Internet: ಭಾರತಕ್ಕೆ ಬಂದೇ ಬಿಟ್ಟ ಸ್ಟಾರ್‌ಲಿಂಕ್‌: ಏನಿದರ ಬೆಲೆ, ಈ ಇಂಟರ್ ನೆಟ್ ಯಾಕಿಷ್ಟು ಸ್ಪೀಡ್‌?

Internet: ನವದೆಹಲಿ: ವಿಶ್ವದ ನಂಬರ್ ಒನ್ ಶ್ರೀಮಂತ ಎಲಾನ್ ಮಸ್ಕ್ (Elon Musk) ಒಡೆತನದ ಉಪಗ್ರಹ ಆಧಾರಿತ ಇಂಟರ್ನೆಟ್ (Internet) ಕಂಪನಿ ಸ್ಟಾರ್‌ಲಿಂಕ್ (Starlink) ಭಾರತದಲ್ಲಿ ತನ್ನ ಸೇವೆ ಒದಗಿಸಲು ತುದಿಗಾಲಿನಲ್ಲಿ ನಿಂತಿದೆ. ಅದಕ್ಕೆ ಅನುಗುಣವಾಗಿ ಸರ್ಕಾರವು ಸ್ಟಾರ್‌ಲಿಂಕ್‌ಗೆ ಅನುಮತಿ ನೀಡಿದೆ. ಈ ಬಗ್ಗೆ ದೂರಸಂಪರ್ಕ ಇಲಾಖೆ ಸ್ಟಾರ್‌ಲಿಂಕ್‌ಗೆ ಅನುಮತಿ ಪತ್ರ ನೀಡಿದೆ.

ಉಪಗ್ರಹಗಳ ಸಮೂಹ ಬಳಸಿಕೊಂಡು ಇಂಟರ್ನೆಟ್ ಸೇವೆ ಒದಗಿಸಲಿದೆ ಸ್ಟಾರ್‌ಲಿಂಕ್. ಈ ಉಪಗ್ರಹಗಳು ಬೇರೆ ಉಪಗ್ರಹಗಳಿಗಿಂತ ಭೂಮಿಗೆ ಹೆಚ್ಚು ಹತ್ತಿರದಲ್ಲಿರುತ್ತವೆ. ಇದರಿಂದಾಗಿ ಗ್ರಾಹಕರಿಗೆ ವೇಗವಾದ ಇಂಟರ್ನೆಟ್ ಸೌಲಭ್ಯ ಸಿಗುತ್ತದೆ. ಸ್ಟಾರ್‌ಲಿಂಕ್ ಈಗಾಗಲೇ 100 ಕ್ಕೂ ಹೆಚ್ಚು ದೇಶಗಳಲ್ಲಿ ಸಕ್ರಿಯವಾಗಿದ್ದು, ಈಗ ಭಾರತಕ್ಕೂ ಕಾಲಿಡುತ್ತಿದ್ದು, ಮುಖ್ಯವಾಗಿ ಗ್ರಾಮೀಣ ಭಾಗಗಳಿಗೆ ಇಂಟರ್ನೆಟ್‌ ಸೇವೆ ಒದಗಿಸುವ ಉದ್ದೇಶ ಹೊಂದಿದೆ. ಈಗ ಈ ವೇಗದ ಇಂಟರ್ ಬೆಟ್ ಸೇವೆಗಳಿಗೆ ತಿಂಗಳಿಗೆ ಎಷ್ಟು ಖರ್ಚು ಇರಲಿದೆ, ಅಷ್ಟಕ್ಕೂ ವೇಗ ಎಷ್ಟಿರುತ್ತದೆ ಎನ್ನುವ ಬಗ್ಗೆ ಚರ್ಚೆ ಶುರುವಾಗಿದೆ.

ವೇಗ ಎಷ್ಟಿರತ್ತೆ? ಬೆಲೆ ಎಷ್ಟು?

ಸ್ಟಾರ್‌ಲಿಂಕ್ ಭಾರತದಲ್ಲಿ ಅನ್ ಲಿಮಿಟೆಡ್ ಡೇಟಾ ಯೋಜನೆಗಳನ್ನು ಪ್ರಾರಂಭಿಸುವ ಸಾಧ್ಯತೆಯಿದೆ. ಈ ಅನಿಯಮಿತ ಪ್ಯಾಕ್’ಗೆ ಸರಿಸುಮಾರು 840 ರೂ., ನಗರ ಪ್ರದೇಶಗಳಲ್ಲಿನ ಬಳಕೆದಾರರಿಗೆ ಮಾಸಿಕ 500ರೂ. ಶುಲ್ಕ ಇರಲಿದ್ದು, ವಾರ್ಷಿಕ 3,500 ರೂ. ಕನಿಷ್ಠ ಶುಲ್ಕವನ್ನು TRAI ಪ್ರಸ್ತಾಪಿಸಿದೆ. ಇದು ಆರಂಭಿಕ ಹಂತಗಳಲ್ಲಿ ಹೆಚ್ಚಿನ ಸಂಖ್ಯೆಯ ಬಳಕೆದಾರರನ್ನು ಆಕರ್ಷಿಸುವ ಪ್ರಯತ್ನವಾಗಿದೆ. ನಂತರದ ದಿನಗಳಲ್ಲಿ ಈ ಬೆಲೆ ಇನ್ನಷ್ಟು ಏರಲಿದೆ ಎನ್ನಲಾಗಿದೆ. ಭಾರತದಲ್ಲಿ ವಾಣಿಜ್ಯಿಕವಾಗಿ ಸೇವೆಗಳನ್ನು ನೀಡಲು ಸ್ಟಾರ್‌ಲಿಂಕ್ 8% ಪರವಾನಗಿ ಶುಲ್ಕವನ್ನು ಸಹ ಪಾವತಿಸಬೇಕಾಗುತ್ತದೆ.

ಭಾರತದಲ್ಲಿ ಸ್ಟಾರ್‌ಲಿಂಕ್‌ ಇಂಟರ್ನೆಟ್‌ ಪಡೆಯಲು ಬೇಕಾಗುವ ಸಾಧನಗಳ ಬೆಲೆಯನ್ನು ಈ ತನಕ ಬಹಿರಂಗಪಡಿಸಲಾಗಿಲ್ಲ. ಆದರೆ ಈಗೆ ಅಮೆರಿಕಾದಲ್ಲಿ ಸ್ಟಾರ್‌ಲಿಂಕ್ ಕಿಟ್‌ನ ಬೆಲೆ 30,000 ರೂ. ಇದ್ದು, ಸಣ್ಣ ಸೈಜಿನ ಕಾಂಪ್ಯಾಕ್ಟ್ ಸ್ಟಾರ್‌ಲಿಂಕ್ ಸಾಧನದ ಬೆಲೆ ರೂ. 43,000 ಆಗಿದೆ. ಭಾರತದಲ್ಲಿ ಇಂಟರ್ನೆಟ್ ವೇಗವು ಸ್ಥಳ ಮತ್ತು ಉಪಗ್ರಹ ವ್ಯಾಪ್ತಿಯನ್ನು ಅವಲಂಬಿಸಿ 25 Mbps ನಿಂದ 220 Mbps ವರೆಗೆ ಇರುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಸ್ಟಾರ್‌ಲಿಂಕ್ ಈ ವರ್ಷದ ಕೊನೆಯಲ್ಲಿ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ತನ್ನ ಸೇವೆಗಳನ್ನು ಪ್ರಾರಂಭಿಸುವ ನಿರೀಕ್ಷೆಯಿದೆ.ಎಲೋನ್ ಮಸ್ಕ್ ನ ಏರೋಸ್ಪೇಸ್ ಕಂಪನಿ ಸ್ಪೇಸ್‌ಎಕ್ಸ್‌ನಿಂದ ಪ್ರಾರಂಭಿಸಲಾದ ಉಪಗ್ರಹ ಆಧಾರಿತ ಇಂಟರ್ನೆಟ್ ನ ಈ ಸೇವೆ ಪಡೆಯಬೇಕಾದರೆ ಕಂಪನಿಯ ಡಿಶ್‌ ಮತ್ತು ರೂಟರ್‌ ಬೇಕಾಗುತ್ತದೆ. ಈಗ ಬ್ರಾಡ್‌ಬ್ಯಾಡ್‌ ಸೇವೆ ಪಡೆಯಬೇಕಾದ್ರೆ ಫೈಬರ್‌ ಆಪ್ಟಿಕ್‌ ಕೇಬಲ್‌ ನೆಲಕ್ಕೆ ಹಾಕಬೇಕಾಗುತ್ತದೆ. ಆದ್ರೆ ಈ ಸ್ಟಾರ್‌ ಲಿಂಕ್‌ಗೆ ಗುಂಡಿ ತೋಡಿ ಆಪ್ಟಿಕಲ್‌ ಕೇಬಲ್‌ ಹಾಕುವ ಅಗತ್ಯ ಇಲ್ಲ.

ಸ್ಟಾರ್‌ಲಿಂಕ್ 50 Mbps ನಿಂದ 150 Mbps ತನಕ ಅತ್ಯಂತ ವೇಗದ ಇಂಟರ್ನೆಟ್ ನೀಡುತ್ತದೆ. ಕೇಬಲ್‌ ಹಾಕುವುದು ತುಂಬಾ ದುಬಾರಿ ಆಗುವ ಕಾರಣ ಗ್ರಾಮೀಣ, ದೂರದ ಅಥವಾ ತಲುಪಲು ಕಷ್ಟಕರವಾದ ಪ್ರದೇಶಗಳಿಗೆ ಈ ಸ್ಯಾಟಲೈಟ್‌ ಇಂಟರ್‌ನೆಟ್‌ ಅತ್ಯುತ್ತಮ ಎನಿಸಿಕೊಳ್ಳಲಿದೆ. ಈ ಇಂಟರ್ನೆಟ್ ಸೌಲಭ್ಯಕ್ಕೆ ಮಳೆ ಬಂದ್ರೆ ಕೂಡಾ ಸ್ವಲ್ಪವೂ ಸಮಸ್ಯೆ ಆಗಲ್ಲ. ಉಷ್ಣಾಂಶದಲ್ಲಿ ಏರುಪೇರು, ಹಿಮಪಾತ, ಭಾರೀ ಮಳೆ, ಬೀಸು ಬಿರುಗಾಳಿ ಬಂದ್ರೆ ಕೂಡಾ ಈ ಉದ್ದೇಶಿತ ಇಂಟರ್ ನೆಟ್ ಸೇವೆಯಲ್ಲಿ ಯಾವುದೇ ಸಮಸ್ಯೆ ಇರಲ್ಲವಂತೆ.