ಉಪಹಾರಕ್ಕೆ ಚಹಾ – ಚಪಾತಿ ತಿನ್ನುವುದು ಹಾನಿಕಾರಕವೆ? ಬೆಳಗ್ಗಿನ ತಿಂಡಿಗೆ ಟೀ-ಚಪಾತಿ ತಿಂದರೆ ಏನಾಗುತ್ತದೆ…..

ಬೆಳಗಿನ ತಿಂಡಿಯಲ್ಲಿ ಅನೇಕ ಜನರು ಚಹಾ ಮತ್ತು ಚಪಾತಿ ಸೇವಿಸುತ್ತಾರೆ. ಬೆಳಿಗ್ಗೆ ತಾಜಾ ಅವಲಕ್ಕಿ, ಉಪ್ಪಿಟ್ಟು, ಇಡ್ಲಿ ಅಥವಾ ಇತರ ತಿಂಡಿಗಳನ್ನು ಸಿದ್ಧಪಡಿಸಲು ಸಮಯ ಬೇಕಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಜನರಿಗೆ ಸಮಯದ ಅಭಾವವೇ ಹೆಚ್ಚು. ಈ ಸಮಯವನ್ನು ಉಳಿಸಲು ಅಥವಾ ಅನುಕೂಲಕ್ಕಾಗಿ ಅಥವಾ ಇಷ್ಟವಾಗುತ್ತದೆ ಎಂಬ ಕಾರಣಕ್ಕಾಗಿ ಅನೇಕ ಜನ ಚಾಯ್-ಚಪಾತಿ ತಿನ್ನುತ್ತಾರೆ. ಬಿಸಿ ಚಹಾದೊಂದಿಗೆ ಚಪಾತಿ ರುಚಿ ಅದ್ಭುತವಾಗಿದೆ. ಮೇಲಾಗಿ, ಮಧ್ಯಾಹ್ನದ ಊಟದ ತನಕ ಹಸಿವಾಗುವುದಿಲ್ಲ. ಆರೋಗ್ಯದ ದೃಷ್ಟಿಯಿಂದ ಚಪಾತಿ, ಟೀ ತಿನ್ನುವುದು ಸರಿಯೇ? ಚಾಯ್-ಚಪಾತಿ ಆಹಾರ ಸಂಯೋಜನೆಯು ಅನಾರೋಗ್ಯಕರವಾಗಿದೆಯೇ? ಇದರಿಂದ ಹೊಟ್ಟೆಯ ಅಸ್ವಸ್ಥತೆ ಸೇರಿದಂತೆ ಬೊಜ್ಜಿನ ಸಮಸ್ಯೆ ಹೆಚ್ಚುತ್ತದೆಯೇ…?!

ಈ ನಿಟ್ಟಿನಲ್ಲಿ ಆಹಾರ ತಜ್ಞೆ ಸುನೀತಾ ರೈ ಅವರು, ‘ತಿಂಡಿಗೆ ಚಹಾದೊಂದಿಗೆ ಚಪಾತಿ ತಿನ್ನುವುದು ಆರೋಗ್ಯಕ್ಕೆ ಹಾನಿಕರ. ಎರಡನ್ನೂ ಒಟ್ಟಿಗೆ ತಿನ್ನುವುದರಿಂದ ದೇಹಕ್ಕೆ ಸಾಕಷ್ಟು ಪೌಷ್ಟಿಕಾಂಶ ದೊರೆಯುವುದಿಲ್ಲ. ಬೆಳಿಗ್ಗೆ ನೀವು ಪೌಷ್ಟಿಕ ಆಹಾರವನ್ನು ಸೇವಿಸಬೇಕು. ಇದರಿಂದ ದಿನವಿಡೀ ಕೆಲಸ ಮಾಡಲು ದೇಹಕ್ಕೆ ಶಕ್ತಿ ದೊರೆಯುತ್ತದೆ. ಜೊತೆಗೆ, ಆಹಾರವು ಸಾಕಷ್ಟು ಪ್ರಮಾಣದ ಪ್ರೋಟೀನ್, ಕಾರ್ಬೋಹೈಡ್ರೇಟ್ಗಳು, ಕ್ಯಾಲ್ಸಿಯಂ ಮತ್ತು ಕಬ್ಬಿಣವನ್ನು ಹೊಂದಿರಬೇಕು. ಆದರೆ ಚಹಾ ಮತ್ತು ಚಪಾತಿ ತಿನ್ನುವುದರಿಂದ ಆರೋಗ್ಯಕ್ಕೆ ಈ ಪೋಷಕಾಂಶ ಸಿಗುವುದಿಲ್ಲ’ ಎಂದರು.

ಅಲ್ಲದೆ, ಟ್ಯಾನಿನ್ ಕೆಫೀನ್ ಯುಕ್ತ ಚಹಾದೊಂದಿಗೆ ದಿನವನ್ನು ಪ್ರಾರಂಭಿಸುವುದು ಆರೋಗ್ಯಕ್ಕೆ ಹಾನಿಕಾರಕವಾಗಿದೆ. ವಾಸ್ತವವಾಗಿ, ಯಾವುದಕ್ಕೂ ಒಳ್ಳೆಯದಲ್ಲ. ಚಹಾವನ್ನು ಕುಡಿಯಲು ಇದು ಸೂಕ್ತ ಸಂದರ್ಭವಲ್ಲ. ಏಕೆಂದರೆ, ಚಹಾದೊಂದಿಗೆ ಚಪಾತಿ ತಿನ್ನುವಾಗ ದೇಹವು ಕಬ್ಬಿಣ ಮತ್ತು ಕ್ಯಾಲ್ಸಿಯಂ ಅನ್ನು ಹೀರಿಕೊಳ್ಳುವುದಿಲ್ಲ. ಆದ್ದರಿಂದ, ಈ ಉಪಹಾರದಿಂದ ಆರೋಗ್ಯವು ವಿಶೇಷ ಪೋಷಕಾಂಶಗಳನ್ನು ಪಡೆಯುವುದಿಲ್ಲ. ಇದಲ್ಲದೆ, ಚಹಾದಲ್ಲಿನ ಸಕ್ಕರೆಯು ಅನೇಕ ಗಂಭೀರ ಕಾಯಿಲೆಗಳ ಸಮಸ್ಯೆಯನ್ನು ಉಂಟುಮಾಡುತ್ತದೆ. ಚಹಾ ಮತ್ತು ಚಪಾತಿಯಲ್ಲಿ ಅಗತ್ಯದ ಪೋಷಕಾಂಶಗಳು ಮತ್ತು ನಾರಿನಂಶ ಇರುವುದಿಲ್ಲ. ಅಲ್ಲದೇ, ಗೋಧಿ ಹಿಟ್ಟಿನಲ್ಲಿರುವ “ಗ್ಲುಟೆನ್” ಎಂಬ ಜಿಗುಟು ಪದಾರ್ಥ ಕರುಳುಗಳಿಗೆ ಅಂಟಿಕೊಂಡು ಅಪಾಯವನ್ನುಂಟು ಮಾಡುತ್ತದೆ. ಮಲಬದ್ಧತೆ ಮತ್ತು ಅನೇಕ ರೋಗಗಳಿಗೆ ಕಾರಣವಾಗುತ್ತದೆ.

ಕೆಲವರು ಚಹಾದೊಂದಿಗೆ ಬ್ರೆಡ್, ಟೋಸ್ಟ್, ಬನ್ ಅಥವಾ ಬಿಸ್ಕತ್ತುಗಳನ್ನು ತಿನ್ನುತ್ತಾರೆ. ಇದು ಚಪಾತಿ ತಿನ್ನುವುದಕ್ಕಿಂತಲೂ ಅಪಾಯಕಾರಿ. ಏಕೆಂದರೆ, ಈ ಎಲ್ಲಾ ಆಹಾರಗಳಲ್ಲಿ ಮೈದಾ ಹಿಟ್ಟು ಮಾತ್ರ ಇರುತ್ತದೆ. ಮೈದಾ ಚಪಾತಿ ಹಿಟ್ಟಿಗಿಂತ ಆರೋಗ್ಯಕ್ಕೆ ಹೆಚ್ಚು ಹಾನಿಕಾರಕ.

ಆರೋಗ್ಯಕರ ಉಪಹಾರ ಎಂದರೇನು…?
ನೀವು ತ್ವರಿತ ಆದರೆ ಆರೋಗ್ಯಕರ ಉಪಹಾರವನ್ನು ಹೊಂದಲು ಬಯಸಿದರೆ, ಪಲ್ಯ-ಚಪಾತಿ, ಮೊಸರು-ಚಪಾತಿ, ಹಾಲು ಅಥವಾ ನೀವು ಬೆಣ್ಣಿಯೊಂದಿಗೆ ತಿನ್ನಬಹುದು. ಅಥವಾ ನೀವು ಕಾರ್ಬೋಹೈಡ್ರೇಟ್ ಭರಿತ ಉಪಹಾರಕ್ಕಾಗಿ ದಲಿಯಾ (ನುಚ್ಚು), ಉಪ್ಪಿಟ್ಟು, ದೋಸೆ, ಇಡ್ಲಿ ಅಥವಾ ಅಪ್ಪಮ್ ಅನ್ನು ಸೇವಿಸಬಹುದು.
– ಡಾ. ಪ್ರ. ಅ. ಕುಲಕರ್ಣಿ