Cooking Oil: ಮಧ್ಯ ಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧವು ಭಾರತದಲ್ಲಿ ಅನೇಕ ಅಗತ್ಯ ವಸ್ತುಗಳ ಮೇಲೆ ಪರಿಣಾಮ ಬೀರಿದೆ. ಈಗಾಗಲೇ ಅಡಿಗೆ ಅನಿಲದ ಅಭಾವ ಉಂಟಾಗಿದ್ದು ದರ ಕೂಡ ಏರಿಕೆಯಾಗಿದೆ. ಇದರೊಂದಿಗೆ ಪೆಟ್ರೋಲ್ ಡೀಸೆಲ್ ನ ಕೊರತೆಯು ಉಂಟಾಗಬಹುದು ಎನ್ನಲಾಗುತ್ತಿದೆ. ಈ ನಡುವೆ ಅಡುಗೆ ಎಣ್ಣೆಯ ದರ 11 ರೂಪಾಯಿ ಹೆಚ್ಚಳವಾಗಿ ಜನಸಾಮಾನ್ಯರಿಗೆ ಶಾಕ್ ನೀಡಿದೆ.
ಹೌದು, ಕೆಲವು ದಿನಗಳ ಹಿಂದಷ್ಟೇ ಗೃಹಬಳಕೆಯ LPG ಸಿಲಿಂಡರ್ ದರ 60 ಏರಿಕೆಯಾಗಿತ್ತು. ಇದರ ಹೊಡೆತವನ್ನು ತಡೆದುಕೊಳ್ಳುವಾಗಲೇ ಜನಸಾಮಾನ್ಯರಿಗೆ ಅಡುಗೆ ಎಣ್ಣೆಯ ದರ ಏರಿಕೆಯ ಬಿಸಿಯೂ ಕೂಡ ತಟ್ಟಿದೆ. ಅಡುಗೆ ಎಣ್ಣೆಯ ಪ್ರತಿ ಲೀಟರ್ ಗೆ 11 ರೂಪಾಯಿ ಏರಿಕೆಯಾಗಿದೆ.
ಬೆಲೆ ವ್ಯತ್ಯಾಸದ ವಿವರ:
ಸನ್ಫ್ಲವರ್ ಆಯಿಲ್: ಮಾರ್ಚ್ ಮೊದಲ ವಾರದಲ್ಲಿ ₹165 ಇದ್ದ ಬೆಲೆ, ಮಾರ್ಚ್ 12ರ ವೇಳೆಗೆ ₹172ಕ್ಕೆ ಏರಿಕೆಯಾಗಿದೆ.
ಗೋಲ್ಡ್ ವಿನ್ನರ್: ಹೋಲ್ಸೇಲ್ ಮಾರುಕಟ್ಟೆಯಲ್ಲಿ ₹159 ರಿಂದ ₹166ಕ್ಕೆ ಏರಿದೆ.
ಫ್ರೀಡಂ ಆಯಿಲ್: ₹158 ರಿಂದ ₹166ಕ್ಕೆ ತಲುಪಿದೆ.
ಆನ್ಲೈನ್ ಆಪ್ಗಳಲ್ಲಿ ದುಬಾರಿ:
ಹೋಲ್ಸೇಲ್ ದರಕ್ಕಿಂತ ಆನ್ಲೈನ್ ಶಾಪಿಂಗ್ ಆಪ್ಗಳಲ್ಲಿ ಬೆಲೆ ಇನ್ನು ಹೆಚ್ಚಿದೆ. ಇಲ್ಲಿ ಸನ್ಫ್ಲವರ್ ಆಯಿಲ್ ಬೆಲೆ ಪ್ರತಿ ಲೀಟರ್ಗೆ ₹160 ರಿಂದ ₹171ರವರೆಗೆ ಏರಿಕೆಯಾಗಿದ್ದು, ಜನರಿಗೆ ಹೆಚ್ಚಿನ ಹೊರೆಯಾಗುತ್ತಿದೆ.
ಮಾಹಿತಿಗಳ ಪ್ರಕಾರ ಮಾರುಕಟ್ಟೆಯಲ್ಲಿ ಅಡುಗೆ ಎಣ್ಣೆಯ ಬೇಡಿಕೆಗೆ ತಕ್ಕಷ್ಟು ಪೂರೈಕೆಯಾಗುತ್ತಿಲ್ಲ. ವ್ಯಾಪಾರಿಗಳು 100 ರಿಂದ 200 ಬಾಕ್ಸ್ ಗಳಿಗೆ ಆರ್ಡರ್ ಮಾಡಿದರೆ, ಪೂರೈಕೆದಾರರು ಕೇವಲ 20 ರಿಂದ 50 ಬಾಕ್ಸ್ಗಳನ್ನು ಮಾತ್ರ ಕಳುಹಿಸುತ್ತಿದ್ದಾರೆ. ಇದರಿಂದಾಗಿ ಮಾರುಕಟ್ಟೆಯಲ್ಲಿ ಕೃತಕ ಅಭಾವ ಸೃಷ್ಟಿಯಾಗುವ ಭೀತಿಯೂ ಎದುರಾಗಿದೆ.