ಗುರುವಾಯನಕೆರೆ: ದಕ್ಷಿಣ ಕನ್ನಡ ರೂರಲ್ ಡೆವಲಪ್ಮೆಂಟ್ ಸೊಸೈಟಿ (ರಿ) ಬೆಳ್ತಂಗಡಿ ಹಾಗೂ ಕಾರಿತಾಸ್ ಇಂಡಿಯಾ ನವದೆಹಲಿ ಸಹಭಾಗಿತ್ವದಲ್ಲಿ ಇಂದು ಗುರುವಾಯನಕೆರೆಯಲ್ಲಿ ಸ್ಪರ್ಶ ಕ್ಯಾನ್ಸರ್ ಅರಿವು ಅಭಿಯಾನ ನಡೆಯಿತು.
ʼಕ್ಯಾನ್ಸರ್ʼ ರೋಗ ಇದರ ಕುರಿತು ಸಣ್ಣ ಮಾಹಿತಿಯನ್ನು ಇಲ್ಲಿ ನೀಡಲಾಗಿದೆ.
ಪ್ರತೀ ವರ್ಷ ಫೆಬ್ರವರಿ 4 ರಂದು ವಿಶ್ವ ಕ್ಯಾನ್ಸರ್ ದಿನವನ್ನು ಆಚರಣೆ ಮಾಡುತ್ತೇವೆ. ಇಂದು ಕ್ಯಾನ್ಸರ್ ರೋಗ ಅತೀ ಹೆಚ್ಚು ಜನರನ್ನು ಕಾಡು ರೋಗವಾಗಿ ಪರಿಣಮಿಸಿದೆ. ಸಣ್ಣ ವಯಸ್ಸಿನಿಂದ ಹಿಡಿದು ವಯೋವೃದ್ಧರವರೆಗೆ ಬಡವ ಶ್ರೀಮಂತ ಮೇಲು-ಕೀಳು ಎಂಬ ಬೇಧವಿಲ್ಲದೇ ಎಲ್ಲರನ್ನು ಈ ರೋಗ ಬಲಿಪಶುವಾಗಿಸುತ್ತಿವೆ. ಜಗತ್ತಿನ ಒಟ್ಟು ಜನಸಂಖ್ಯೆಯಲ್ಲಿ 17 ಮಿಲಿಯನ್ ಜನರು ಇಂದು ಅರ್ಬುದ ರೋಗದಿಂದ ಬಳಲುತ್ತಿದ್ದಾರೆ ಎಂಬುದಾಗಿ ಒಂದು ಸಮೀಕ್ಷೆ ಹೇಳುತ್ತಿದೆ. ಭಾರತದಲ್ಲಿ ಒಂದು ಸಾವಿರ ಮಂದಿಯಲ್ಲಿ ಒಬ್ಬರಿಗೆ ಅಂದರೆ ಸಾಧಾರಣ 19 ಮಿಲಿಯನ್ ಮಂದಿಗೆ ಕ್ಯಾನ್ಸರ್ ಇದೆ ಎಂಬ ಸತ್ಯವನ್ನು ನಾವು ಒಪ್ಪಿಕೊಳ್ಳಬೇಕು.
“ಕ್ಯಾನ್ಸರ್’ ಎಂಬುದು ನಮ್ಮ ದೇಹದ ಜೀವಕೋಶದಲ್ಲಿ ಪ್ರಾರಂಭವಾಗುವ ಒಂದು ಅಥವಾ ಅದಕ್ಕೆ ಸಂಬಂಧಿಸಿದ ಅನೇಕ ರೋಗಗಳ ಗುಂಪು. ಎಲ್ಲರ ದೇಹದಲ್ಲೂ ಕೆಲವು ಕ್ಯಾನ್ಸರ್ ಕೋಶಗಳಿರುತ್ತವೆ. ಯಾವಾಗ ನಮ್ಮ ದೇಹದ ಒಂದು ಭಾಗ ದುರ್ಬಲ ಆಗುತ್ತದೋ ಆಗ ಕ್ಯಾನ್ಸರ್ ಕೋಶಗಳು ದಾಳಿ ಮಾಡಿ ಈ ರೋಗ ಬರುತ್ತದೆ. ಕ್ಯಾನ್ಸರ್ ಕಾಯಿಲೆಯು ಒಬ್ಬರಿಂದ ಇನ್ನೊಬ್ಬರಿಗೆ ಹರಡುವುದಿಲ್ಲ. ಯಾವುದಾದರೂ ಅಂಗದ ಜೀವಕೋಶಗಳು ಅಥವಾ ಕಣಗಳು ಮಿತಿ ಮೀರಿ ಬೆಳೆದರೆ ಅದು ಅನಗತ್ಯವಾದ ಗಡ್ಡೆಯಾಗಿ ಬೆಳೆಯುತ್ತದೆ.ಇದು ಎಲ್ಲಿ ಬೆಳೆದಿದೆಯೋ ಅದರ ಕ್ಯಾನ್ಸರ್ ಎಂದು ಗುರುತಿಸಲ್ಪಡುತ್ತದೆ.
ಶ್ವಾಸಕೋಶದ ಕ್ಯಾನ್ಸರ್, ರಕ್ತದ ಕ್ಯಾನ್ಸರ್, ಸ್ತನದ ಕ್ಯಾನ್ಸರ್, ಗರ್ಭಕಂಠ ಹಾಗೂ ಕರುಳಿನ ಕ್ಯಾನ್ಸರ್ ಇಂದು ಹೆಚ್ಚು ಕಾಣಸಿಗುತ್ತವೆ. ಪುರುಷರಲ್ಲಿ ಬಾಯಿ ಮತ್ತು ಶ್ವಾಸಕೋಶದ ಕ್ಯಾನ್ಸರ್ ಸಾಮಾನ್ಯವಾಗಿ ಕಂಡು ಬಂದರೆ ಮಹಿಳೆಯರಲ್ಲಿ ಸ್ತನ ಮತ್ತು ಗರ್ಭಕೊರಳಿನ ಕ್ಯಾನ್ಸರ್ ಸಾಮಾನ್ಯವಾಗಿ ಕಂಡುಬರುತ್ತದೆ. 40% ಕ್ಯಾನ್ಸರನ್ನು ಗುಣಪಡಿಸಬಹುದು ಹಾಗೂ 80% ಕ್ಯಾನ್ಸರ್ ಬಂದ ಮೊದಲ ಹಂತದಲ್ಲಿಯೇ ಗುರುತಿಸುವುದರಿಂದ ಗುಣಪಡಿಸಬಹುದಾಗಿದೆ. ಕುಟುಂಬದಲ್ಲಿ ಯಾರಿಗಾದರೂ ಕ್ಯಾನ್ಸರ್ ಇತಿಹಾಸವಿದ್ದಲ್ಲಿ ಇತರೆ ಸದಸ್ಯರಿಗೆ ಕ್ಯಾನ್ಸರ್ ರೋಗ ಬರುವ ಸಾಧ್ಯತೆಗಳು ಹೆಚ್ಚಿರುತ್ತವೆ. ಆದರೆ ಇದರ ಪ್ರಮಾಣ ಗರಿಷ್ಠ 10% ಮಾತ್ರ
ಕ್ಯಾನ್ಸರ್ನಲ್ಲಿ ಮೊದಲ, ದ್ವಿತೀಯ, ತೃತೀಯ ಹಾಗೂ ಕೊನೆಯ ಹಂತಗಳಿವೆ. ಮೊದಲ ಹಂತದಲ್ಲಿ ಕ್ಯಾನ್ಸರ್ ಗುರುತಿಸಿದಾಗ ಸರಳ ಚಿಕಿತ್ಸೆಯ ಮೂಲಕ ಈ ರೋಗವನ್ನು ಗುಣಪಡಿಸಬಹುದು. ಆದರೆ ಅತೀ ದುರದೃಷ್ಟಕರ ಸಂಗತಿ ಎಂದರೆ ಯಾವುದೇ ರೋಗವು ‘ಕ್ಯಾನ್ಸರ್’ ಎಂದು ಗುರುತಿಸುವುದು ಕೊನೆಯ ಹಂತದಲ್ಲಿ, ಆಗ ಎಷ್ಟು ಚಿಕಿತ್ಸೆ ಕೊಟ್ಟರೂ ಕಮ್ಮಿಯೇ ಹಾಗೂ ಚಿಕಿತ್ಸೆ ಕೂಡ ತುಂಬಾ ಪ್ರಬಲವಾಗಿರಬೇಕು. ಭಾರತದಲ್ಲಿ ಕ್ಯಾನ್ಸರ್ ಮರಣ ಪ್ರಮಾಣವು 68% ರಷ್ಟು ಎಂದು ಅಂದಾಜಿಸಲಾಗಿದ್ದು ಇದು ಇತರ ದೇಶಗಳಿಗೆ ಹೋಲಿಸಿದರೆ ವಿಪರೀತ ಎನಿಸುವಷ್ಟು ಹೆಚ್ಚಾಗಿದೆ.
ಕ್ಯಾನ್ಸರ್ ಕಾರಣಗಳೇನು ?
1. ತಂಬಾಕು/ ಮಾದಕ ವಸ್ತುಗಳ ಸೇವನೆ ಮತ್ತು ಧೂಮಪಾನ
2. ಕ್ರಿಮಿನಾಶಕಯುಕ್ತ/ ರಾಸಾಯನಿಕಯುಕ್ತ ತರಕಾರಿಗಳ ಸೇವನೆ
3. ಅವೈಜ್ಞಾನಿಕ ಜೀವನ ಶೈಲಿ
4. ಕಾರ್ಖಾನೆಗಳಿಂದ ಬಿಡುಗಡೆಯಾಗುವ ವಿಷಕಾರಿ ಹೊಗೆ
5. ಪ್ಲಾಸ್ಟಿಕ್ (Dioxins) ಹಾಗೂ ಇತರ ಹಾನಿಕಾರಕ ವಸ್ತುಗಳನ್ನು ಉರಿಸುವಿಕೆಯಿಂದ.
