ಮಂಗಳೂರು: ಇನ್ನು ಮಂಗಳೂರು ವಿಶ್ವವಿದ್ಯಾನಿಲಯ ವ್ಯಾಪ್ತಿಯ ಪದವಿ ವಿದ್ಯಾರ್ಥಿಗಳು ಅಂಕಪಟ್ಟಿಗಾಗಿ ತಿಂಗಳುಗಟ್ಟಲೆ ಕಾಯ ಬೇಕಿಲ್ಲ. ಫಲಿತಾಂಶ ಘೋಷಣೆಯಾದ ಕೆಲವೇ ದಿನಗಳಲ್ಲಿ “ಇ -ಅಂಕಪಟ್ಟಿ’ ವಿ.ವಿ.ಯ ವೆಬ್ಸೈಟ್ ಮೂಲಕ ದೊರೆಯಲಿದೆ.
ಇದರಿಂದ ವಿದ್ಯಾರ್ಥಿಗಳ ಶೈಕ್ಷಣಿಕ ಮತ್ತು ಉದ್ಯೋಗ ಅಗತ್ಯಗಳಿಗೆ ಸಹಾಯವಾಗಲಿದೆ. ಫಲಿತಾಂಶ ಘೋಷಣೆ ಯಾದ ತಿಂಗಳೊಳಗೆ ಮೂಲ ಅಂಕಪಟ್ಟಿ ದೊರೆಯಲಿದೆ.
ಸಾಮಾನ್ಯವಾಗಿ ಮೇ ತಿಂಗಳಲ್ಲಿ ಪದವಿ ಪರೀಕ್ಷೆ ನಡೆದು ಜುಲೈ ಒಳಗೆ ಫಲಿತಾಂಶ ಬರುತ್ತಿತ್ತು. ಆದರೆ ಈ ಬಾರಿ ಶೇ. 60ರಷ್ಟು ಪರೀಕ್ಷೆ ಎಪ್ರಿಲ್‌ನಲ್ಲಿ ಪೂರ್ಣಗೊಂಡಿದ್ದರೂ ಬಸ್‌ ಬಂದ್‌, ಚುನಾವಣೆ ಮತ್ತು ಕೊರೊನಾದಿಂದ ಉಳಿದ ಪರೀಕ್ಷೆಗಳು ಬಾಕಿಯಾಗಿದ್ದವು. ಹೀಗಾಗಿ ಬೇರೆ ವಿ.ವಿ., ಕಾಲೇಜುಗಳಿಗೆ ಉನ್ನತ ಶಿಕ್ಷಣಕ್ಕಾಗಿ ದಾಖಲಾಗಲು ವಿದ್ಯಾರ್ಥಿಗಳಿಗೆ ತೊಡಕಾಗಿತ್ತು. ಇದನ್ನು ಮನಗಂಡು ಮಂಗಳೂರು ವಿ.ವಿ. ಇ-ಅಂಕಪಟ್ಟಿ ಒದಗಿಸಲು ತೀರ್ಮಾನಿಸಿದೆ.
ಇಲ್ಲಿಯ ವರೆಗೆ ವಿ.ವಿ. ವೆಬ್‌ ಸೈಟ್‌ನಲ್ಲಿ ಅಂಕ ಪಟ್ಟಿ ಹಾಕಲಾಗುತ್ತಿತ್ತಾದರೂ ಅದು ತಡವಾಗಿ ಅಪ್‌ಲೋಡ್‌ ಆಗುತ್ತಿತ್ತು. ಜತೆಗೆ ವಿ.ವಿ.ಯ ಮಾನ್ಯತೆ ಸಿಗುತ್ತಿರಲಿಲ್ಲ. ಇನ್ನು ಮುಂದೆ ಇದನ್ನು ಶೀಘ್ರವಾಗಿ ಅಪ್‌ಲೋಡ್‌ ಮಾಡಲು ಮತ್ತು ಮಾನ್ಯತೆ ಒದಗಿಸುವುದಕ್ಕಾಗಿ ಹೊಸ ಸಾಫ್ಟ್ವೇರ್‌ನಲ್ಲಿ ಇ -ಅಂಕಪಟ್ಟಿ ಜಾರಿಗೊಳಿಸಲಾಗುತ್ತದೆ.
