ಇತ್ತೀಚಿಗಷ್ಟೇ ಎಂಗೇಜ್ಮೆಂಟ್ ಮಾಡಿಕೊಂಡ ತನ್ನ ಭಾವಿ ಪತ್ನಿಯ ಜೊತೆ, ನಿನ್ನ ನೋಡಿದ್ರೆ ನನಗೆ ಮೂಡ್ ಬರಲ್ಲ. ನನಗೆ ಇದಾಗಲೇ ನಾಲ್ವರು ಗರ್ಲ್ಫ್ರೆಂಡ್ಸ್ ಇದ್ದು, ಅವರೇ ಬೆಸ್ಟ್ ಎಂದು ಆಕೆಯ ಭಾವಿ ಪತಿ, ಬೆಂಗಳೂರಿನ ಐಟಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದ ಉದ್ಯೋಗಿ ಶಹಜಹಾನ್ ಹೇಳಿದ್ದರಿಂದ ನೊಂದು ಯುವತಿ ಸಾವಿಗೆ ಶರಣಾಗಿರುವ ಶಾಕಿಂಗ್ ಘಟನೆ ನಡೆದಿದೆ.
ಆಂಧ್ರಪ್ರದೇಶದ ವೈಎಸ್ಆರ್ ಕಡಪ ಜಿಲ್ಲೆಯಲ್ಲಿ 26 ವರ್ಷದ ರೆಹಾನಾ ಎಂಬ ನಿಶ್ಚಿತಾರ್ಥ ಆಗಿದ್ದ ಯುವತಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇನ್ನೇನು ಮದುವೆಗೆ ಕೆಲವೇ ತಿಂಗಳು ಬಾಕಿ ಇದ್ದವು. ಈ ನಡುವೆಯೇ ಈ ಘೋರ ದುರಂತ ನಡೆದು ಬಿಟ್ಟಿದೆ.
ಆಂಧ್ರಪ್ರದೇಶದವರಾದ ಶೆಹಜಹಾನ್ ಮತ್ತು ರೆಹಾನಾ ಎಂಗೇಜ್ಮೆಂಟ್ ಕಳೆದ ಫೆಬ್ರುವರಿ 15ರಂದು ನಡೆದಿತ್ತು. ಕಡಪ ನಿವಾಸಿ ರೆಹಾನಾ ತನ್ನ ಎಂ.ಎಸ್ಸಿ ಮುಗಿಸಿದ್ದರು. ಪ್ರೊದ್ದತ್ತೂರಿನ ನಿವಾಸಿ ಶಹಜಹಾನ್ ಜೊತೆ ನಿಶ್ಚಿತಾರ್ಥ ಮಾಡಿಕೊಂಡಿದ್ದರು. ಶಹಜಹಾನ್ ಬೆಂಗಳೂರಿನ ಐಟಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಎಂಗೇಜ್ಮೆಂಟ್ ಆದಕಾರಣ ಇಬ್ಬರು ಕೂಡ ಫೋನ್ ಮಾಡುತ್ತಾ, ಮೆಸೇಜ್ ಮಾಡುತ್ತಾ ಸಂತೋಷದಿಂದ ಇದ್ದರು.
ಇನ್ನೇನು ಮದುವೆ ಹತ್ತಿರ ಬರುತ್ತಿರುವಾಗಲೇ ಶಹಜಹಾನ್ಗೆ ಭಾವಿ ಪತ್ನಿ ಬೋರ್ ಆಗ ತೊಡಗಿದರು. ಹೀಗಾಗಿ ನಿನ್ನನ್ನು ಇಷ್ಟಪಡುವುದಿಲ್ಲ, ನಿನ್ನ ನೋಡಿದ್ರೆ ಯಾವುದೇ ಭಾವನೆ ಬರಲ್ಲ. ನನಗೆ ಬಹು ಸಂಬಂಧಗಳಿವೆ ಮತ್ತು ನಾಲ್ಕು ಗರ್ಲ್ ಫ್ರೆಂಡ್ಸ್ ಇದ್ದಾರೆ ಎಂದಿದ್ದಾನೆ. ಆರಂಭದಲ್ಲಿ, ರೆಹಾನಾ ಅವನ ಹೇಳಿಕೆಗಳನ್ನು ಕೇವಲ ತಮಾಷೆ ಎಂದು ಭಾವಿಸಿ ತಳ್ಳಿಹಾಕಿದರು. ಆದಾಗ್ಯೂ, ಅವನು ಪದೇ ಪದೇ ಅದೇ ಮಾತನ್ನು ಹೇಳಿದಾಗ, ಆಕೆ ಖಿನ್ನತೆಗೆ ಒಳಗಾಗಿದ್ದರು.
ಭಾವೀ ಗಂಡನಿಂದ ಇಂತಹ ಮಾತುಗಳನ್ನು ಕೇಳಿದ ಯುವತಿ ಚಿನ್ನ ಚೌಕ್ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿರುವ ತನ್ನ ಮನೆಯಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾಳೆ. ರೆಹಾನಾ ಎನ್ನುವ ಯುವತಿ ಇನ್ನೇನು ದಾಂಪತ್ಯ ಜೀವನಕ್ಕೆ ಕಾಲಿಡುವ ಮೊದಲೇ ಸಾವನ್ನಪ್ಪಿದ್ದಾರೆ. ಪ್ರಕರಣದ ತನಿಖೆಯನ್ನು ಪೊಲೀಸರು ಆರಂಭಿಸಿದ್ದಾರೆ.