Superme Court : ವಿವಾಹ ಕಾಯ್ದೆಯಡಿ ಮದುವೆಯು ಕೇವಲ ಒಂದು ‘ವಾಣಿಜ್ಯ ಒಪ್ಪಂದ’ ಅಥವಾ ‘ಹಾಡು-ಕುಣಿತದ ಕಾರ್ಯಕ್ರಮ’ವಲ್ಲ, ಬದಲಾಗಿ ಅದು ಒಂದು ಪವಿತ್ರ ಸಂಸ್ಕಾರ (Sacrament) ಹೀಗಾಗಿ ಕೇವಲ ಮ್ಯಾರೇಜ್ ಸರ್ಟಿಫಿಕೇಟ್ ಪಡೆದುಕೊಂಡರೆ ಆ ಮದುವೆ ಸಿಂಧುವಾಗುವುದಿಲ್ಲ. ಶಾಸ್ತ್ರೋಕ್ತವಾಗಿ ಮದುವೆಯಾದರೆ ಮಾತ್ರ ಅದನ್ನು ಪರಿಗಣಿಸಲಾಗುವುದು ಎಂದು ಸುಪ್ರೀಂ ಕೋರ್ಟ್ ಒತ್ತಿ ಹೇಳಿದೆ.
ಹೌದು, ರಿಜಿಸ್ಟರ್ ಮ್ಯಾರೇಜ್ ಎಂದಾದರೆ ಕೇವಲ ಒಂದು ಪ್ರಮಾಣ ಪತ್ರ ಹಿಡಿದು ಮದುವೆ ಎಂದು ಬಿಂಬಿಸುತ್ತಾರೆ. ಹಿಂದುಗಳು ಈ ರೀತಿ ಮದುವೆಯಾದರೆ ಅದು ಅಸಿಂಧು. ಹೀಗಾಗಿ ಹಿಂದೂ ವಿವಾಹಕ್ಕೆ ವಿಧಿ-ವಿಧಾನ ಕಡ್ಡಾಯ ಎಂದು ಸುಪ್ರೀಂ ಕೋರ್ಟ್ ಮಹತ್ವದ ತೀರ್ಪು ನೀಡಿದೆ.
ಹಿಂದೂ ವಿವಾಹ ಕಾಯ್ದೆ, 1955ರ ಸೆಕ್ಷನ್ 7ರ ಪ್ರಕಾರ, ಹಿಂದೂ ವಿವಾಹವು ಕಾನೂನುಬದ್ಧವಾಗಿರಲು ಅದು ಸಾಂಪ್ರದಾಯಿಕ ಧಾರ್ಮಿಕ ವಿಧಿ-ವಿಧಾನಗಳ ಪ್ರಕಾರ ನಡೆದಿರಬೇಕು. ವಿಶೇಷವಾಗಿ, ಸಪ್ತಪದಿ, ಹೋಮ ಎಂಬ ಅಗ್ನಿ ಸಮಾರಂಭಗಳು ಹಿಂದೂ ವಿವಾಹದ ಅತ್ಯಂತ ಮೂಲಭೂತ ಮತ್ತು ಅವಿಭಾಜ್ಯ ಭಾಗಗಳೆಂದು ನ್ಯಾಯಾಲಯ ಹೇಳಿದೆ. ಈ ರೀತಿಯ ಧಾರ್ಮಿಕ ವಿಧಿ-ವಿಧಾನಗಳು ನಿಜವಾಗಿ ನಡೆದಿರುವುದಕ್ಕೆ ಪುರಾವೆಗಳಿಲ್ಲದೆ, ಮದುವೆ ಪ್ರಮಾಣಪತ್ರ ಅಥವಾ ಇತರ ದಾಖಲೆಗಳು ಇದ್ದರೂ ಸಹ, ಹಿಂದೂ ಕಾನೂನಿನಡಿ ಮಾನ್ಯವಾದ ವಿವಾಹ ಅಸ್ತಿತ್ವದಲ್ಲಿದೆ ಎಂದು ಹೇಳಲು ಸಾಧ್ಯವಿಲ್ಲ. ಅಂದರೆ, ಆಚರಣೆಗಳೇ ಹಿಂದೂ ವಿವಾಹದ ಮೂಲವಾಗಿದ್ದು, ದಾಖಲೆಗಳು ಅದರ ಬೆಂಬಲ ಮಾತ್ರವೆಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.
ಇನ್ನೂ ಇತ್ತೀಚಿನ ದಿನಗಳಲ್ಲಿ ವೀಸಾ ಪಡೆಯಲು ಅಥವಾ ಕೆಲಸದ ಸೌಲಭ್ಯಗಳಿಗಾಗಿ ಮದುವೆ ಮಾಡಿಕೊಳ್ಳುವ ಮೊದಲೇ ನೋಂದಣಿ ಪ್ರಮಾಣಪತ್ರ ಪಡೆಯುವ ಪ್ರವೃತ್ತಿ ಹೆಚ್ಚುತ್ತಿದೆ. ಇಂತಹ ಅಭ್ಯಾಸಗಳು ಕಾನೂನುಬಾಹಿರ ಮತ್ತು ಅಪಾಯಕಾರಿ ಎಂದು ನ್ಯಾಯಾಲಯ ಕಳವಳ ವ್ಯಕ್ತಪಡಿಸಿದೆ.
ಹಿಂದೂಗಳಲ್ಲಿ ಮದುವೆಯು ವಾಣಿಜ್ಯ ವಹಿವಾಟಲ್ಲ ಎಂದು ನ್ಯಾಯಪೀಠ ಹೇಳಿದೆ. ಪುರುಷ ಮತ್ತು ಮಹಿಳೆಯ ನಡುವೆ ಸಂಬಂಧವನ್ನು ಸ್ಥಾಪಿಸಲು ವಿವಾಹವು ಅಗತ್ಯವಾದ ಪ್ರಕ್ರಿಯೆಯಾಗಿದ್ದು, ಅವರು ಒಟ್ಟಾಗಿ ಒಂದು ಕುಟುಂಬವನ್ನು ರೂಪಿಸುತ್ತಾರೆ, ಇದು ಭಾರತೀಯ ಸಮಾಜದ ಮೂಲ ಘಟಕವಾಗಿದೆ. ವಿವಾಹವು ಒಂದು ಸಂಸ್ಕಾರವಾಗಿದ್ದು, ಸಮಾಜದಲ್ಲಿ ಹೆಚ್ಚಿನ ಮೌಲ್ಯವನ್ನು ಹೊಂದಿರುವ ಸಂಸ್ಥೆಯಾಗಿ ಗುರುತಿಸಲ್ಪಡಬೇಕು ಎಂದು ನ್ಯಾಯಾಲಯ ಹೇಳಿದೆ. ಮದುವೆಯಾಗುವ ಮೊದಲು ಯುವಕರು ಮತ್ತು ಮಹಿಳೆಯರು ಭಾರತೀಯ ಸಮಾಜದಲ್ಲಿ ಈ ಸಂಸ್ಥೆಯ ಪವಿತ್ರತೆಯ ಬಗ್ಗೆ ಆಳವಾಗಿ ಯೋಚಿಸಬೇಕೆಂದು ನಾವು ಒತ್ತಾಯಿಸುತ್ತೇವೆ ಎಂದು ತೀರ್ಪಿನಲ್ಲಿ ಉಲ್ಲೇಖಿಸಲಾಗಿದೆ.
