ಟೆಲಿಕಾಮ್ ದೈತ್ಯ ಕಂಪನಿ ಭಾರತಿ ಏರ್ಟೆಲ್ , 4G ಸೇವೆಯಿಂದ 5G ಸೇವೆ ನೀಡಲು ಮುಂದಾಗಿದ್ದು, ಮನರಂಜನೆಯ ಜೊತೆಗೆ ಕೆಲಸವನ್ನು ನಿರ್ವಹಿಸಲು ಎಲ್ಲ ಟೆಲಿಕಾಮ್ ಸರ್ವೀಸ್ ಗಳು 5ಜಿ ಸೇವೆಯ ಮೂಲಕ ಅಪ್ಗ್ರೇಡ್ ಮಾಡುತ್ತಿದೆ. ಇದೀಗ ಭಾರ್ತಿ ಏರ್ಟೆಲ್ ರೀಚಾರ್ಜ್ ಪ್ಲಾನ್ ಒಂದನ್ನು ಹರಿಯಾಣ ಮತ್ತು ಒಡಿಶಾಗಳಲ್ಲಿ ಜಾರಿಗೊಳಿಸಿದ್ದು, ಮುಂದಿನ ಕೆಲ ದಿನಗಳಲ್ಲಿ ದೇಶದಾದ್ಯಂತ ವಿಸ್ತರಣೆ ಮಾಡುವ ಸಾಧ್ಯತೆ ದಟ್ಟವಾಗಿದೆ. ಈ ಹೊಸ ಯೋಜನೆ ಜಾರಿಗೆ ಬಂದರೆ ಏರ್ಟೆಲ್ ಗ್ರಾಹಕರ ಜೇಬಿಗೆ ಕತ್ತರಿ ಬೀಳುವ ಸಾಧ್ಯತೆ ಹೆಚ್ಚಿದೆ.
ಹೌದು!!ಹರಿಯಾಣ ಮತ್ತು ಒಡಿಶಾ ವಲಯಗಳಲ್ಲಿ 28 ದಿನಗಳ ಅವಧಿಯ ಕನಿಷ್ಠ ರಿಚಾರ್ಜ್ (Minimum Recharge) ದರವನ್ನು ಭಾರ್ತಿ ಏರ್ಟೆಲ್(Bharti Airtel) ಶೇಕಡಾ 57ರಷ್ಟು ಹೆಚ್ಚಿಸಿದ್ದು, 155 ರೂ.ಯನ್ನು ನಿಗದಿ ಮಾಡಿದ್ದು, ಈ ಕುರಿತು ಕಂಪನಿಯ ವೆಬ್ಸೈಟ್ನಲ್ಲಿ ಮಾಹಿತಿ ನೀಡಲಾಗಿದೆ.99 ರೂ. ಮೊತ್ತದ ಕನಿಷ್ಠ ರಿಚಾರ್ಜ್ ದರವನ್ನು ಏರ್ಟೆಲ್ ಸ್ಥಗಿತಗೊಳಿಸಿದ್ದು, ಈ ಯೋಜನೆಯಡಿ 200 ಎಂಬಿ ಡೇಟಾ, ಸೆಕೆಂಡ್ಗೆ 2.5 ರೂ. ನಂತೆ ಕರೆ ಸೌಲಭ್ಯ ನೀಡಲಾಗಿತ್ತು. ಇದೀಗ ಇದರ ಬದಲಿಗೆ ಈಗ ಹರಿಯಾಣ ಹಾಗೂ ಒಡಿಶಾದಲ್ಲಿ 155 ರೂ.ಗೆ 28 ದಿನಗಳ ವ್ಯಾಲಿಡಿಟಿ, 1 ಜಿಬಿ ಡೇಟಾ, ಅನಿಯಮಿತ ಕರೆ ಹಾಗೂ 300 ಎಸ್ಎಂಎಸ್ ಸೌಲಭ್ಯ ಇರುವ ಪ್ಲಾನ್ ಅನ್ನು ಪರಿಚಯಿಸಲಾಗಿದೆ.
155 ರೂ.ಗಿಂತ ಕಡಿಮೆ ಮೊತ್ತದ ಎಲ್ಲ ಪ್ಲಾನ್ಗಳನ್ನು ಏರ್ಟೆಲ್ ಶೀಘ್ರದಲ್ಲೇ ರದ್ದುಪಡಿಸುವ ಸಾಧ್ಯತೆ ದಟ್ಟವಾಗಿದ್ದು, ತಿಂಗಳ ಪ್ಲಾನ್ನೊಂದಿಗೆ ಎಸ್ಎಂಎಸ್ ಬೇಕಾದರು ಕೂಡ ಗ್ರಾಹಕರು 155 ರೂ. ರಿಚಾರ್ಜ್ ಮಾಡಬೇಕಾಗುತ್ತದೆ ಎನ್ನಲಾಗುತ್ತಿದೆ. ಈ ಕುರಿತು ಪ್ರತಿಕ್ರಿಯೆಗಾಗಿ, ‘ಪಿಟಿಐ’ ಸುದ್ದಿಸಂಸ್ಥೆಯು ಭಾರ್ತಿ ಏರ್ಟೆಲ್ಗೆ ಇ-ಮೇಲ್ ಸಂದೇಶ ಕಳುಹಿಸಿದ್ದು, ಉತ್ತರಕ್ಕಾಗಿ ಕಾಯುತ್ತಿದೆ.
ಏರ್ಟೆಲ್ ಹರಿಯಾಣ ಮತ್ತು ಒಡಿಶಾದಲ್ಲಿ ಹೊಸ ಪ್ಲಾನ್ ಅನ್ನು ಪ್ರಯೋಗದ ಅನ್ವಯ ಪರಿಚಯಿಸಿದ್ದು, ರಾಜ್ಯಗಳಲ್ಲಿ ಗ್ರಾಹಕರಿಂದ ಯಾವ ರೀತಿಯ ಪ್ರತಿಕ್ರಿಯೆ ವ್ಯಕ್ತವಾಗುತ್ತದೆ ಎಂಬುದನ್ನು ನೋಡಿಕೊಂಡ ಬಳಿಕ, ಮುಂದಿನ ನಿರ್ಧಾರ ಕೈಗೊಳ್ಳುವ ತಂತ್ರಗಾರಿಕೆ ರೂಪಿಸುವ ಸಾಧ್ಯತೆ ದಟ್ಟವಾಗಿದೆ.
99 ರೂ. ಪ್ಲಾನ್ನಲ್ಲಿ 99 ರೂ. ಟಾಕ್ಟೈಮ್, 200 ಎಂಬಿ ಡೇಟಾ 28 ದಿನಗಳ ಅವಧಿಯ ಪ್ರಯೋಜನ ದೊರೆಯುತ್ತಿತ್ತು. ಇದೀಗ 155 ರೂ. ಪ್ಲಾನ್ನಲ್ಲಿ 1 ಜಿಬಿ ಡೇಟಾ ಜತೆಗೆ 300 ಎಸ್ಎಂಎಸ್ ಸೌಲಭ್ಯ ದೊರೆಯಲಿದೆ. ಇದರೊಂದಿಗೆ ಕನಿಷ್ಠ ರಿಚಾರ್ಜ್ ದರದಲ್ಲಿ ಶೇಕಡಾ 57ರಷ್ಟು ಹೆಚ್ಚಳ ಮಾಡಿದಂತಾಗಿದೆ ಎಂದು ಐಸಿಐಸಿಐ ಸೆಕ್ಯುರಿಟೀಸ್ನ ವಿಶ್ಲೇಷಕರು ಸಂಜೇಶ್ ಜೈನ್ ಹಾಗೂ ಆಕಾಶ್ ಕುಮಾರ್ ಹೇಳಿದ್ದಾರೆ.
ಈ ಹಿಂದೆ ಕೂಡ ಏರ್ಟೆಲ್ ಈ ರೀತಿಯ ಪ್ರಯೋಗ ನಡೆಸಿದ್ದು, ಕನಿಷ್ಠ ರಿಚಾರ್ಜ್ ದರವನ್ನು ಆಯ್ದ ವಲಯಗಳಲ್ಲಿ 79 ರೂ.ನಿಂದ 99 ರೂ.ಗೆ ಏರಿಕೆ ಮಾಡಿತ್ತು.ಆ ಬಳಿಕ ದೇಶದಾದ್ಯಂತ ಅನುಷ್ಠಾನ ಮಾಡಲಾಗಿತ್ತು.
ಸದ್ಯದ ಮಾರುಕಟ್ಟೆಯ ಸ್ತಿತಿಗತಿಯಲ್ಲಿ ಟಾರಿಫ್ ಹೆಚ್ಚಳಕ್ಕೆ ಮುಂದಾದ ಮೊದಲ ಕಂಪನಿ ಏರ್ಟೆಲ್ ಆಗಿದ್ದು , ಇದಕ್ಕೆ ಉಳಿದ ಕಂಪನಿಗಳ ಪ್ರತಿಕ್ರಿಯೆ ಹೇಗಿರುತ್ತದೆ ಎಂಬುದನ್ನು ಕಾದುನೋಡಬೇಕಾಗಿದ್ದು, ನಿರೀಕ್ಷಿತ ಬೆಂಬಲ ಸಿಗದೇ ಹೋದಲ್ಲಿ ಏರ್ಟೆಲ್ ಮತ್ತೆ ಕನಿಷ್ಠ ರಿಚಾರ್ಜ್ ದರವಾದ 99 ರೂ. ಪ್ಲಾನ್ ಅನ್ನು ಮರುಸ್ಥಾಪಿಸುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.
