Rapido: ಬದುಕು ಕೆಲವೊಮ್ಮೆ ಯಾವೆಲ್ಲ ತಿರುವುಗಳನ್ನು ಪಡೆದುಕೊಳ್ಳುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ. ಇದೀಗ ಅಂತದ್ದೇ ಒಂದು ಘಟನೆ ನಡೆದಿದ್ದು, ಅವಸರದಲ್ಲಿ ರಾಪಿಡೋ (Rapido) ಬುಕ್ ಮಾಡಿದ ವ್ಯಕ್ತಿಗೆ, ತನ್ನ ಶಾಲಾ ದಿನಗಳ ‘ಕ್ಲಾಸ್ ಟಾಪರ್’ ರೈಡರ್ ಆಗಿ ಸಿಕ್ಕಿದ ಪ್ರಕರಣ ಈಗ ಎಲ್ಲರ ಕಣ್ಣನ್ನು ಒದ್ದೆಗೊಳಿಸಿದೆ.
ಉಮರ್ ಎಂಬ ಯುವಕ ತಡವಾಗುತ್ತಿದೆ ಎಂಬ ಕಾರಣಕ್ಕೆ ಆತುರದಲ್ಲಿ ರಾಪಿಡೋ ಬೈಕ್ ಬುಕ್ ಮಾಡಿದ್ದನು. ಬುಕ್ಕಿಂಗ್ ವಿವರಗಳಲ್ಲಿ ರೈಡರ್ ಹೆಸರು ‘ಚಂದನ್’ ಎಂದು ಕಂಡಾಗ ಉಮರ್ ಗೆ ತನ್ನ ಶಾಲೆಯಲ್ಲಿ ಸದಾ ಮೊದಲ ಸ್ಥಾನದಲ್ಲಿರುತ್ತಿದ್ದ ಚಂದನ್ ಇವನೇ ಇರಬಹುದೇ ಎಂಬ ಕುತೂಹಲ ಮೂಡಿದೆ. ಆಗ ಬೈಕ್ ಹತ್ತಿರ ಬಂದಾಗ ಉಮರ್ ಗೆ ಅಚ್ಚರಿ ಕಾಯುತ್ತಿತ್ತು. ಅದು ನಿಜಕ್ಕೂ ಅದೇ ಚಂದನ್ ಆಗಿದ್ದನು.
ಆಶ್ಚರ್ಯ, ದುಃಖ ಎಲ್ಲವೂ ಒಮ್ಮೆಲೆ ಬಂದ ಉಮರ್ ಅದನ್ನು ತೋರ್ಪಡಿಸದೆ ಬೈಕ್ ಏರುತ್ತಿದ್ದಂತೆ ತಮಾಷೆಯಾಗಿ “ಹೇ ರಾಪಿಡೋ ಭಯ್ಯಾ!” ಎಂದು ಕರೆದಾಗ, ಚಂದನ್ ನಗುತ್ತಲೇ “ಮೊದಲು ಒಟಿಪಿ (OTP) ಹೇಳು” ಎಂದು ಹೇಳಿದ್ದಾನೆ. ಅಲ್ಲದೆ “ನೀನು ಯಾವಾಗ ಈ ಕೆಲಸ ಆರಂಭಿಸಿದೆ?” ಎಂದು ಕೇಳಿದಾಗ, ಚಂದನ್ “ಜೀವನ ನಾವು ಅಂದುಕೊಂಡಂತೆ ನಡೆಯುವುದಿಲ್ಲ, ಆದರೆ ನಾನು ಚೆನ್ನಾಗಿದ್ದೇನೆ. ಹಳೆಯ ಗೆಳೆಯನಿಂದ ನಾನು ಹಣ ಪಡೆಯುವುದಿಲ್ಲ” ಎಂದು ಹಾಸ್ಯ ಚಟಾಕಿ ಹಾರಿಸಿದ್ದಾನೆ.
ಒಂದಾನೊಂದು ಕಾಲದಲ್ಲಿ ಇಡೀ ಕ್ಲಾಸ್ಗೆ ಟಾಪರ್ ಆಗಿದ್ದ ವಿದ್ಯಾರ್ಥಿ ಇಂದು ಬೈಕ್ ರೈಡರ್ ಆಗಿರುವುದನ್ನು ಕಂಡು ಉಮರ್ ಭಾವುಕನಾಗಿದ್ದಾನೆ. ಇದಕ್ಕೆ ಪ್ರತಿಕ್ರಿಯಿಸಿದ ಚಂದನ್, “ಬದುಕು ಅನಿರೀಕ್ಷಿತ, ನನ್ನ ಕ್ಲಾಸ್ಮೇಟ್ ನನ್ನ ಗ್ರಾಹಕನಾಗಿ ಸಿಗುತ್ತಾನೆ ಎಂದು ನಾನು ಎಂದು ಊಹಿಸಿರಲಿಲ್ಲ” ಎಂದು ಬದುಕಿನ ಏರಿಳಿತಗಳನ್ನು ಮೆಲುಕು ಹಾಕಿದ್ದಾನೆ.
