ಫಿನಾಯಿಲ್ ಮಾರುವ ಸೋಗಿನಲ್ಲಿ ಬಂದು ಮೂರ್ಛೆ ತಪ್ಪಿಸಿ, ಚಿನ್ನಾಭರಣ ಕಳ್ಳತನ ಮಾಡುವ ಮಹಿಳೆಯರ ಗುಂಪೊಂದು ಉಡುಪಿ ನಗರದಲ್ಲಿ ಸಕ್ರಿಯವಾಗಿದೆ ಎಂಬ ವದಂತಿ ಇದೀಗ ಹಬ್ಬಿದೆ.
ಈಗಾಗಲೇ ಈ ಫಿನಾಯಿಲ್ ಗ್ಯಾಂಗ್ ತನ್ನ ಕೈ ಚಳಕ ತೋರಿಸಿ ಹಲವು ಕಡೆ ಜನರನ್ನು ಯಾಮಾರಿಸಿ, ಅವರ ಬೆಲೆಬಾಳುವ ವಸ್ತುಗಳನ್ನು ದೋಚಿದೆ ಎಂಬ ಸುದ್ದಿ ಜನರನ್ನು ಬೆಚ್ಚಿಬೀಳಿಸಿದೆ.
ಫಿನಾಯಿಲ್ ಮಾರಾಟ ಮಾಡಲು ಬರುವ ಈ ಮಹಿಳೆಯರ ಗ್ಯಾಂಗ್ ನಲ್ಲಿ ಐದರಿಂದ ಆರು ಮಂದಿ ಸದಸ್ಯರಿದ್ದು, ಆಯ್ದ ಮನೆಗಳಿಗೆ ತೆರಳುವ ಈ ತಂಡ ಫಿನಾಯಿಲ್ ಮಾರಾಟ ಮಾಡುವವರಂತೆ ನಟಿಸುತ್ತದೆ.
ತಮ್ಮಲ್ಲಿ ವಿವಿಧ ನಮೂನೆಯ ಫಿನಾಯಿಲ್ ಇದೆ ಎಂದು ನಟಿಸುತ್ತಾ ಬಾಟಲಿಯಲ್ಲಿರುವ ಫಿನಾಯಿಲ್ನ ವಾಸನೆ ತೋರಿಸುವ ನೆಪದಲ್ಲಿ ಮನೆಯವರಿಗೆ ತಮ್ಮ ದ್ರಾವಣ ಇರುವ ಬಾಟಲಿಯನ್ನು ಮೂಸುವಂತೆ ಪ್ರೇರೇಪಿಸುತ್ತಾರೆ.
ಈ ಬಾಟಲಿಯ ಪರಿಮಳ ಗ್ರಹಿಸುತ್ತಿದ್ದಂತೆ ಮನೆಯಲ್ಲಿದ್ದವರು ಮೂರ್ಛೆ ಹೋಗುತ್ತಾರೆ. ಈ ಸಂದರ್ಭ ಬಳಸಿಕೊಂಡು ತಂಡ ಮನೆಯಲ್ಲಿರುವ ಚಿನ್ನದ ಆಭರಣಗಳನ್ನು ದೋಚಿ ಪರಾರಿಯಾಗುತ್ತದೆ ಎಂಬ ಮಾಹಿತಿ ಲಭ್ಯವಾಗಿದೆ.
