ಕ್ಷುಲ್ಲಕ ವಿಚಾರಕ್ಕೆ ತಂಡವೊಂದು ವ್ಯಕ್ತಿಗೆ ಚೂರಿಯಿಂದ ಇರಿದು ಪರಾರಿಯಾದ ಘಟನೆ ಗುರುವಾರ ಸಂಜೆ ಮಂಗಳೂರಿನ ಬಲ್ಮಠ ಮೈದಾನ ಸಮೀಪ ವರದಿಯಾಗಿದೆ.
ಬಲ್ಮಠ ನಿವಾಸಿ ಝಯಾನ್ ರಿಶಾದ್ ಚೂರಿ ಇರಿತಕ್ಕೊಳಗಾದ ವ್ಯಕ್ತಿ ಎಂದು ತಿಳಿದು ಬಂದಿದೆ.
ಝಯಾನ್ ರಿಶಾದ್ ಎಂಬವರು ಸೆ.23ರಂದು ಸಂಜೆ 7 ಗಂಟೆ ಸುಮಾರಿಗೆ ತನ್ನ ಗೆಳೆಯರೊಂದಿಗೆ ಬಲ್ಮಠ ಆರ್ಯ ಸಮಾಜ ರಸ್ತೆಯಲ್ಲಿರುವ ಹೊಟೇಲ್‌ಗೆ ತೆರಳಿದ್ದರು. ಟೇಬಲ್ ನಲ್ಲಿ ಕುಳಿತು ಇನ್ನೊಂದು ಟೇಬಲ್‌ನ ಒಂದು ಖುರ್ಚಿಯನ್ನು ಅಲ್ಲಿರುವ ಗ್ರಾಹಕರ ಬಳಿ ಕೇಳಿ ತೆಗೆದುಕೊಂಡರು. ಈ ವೇಳೆ ಪರಸ್ಪರ ಮಾತಿಗೆ ಮಾತು ಬೆಳೆದು ಹೊಟೇಲ್ ಹೊರಗೆ ಹೊಡೆದಾಟ ನಡೆದಿದೆ ಎನ್ನಲಾಗಿದೆ.
ನಂತರ ಸಂಜೆ 7:30ರ ಹೊತ್ತಿಗೆ ‘ಮಾತನಾಡಿ ಸರಿ ಮಾಡುವಾ ಎಂದು ಬಲ್ಮಠ ಮೈದಾನ ಬಳಿಗೆ ರಿಶಾದ್ ಅವರನ್ನು ಕರೆಸಿದ ತಂಡವು ಅವಾಚ್ಯವಾಗಿ ನಿಂದಿಸಿ, ಚೂರಿಯಿಂದ ಇರಿಸಿದ್ದಾರೆ. ಅಲ್ಲದೆ, ಆರೋಪಿಗಳಿಗೆ ಜೀವ ಬೆದರಿಕೆಯನ್ನೂ ಒಡ್ಡಿದ್ದರು
ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಈ ಬಗ್ಗೆ ಮಂಗಳೂರು ಪೂರ್ವ (ಕದ್ರಿ) ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
