ಮರಿಯಾನೆಯನ್ನು ತಾಯಿ ಮಡಿಲಿಗೆ ಸೇರಿಸಿದ ಅರಣ್ಯ ಸಿಬ್ಬಂದಿಗಳು | ಅರಣ್ಯಾಧಿಕಾರಿಗಳನ್ನು ನಂಬಿ ಅವರ ಹಿಂದೆ ಮರಿಯಾನೆ ಪುಟ್ಟ ಪುಟ್ಟ ಹೆಜ್ಜೆ ಹಾಕುತ್ತಿರುವ ವಿಡಿಯೋ ಮನಮುಟ್ಟುವಂತಿದೆ
ತಾಯಿ-ಮಗುವಿನ ಸಂಬಂಧ ತುಂಬಾ ವಿಶೇಷವಾದದ್ದು. ಇದು ಮನುಷ್ಯರಲ್ಲಿ ಮಾತ್ರ ಅಲ್ಲ. ಬಹುತೇಕ ಪ್ರಾಣಿಗಳಲ್ಲಿ ಕೂಡ ಈ ಗುಣ ಕಂಡುಬರುತ್ತದೆ. ಈ ಸಂಬಂಧದ ಭಾವನೆಗಳನ್ನು ತೋರಿಸುವ ಹಲವಾರು ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿರುತ್ತದೆ. ಈಗ ಅಂತಹದೇ ಒಂದು ವಿಡಿಯೋ ನೆಟ್ಟಿಗರ ಮನ ಗೆದ್ದಿದೆ. ಇದರಲ್ಲಿ ಆನೆಯಲ್ಲಿ ಇರುವ ತಾಯಿ- ಮಗುವಿನ ಸಂಬಂಧದ ಗುಣವನ್ನು ನಾವು ನೋಡಬಹುದು. ಈ ವಿಡಿಯೋ ನೋಡಿ ನೆಟ್ಟಿಗರು ಮನದುಂಬಿ ಪ್ರತಿಕ್ರಿಯೆ ನೀಡಿದ್ದಾರೆ.
ಆನೆಮರಿಯೊಂದು ತನ್ನ ತಾಯಿಯಿಂದ ಬೇರ್ಪಟ್ಟ ನೋವಿನಲ್ಲಿ ಇರುತ್ತದೆ. ಅಂತಹ ಕಷ್ಟದ ಸಂದರ್ಭದಲ್ಲಿ ಆನೆ ತನ್ನ ತಾಯಿಗಾಗಿ ಹುಡುಕಾಟ ನಡೆಸುತ್ತಿರುತ್ತದೆ. ಈ ವೇಳೆ, ಅರಣ್ಯ ಅಧಿಕಾರಿಗಳು ಕಾಡಿನಲ್ಲಿ ನಡೆದು ಆನೆ ಮರಿಯನ್ನು ಆನೆಯ ಕುಟುಂಬಕ್ಕೆ ಮತ್ತೆ ಪರಿಚಯಿಸಿ, ಅದರೊಂದಿಗೆ ಸೇರಿಸಿ ಬಿಡುತ್ತಾರೆ. ಮರಿ ಆನೆಯನ್ನು ತಾಯಿ ಬಳಿ ಸೇರಿಸಲು ಅರಣ್ಯ ಅಧಿಕಾರಿಗಳು ಸಹಾಯ ಮಾಡಿದ ವೀಡಿಯೋ ಹೃದಯಸ್ಪರ್ಶಿಯಾಗಿದ್ದು, ಈ ವೀಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿದೆ.
ತಮಿಳುನಾಡಿನ ಅರಣ್ಯದಲ್ಲಿ ಮರಿ ಆನೆಯೊಂದು ಹಳ್ಳಕ್ಕೆ ಬಿದ್ದಿದ್ದು, ಅದನ್ನು ಅರಣ್ಯ ಸಿಬ್ಬಂದಿ ರಕ್ಷಿಸಿದ್ದಾರೆ. ಬಿದ್ದ ಕಾರಣ ಮರಿ ಆನೆಗೆ ಸ್ವಲ್ಪ ಗಾಯವಾಗಿದ್ದು, ಅದಕ್ಕೆ ಚಿಕಿತ್ಸೆಯನ್ನು ನೀಡಲಾಗಿದೆ. ನಂತರ ಅರಣ್ಯ ಅಧಿಕಾರಿಗಳ ತಂಡ ಆ ಮರಿ ಆನೆಗೆ ತಾಯಿಯನ್ನು ಹುಡುಕಲು ಸಹಾಯ ಮಾಡಿದ್ದು, ನಂತರ ತಾಯಿಯ ಜೊತೆಗೆ ಸೇರಿಸಿದ್ದಾರೆ. ಈ ವೀಡಿಯೋ ಮನ ಮುಟ್ಟುವಂತಿದೆ.
ಗಾಯಗೊಂಡಿದ್ದ ಮರಿ!
ಭಾರತೀಯ ಅರಣ್ಯ ಅಧಿಕಾರಿ ಸುಧಾ ರಾಮನ್ ಈ ವೀಡಿಯೋವನ್ನು ಟ್ವಿಟರ್ ನಲ್ಲಿ ಹಂಚಿಕೊಂಡಿದ್ದು, ಈ ಪುಟ್ಟ ಮರಿ ಆನೆಯು ತಮಿಳುನಾಡು Z+ ಅರಣ್ಯ ಅಧಿಕಾರಿಗಳ ತಂಡದ ಜೊತೆಗೆ ಭದ್ರತೆಯೊಂದಿಗೆ ಮತ್ತೆ ತನ್ನ ತಾಯಿಯನ್ನು ಸೇರಿಕೊಳ್ಳಲು ಸಂತೋಷದಿಂದ ನಡೆಯುತ್ತಿದೆ. ಮೊದಲು ಈ ಮರಿ ಏಕಾಂಗಿಯಾಗಿ ಮತ್ತು ಗಾಯಗೊಂಡು ನಮಗೆ ಸಿಕ್ಕಿತು. ಟಿಎನ್ ಅರಣ್ಯ ತಂಡವು ಮರಿಯನ್ನು ರಕ್ಷಿಸಿ, ಚಿಕಿತ್ಸೆ ನೀಡಿ ಮತ್ತು ತಾಯಿಯೊಂದಿಗೆ ಸೇರಲು ಕಾವಲಾಗಿ ನಿಂತಿದೆ ಎಂದು ಬರೆದು ಟ್ವೀಟ್ ಮಾಡಿದ್ದಾರೆ.
200ಕ್ಕೂ ಹೆಚ್ಚು ಬಾರಿ ರೀ ಟ್ವೀಟ್!
ಈ ವೀಡಿಯೋದಲ್ಲಿ ಮರಿ ಆನೆ ಕಾಡಿನಲ್ಲಿ ಅರಣ್ಯ ಅಧಿಕಾರಿಗಳ ಜೊತೆಯಲ್ಲಿ ಜಾಗರೂಕತೆಯಿಂದ ಮತ್ತು ಕಾವಲಿನಲ್ಲಿ ಸುರಕ್ಷಿತವಾಗಿ ನಡೆದುಕೊಂಡು ಹೋಗುತ್ತಿರುವುದನ್ನು ಕಾಣಬಹುದು. ಅರಣ್ಯ ತಂಡದ ಈ ಪ್ರಯತ್ನವನ್ನು ಎಲ್ಲರೂ ಪ್ರಶಂಸಿದ್ದು, ಈ ವೀಡಿಯೋವನ್ನು 200ಕ್ಕೂ ಹೆಚ್ಚು ಬಾರಿ ರೀ ಟ್ವೀಟ್ ಮಾಡಲಾಗಿದೆ
ಸುಂದರವಾದ ದೃಶ್ಯ
ಎಲ್ಲ ಅರಣ್ಯ ಅಧಿಕಾರಿಗಳಿಗೆ ಸಲ್ಯೂಟ್. ನಿಮ್ಮ ಪರಿಶ್ರಮದಿಂದ ಪ್ರಕೃತಿ ಮತ್ತು ಮಾನವೀಯತೆಯನ್ನು ಉಳಿಸುತ್ತಿದ್ದೀರಾ ಎಂದು ವೀಕ್ಷಕರು ಕಾಮೆಂಟ್ ಮಾಡಲಾಗಿದೆ. ಆ ಮರಿ ಆನೆ ಅರಣ್ಯ ತಂಡವನ್ನು ನಂಬಿ ನಡೆದುಕೊಂಡು ಹೋಗುತ್ತಿರುವುದನ್ನು ನೋಡಿದರೆ ವಿಶ್ವದಲ್ಲಿ ಸಕಾರಾತ್ಮಕತೆ ಇದೆ ಎಂದು ನಂಬಬಹುದು ಎಂದು ಕಾಮೆಂಟ್ ಮಾಡಿದ್ದು, ಇದು ಎಂಥಹ ಸುಂದರವಾದ ದೃಶ್ಯ, ಆ ಮರಿ ಆನೆ ಅವರ ಕುಟುಂಬದವರ ಬಳಿ ಸುರಕ್ಷತೆಯಿಂದ ಸೇರಲಿ ಎಂದು ಕಾಮೆಂಟ್ ಮಾಡಿದ್ದಾರೆ.
