Tik talker: ಅಮೆರಿಕದಲ್ಲಿ ಗರಿಷ್ಠ ಫಾಲೋವರ್ಸ್‌ ಹೊಂದಿರುವ ಟಿಕ್‌ಟಾಕರ್ ಖಾಬಿ ಲೇಮ್ ಬಂಧನ 

Tik talker: ಸಾಮಾಜಿಕ ಮಾಧ್ಯಮದ ವ್ಯಕ್ತಿತ್ವ ಮತ್ತು ಅತಿ ಹೆಚ್ಚು ಫಾಲೋವರ್‌ಗಳನ್ನು ಹೊಂದಿರುವ ಟಿಕ್‌ಟಾಕರ್ ಖಾಬಿ ಲೇಮ್ ಅವರನ್ನು ಕಳೆದ ಶುಕ್ರವಾರ ನೆವಾಡಾದಲ್ಲಿ ಅಮೆರಿಕದ ವಲಸೆ ಮತ್ತು ಕಸ್ಟಮ್ಸ್ ಜಾರಿ ಇಲಾಖೆಯು ವೀಸಾ ಅವಧಿ ಮುಗಿದ ನಂತರವೂ ಅಲ್ಲಿಯೇ ಉಳಿದುಕೊಂಡಿದ್ದಕ್ಕಾಗಿ ಬಂಧಿಸಿತ್ತು. ಸ್ವಯಂಪ್ರೇರಿತ ನಿರ್ಗಮನ ಆದೇಶ ಹೊರಡಿಸಿದ ನಂತರ ಅದೇ ದಿನ ಅವರನ್ನು ಬಿಡುಗಡೆ ಮಾಡಲಾಯಿತು. ಅಂದಿನಿಂದ ಲೇಮ್ ಅಮೆರಿಕವನ್ನು ತೊರೆದಿದ್ದಾರೆ ಎಂದು ವಲಸೆ ಮತ್ತು ಕಸ್ಟಮ್ಸ್ ಜಾರಿ ಇಲಾಖೆ ತಿಳಿಸಿದೆ.

ಸಂಸ್ಥೆ ಮತ್ತಷ್ಟು ಹೇಳುವಂತೆ, “ಲೇಮ್ ಏಪ್ರಿಲ್ 30 ರಂದು ಯುನೈಟೆಡ್ ಸ್ಟೇಟ್ಸ್‌ಗೆ ಪ್ರವೇಶಿಸಿದರು ಮತ್ತು ಆದರೆ ಅವರ ವೀಸಾದ ಅವಧಿ ಮೀರಿತ್ತು. ರಾಜಕೀಯ ಕಾರ್ಯಕರ್ತ ಬೊ ಲೌಡನ್ ಅವರು X ನಲ್ಲಿ ಈ ಬಗ್ಗೆ ಪೋಸ್ಟ್ ಮಾಡಿದ ನಂತರ ಈ ಘಟನೆ ಬೆಳಕಿಗೆ ಬಂದಿದೆ, ಲೇಮ್ ಅವರನ್ನು ಲಾಸ್ ವೇಗಾಸ್‌ನಲ್ಲಿ ಬಂಧಿಸಲಾಗಿದೆ ಮತ್ತು ಹೆಂಡರ್ಸನ್ ಬಂಧನ ಕೇಂದ್ರದಲ್ಲಿ ಇರಿಸಲಾಗಿದೆ ಎಂದು ಹೇಳಿಕೊಂಡರು. ಲೇಮ್ ಅವರನ್ನು “ಅಕ್ರಮ ವಿದೇಶಿಗ” ಎಂದು ಉಲ್ಲೇಖಿಸುತ್ತಾ ಲೌಡನ್, ಅಧಿಕಾರಿಗಳಿಗೆ ಎಚ್ಚರಿಕೆ ನೀಡುವಲ್ಲಿ ಅವರ ಪಾತ್ರವಿದೆ ಎಂದು ಆರೋಪಿಸಿದರು.

“ಅಮಾನ್ಯ ವೀಸಾ ಅವಧಿ ಮೀರಿ ಉಳಿದುಕೊಂಡಿದ್ದ, ತೆರಿಗೆಗಳನ್ನು ತಪ್ಪಿಸಿದ್ದ ಅವರು ಅಕ್ರಮ ಎಸಗಿದ್ದಾರೆ ಮತ್ತು ನಾನು ವೈಯಕ್ತಿಕವಾಗಿ ಅವರನ್ನು ಗಡೀಪಾರು ಮಾಡಲು ಕ್ರಮ ಕೈಗೊಂಡೆ” ಎಂದು ಲೌಡನ್ ತಮ್ಮ ಪೋಸ್ಟ್‌ನಲ್ಲಿ ಬರೆದಿದ್ದಾರೆ. “ಇದನ್ನು ಸಾಧ್ಯವಾಗಿಸಲು ಅಧ್ಯಕ್ಷ ಟ್ರಂಪ್ ಅವರ DHS ನಲ್ಲಿರುವ ದೇಶಭಕ್ತರೊಂದಿಗೆ” ಸಹಕರಿಸಿದ್ದೇನೆ ಎಂದು ಲೌಡನ್ ಹೇಳಿಕೊಂಡಿದ್ದಾರೆ.

ಖಾಬಿ ಲೇಮ್ ಯಾರು?

ಸೆನೆಗಲ್‌ನಲ್ಲಿ ಜನಿಸಿದ ಖಾಬಿ ಲೇಮ್, ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಟಿಕ್‌ಟಾಕ್ ಮತ್ತು ಇನ್‌ಸ್ಟಾಗ್ರಾಮ್‌ನಲ್ಲಿ ತಮ್ಮ ಮಾತಿಲ್ಲದ, ವ್ಯಂಗ್ಯಾತ್ಮಕ ಪ್ರತಿಕ್ರಿಯೆ ವೀಡಿಯೊಗಳ ಮೂಲಕ ಜಾಗತಿಕ ಖ್ಯಾತಿ ಗಳಿಸಿದರು. ಇಟಾಲಿಯನ್ ಪ್ರಜೆ ಟಿಕ್‌ಟಾಕ್‌ನಲ್ಲಿ 162 ಮಿಲಿಯನ್‌ಗಿಂತಲೂ ಹೆಚ್ಚು ಮತ್ತು ಇನ್‌ಸ್ಟಾಗ್ರಾಮ್‌ನಲ್ಲಿ 80 ಮಿಲಿಯನ್‌ಗಿಂತಲೂ ಹೆಚ್ಚು ಅನುಯಾಯಿಗಳನ್ನು ಹೊಂದಿದ್ದಾರೆ. ಹೆಚ್ಚುವರಿಯಾಗಿ, ಅವರು ಫೋರ್ಬ್ಸ್‌ನ 30 ಅಂಡರ್ 30 ಮತ್ತು ಫಾರ್ಚೂನ್‌ನ 40 ಅಂಡರ್ 40 ನಂತಹ ಪ್ರಸಿದ್ಧ ವೇದಿಕೆಗಳಿಂದ ಮನ್ನಣೆ ಗಳಿಸಿದ್ದಾರೆ. ತಮ್ಮ ವೀಡಿಯೊಗಳಲ್ಲಿ, ಲೇಮ್ ವೈರಲ್ “ಲೈಫ್ ಹ್ಯಾಕ್‌ಗಳನ್ನು” ಅಣಕಿಸಲು ಮತ್ತು ಸರಳಗೊಳಿಸಲು ಅಭಿವ್ಯಕ್ತಿಶೀಲ ಪ್ರತಿಕ್ರಿಯೆಗಳನ್ನು ಬಳಸುತ್ತಾರೆ.