತಕ್ಕೆ ಗೇಮ್ ಚೆಂಜರ್ ಎಂದು ಸಾಬೀತುಪಡಿಸುತ್ತದೆ ಮತ್ತು ಇದು ದೊಡ್ಡ ರಾಜಕೀಯ ಪರಿಣಾಮವನ್ನು ಸಹ ಬೀರಲಿದೆ ಎಂಬುದು ತಜ್ಞರ ಅಭಿಪ್ರಾಯವಾಗಿದೆ.
ಕಾರ್ಮಿಕರಿಗೆ ಅವರ ಸಣ್ಣ-ಪುಟ್ಟ ಅಗತ್ಯಗಳನ್ನು ಪೂರೈಸಲು ಜೀವನ ವೇತನವನ್ನು ನೀಡಲಾಗುತ್ತದೆ, ಆದರೆ ಕನಿಷ್ಠ ವೇತನವನ್ನು ಕಾನೂನಿನಿಂದ ನಿಗದಿಪಡಿಸಲಾಗಿದೆ, ಅಂದರೆ, ಕೆಲಸಕ್ಕೆ ಬದಲಾಗಿ ಆದಾಯದ ನಿಯಮವಿದೆ. ಪ್ರಸ್ತುತ ಭಾರತದಲ್ಲಿ ಕನಿಷ್ಠ ವೇತನ ರೂ.178 ಆಗಿದೆ ಎಂಬುದು ಇಲ್ಲಿ ಗಮನಾರ್ಹ. ಆದರೆ, ಜೀವನ ವೇತನದಿಂದ ಅದನ್ನು ಬದಲಾಯಿಸಿದರೆ, ಈ ಮೊತ್ತವು ಸುಮಾರು ಶೇ.25 ರಷ್ಟು ಹೆಚ್ಚಾಗಬಹುದು. ಈ ಯೋಜನೆಯಿಂದ ಅನೇಕ ಬಡವರ್ಗದ ಜನರು ಮುಂದುವರಿಯಲು ಸಾಧ್ಯವಾಗುತ್ತದೆ.
