Gold loan: ಇನ್ಮುಂದೆ ಕಡಿತಗೊಳ್ಳಲಿದೆ ಒಡವೆ ಮೌಲ್ಯಕ್ಕೆ ಅನುಗುಣವಾದ ಸಾಲದ ಮಿತಿ!

Gold loan: ಯಾವುದೇ ಬ್ಯಾಂಕು ಮತ್ತು ಫೈನಾನ್ಸ್ ಕಂಪನಿಗೆ ಒಡವೆ ಒತ್ತೆ ಇಟ್ಟು ಸುಲಭವಾಗಿ ಸಾಲ ಪಡೆಯಬಹುದು. ಬ್ಯಾಂಕುಗಳಿಗೂ ಈ ಗೋಲ್ಡ್ ಲೋನ್ (Gold loan)ರಿಸ್ಕ್ ರಹಿತ ಎನಿಸುತ್ತವೆ. ಆದರೆ, ಈಗ ಭಾರತೀಯ ರಿಸರ್ವ್ ಬ್ಯಾಂಕ್ ಗೋಲ್ಡ್ ಲೋನ್ ಮೇಲೆ ಕಣ್ಣಿಟ್ಟಿದೆ. ಆರ್​​ಬಿಐ ಎಂಪಿಸಿ ಸಭೆ ಬಳಿಕ ಗೋಲ್ಡ್ ಲೋನ್ ನಿಯಮಗಳನ್ನು ಪರಿಷ್ಕರಿಸುವುದಾಗಿ ಹೇಳಲಾಗಿದೆ. ಅದರಂತೆ ಡ್ರಾಫ್ಟ್​​ವೊಂದನ್ನು ಸಿದ್ಧಪಡಿಸಲಾಗಿದೆ. ಇದರಲ್ಲಿ ಮಾಡಲಾಗಿರುವ ಪ್ರಸ್ತಾವಗಳಲ್ಲಿ ಪ್ರಮುಖವಾದುದ ಎಲ್​​ಟಿವಿ, ಅಥವಾ ಲೋನ್ ಟು ವ್ಯಾಲ್ಯು. ಅಂದರೆ, ಚಿನ್ನದ ಮೌಲ್ಯಕ್ಕೆ ಅನುಗುಣವಾದ ಸಾಲ.

ಕೋವಿಡ್ ಸಂದರ್ಭದಲ್ಲಿ ಜನರಿಗೆ ಗೋಲ್ಡ್ ಲೋನ್ ಸುಲಭವಾಗಿ ಸಿಗಲು ಸಾಧ್ಯವಾಗಲಿ ಎಂದು ಎಲ್​​ಟಿವಿಯನ್ನು ಶೇ. 90ಕ್ಕೆ ಹೆಚ್ಚಿಸಲಾಗಿತ್ತು. ಅಂದರೆ, ಚಿನ್ನದ ಮೌಲ್ಯದ ಶೇ. 90ರಷ್ಟು ಹಣವನ್ನು ಬ್ಯಾಂಕುಗಳು ಸಾಲವಾಗಿ ಕೊಡಲು ಅವಕಾಶ ಕೊಡಲಾಗಿತ್ತು. ಈಗ ಎಲ್​​ಟಿವಿಯನ್ನು ಶೇ. 75ಕ್ಕೆ ಮಿತಿಗೊಳಿಸಲು ಪ್ರಸ್ತಾಪಿಸಲಾಗಿದೆ.

ಬಡ್ಡಿ ಕಟ್ಟದೇ ಬಾಕಿ ಉಳಿಯುವ ಹಣವೂ ಎಲ್​​ಟಿವಿ ವ್ಯಾಪ್ತಿಗೆ:
ಅಂದರೆ ಗ್ರಾಹಕರು ಶೇ. 75ರಷ್ಟು ಎಲ್​​ಟಿವಿಯಲ್ಲಿ ಗೋಲ್ಡ್ ಲೋನ್ ಪಡೆದಲ್ಲಿ, ಒಂದು ವರ್ಷ ಅಥವಾ ಕೆಲ ತಿಂಗಳಾದರೂ ಯಾವುದೇ ಬಡ್ಡಿ ಕಟ್ಟದೇ ಹೋದರೆ ಆಗ ಇರುವ ಸಾಲ ಬಾಕಿಯು ಶೇ. 75ರ ಎಲ್​​ಟಿವಿ ಮಿತಿಯಲ್ಲೇ ಇರಬೇಕು ಎನ್ನುವ ನಿಯಮವನ್ನು ಆರ್​​ಬಿಐ ತರುತ್ತಿದೆ.

ಉದಾಹರಣೆಗೆ, ನೀವು 10 ಗ್ರಾಮ್ ಒಡವೆ ಒತ್ತೆ ಇಟ್ಟರೆ, ಅದರ ಒಂದು ಗ್ರಾಮ್ ಮೌಲ್ಯ 8,500 ರೂ ಇಂದಿಟ್ಟುಕೊಂಡರೆ, ನಿಮಗೆ 63,750 ರೂ ಸಾಲದ (ಶೇ. 75 ಎಲ್​​​ಟಿವಿ) ಅವಕಾಶ ಇರುತ್ತದೆ. ನೀವು ಕೆಲ ಕಾಲ ಬಡ್ಡಿ ಕಟ್ಟದೇ, ಸುಮಾರು 10,000 ರೂ ಬಡ್ಡಿ ಬೆಳೆದು ನಿಮ್ಮ ಸಾಲ ಬಾಕಿ 73,000 ಆಯಿತು ಎಂದಿಟ್ಟುಕೊಳ್ಳಿ. ಅದು ಶೇ. 75ರ ಎಲ್​​ಟಿವಿ ವ್ಯಾಪ್ತಿಯೊಳಗೇ ಇರಬೇಕು. ಇಲ್ಲದಿದ್ದರೆ ಬ್ಯಾಂಕ್ ದಂಡ ಕಟ್ಟಬೇಕಾಗುತ್ತದೆ.

ಇಲ್ಲಿ ದಂಡ ಎಂದರೆ, ಒಟ್ಟು ಸಾಲದ ಹಣದಲ್ಲಿ ಶೇ. 1ರಷ್ಟನ್ನು ಬ್ಯಾಂಕ್​​ನವರು ಲೋನ್​​ಗೆ ಕವರ್ ಆಗಿ ಎತ್ತಿಡಬೇಕು. 30 ದಿನಗಳಿಗಿಂತ ಹೆಚ್ಚು ಅವಧಿ ಶೇ. 75ರ ಎಲ್​​ಟಿವಿ ಮಿತಿ ಹೆಚ್ಚು ಇದ್ದಾಗ ಈ ಕ್ರಮ ಇರುತ್ತದೆ. ಬ್ಯಾಂಕ್​ನವರು ಗ್ರಾಹಕರಿಂದ ಆದಷ್ಟು ಬೇಗ ಬಡ್ಡಿಯನ್ನಾದರೂ ವಸೂಲಿ ಮಾಡಿ ಎಲ್​​ಟಿವಿಯನ್ನು ಶೇ. 75ರ ಮಿತಿಯೊಳಗೆ ತರಬೇಕಾಗುತ್ತದೆ.

ಕಮರ್ಷಿಯಲ್ ಬ್ಯಾಂಕುಗಳು ಇನ್ಕಮ್ ಜನರೇಶನ್​​ಗೆ ನೀವು ಒಡವೆ ಸಾಲಗಳಿಗೆ ಶೇ. 75ರ
ಎಲ್​​ಟಿವಿ ಮಿತಿ ಇರುವುದಿಲ್ಲ. ಅದಕ್ಕಿಂತಲೂ ಹೆಚ್ಚಿನ ಮೊತ್ತವನ್ನು ಸಾಲವಾಗಿ ನೀಡಬಹುದು. ಆದರೆ, ಎನ್​​ಬಿಎಫ್​​ಸಿಗಳು ಕನ್ಷಂಪ್ಷನ್ ಸಾಲವಾಗಲೀ, ಇನ್ಕಮ್ ಜನರೇಶನ್ ಸಾಲವಾಗಲಿ ಶೇ. 75ರ ಎಲ್​​ಟಿವಿ ಮಿತಿಯನ್ನು ಪಾಲಿಸಬೇಕಾಗುತ್ತದೆ.