Gold: ವಿದೇಶಕ್ಕೆ ತೆರಳಿದವರು ಅಲ್ಲಿ ಚಿನ್ನದ ದರ ಕಡಿಮೆ ಇರುತ್ತದೆ ಎಂದು ಭಾರತಕ್ಕೆ ಮರಳುವಾಗ ಹೆಚ್ಚಿನ ಪ್ರಮಾಣದಲ್ಲಿ ಚಿನ್ನವನ್ನು ತೆಗೆದುಕೊಂಡು ಬರುತ್ತಾರೆ. ಆದರೆ ಇದಕ್ಕೆ ಹೆಚ್ಚಿನ ಪ್ರಮಾಣದ ಟ್ಯಾಕ್ಸ್ ಕಟ್ಟಬೇಕಿತ್ತು. ಹೀಗಾಗಿ ಚಿನ್ನ ಖರೀದಿಸುವವರಿಗೆ ಇದು ದೊಡ್ಡ ಚಿಂತೆಯಾಗಿ ಪರಿಣಮಿಸಿತ್ತು. ಆದರೆ ಇದೀಗ ಮೋದಿ ಸರ್ಕಾರವು ವಿದೇಶದಿಂದ ಚಿನ್ನ ತರುವವರಿಗೆ ಗುಡ್ ನ್ಯೂಸ್ ಕೊಟ್ಟಿದ್ದು, ಇನ್ನು ಮುಂದೆ ಟ್ಯಾಕ್ಸ್ ಇಲ್ಲದೆ ವಿದೇಶದಿಂದ ಎಷ್ಟು ಚಿನ್ನ ತರಬಹುದು.
ಹೌದು, ಭಾರತಕ್ಕೆ ಆಗಮಿಸುವ ಪ್ರಯಾಣಿಕರಿಗೆ ಸರ್ಕಾರವು ಬ್ಯಾಗೇಜ್ ನಿಯಮಗಳಲ್ಲಿ ಬದಲಾವಣೆಗಳನ್ನು ತಂದಿದ್ದು, ಚಿನ್ನಾಭರಣಗಳು ಸೇರಿದಂತೆ ಹಲವಾರು ಸರಕುಗಳಿಗೆ ಸುಂಕ-ಮುಕ್ತ ಅನುಮತಿಗಳನ್ನು ವಿಸ್ತರಿಸಿದೆ. ಅಂತೆಯೇ ನೀವು ಚಿನ್ನವನ್ನು ಕೂಡ ಸುಂಕವಿಲ್ಲದೆ ತರಬಹುದು. ಹಾಗಿದ್ರೆ ಎಷ್ಟು ಪ್ರಮಾಣದ ಚಿನ್ನ ತರಬಹುದು ಎಂದು ನೋಡೋಣ.
‘ಒಂದು ವರ್ಷಕ್ಕೂ ಹೆಚ್ಚು ಕಾಲ ವಿದೇಶದಲ್ಲಿ ವಾಸಿಸಿರುವ ಭಾರತೀಯ ಮೂಲದ ನಿವಾಸಿ ಅಥವಾ ಪ್ರವಾಸಿಗರು ಭಾರತಕ್ಕೆ ಹಿಂದಿರುಗಿದಾಗ, ಮಹಿಳಾ ಪ್ರಯಾಣಿಕರು ನಲವತ್ತು ಗ್ರಾಂ ತೂಕದವರೆಗಿನ ಆಭರಣಗಳನ್ನು ಅಥವಾ ಪುರುಷ ಪ್ರಯಾಣಿಕರು ತಮ್ಮ ಸಾಮಾನುಗಳ ಜೊತೆಗೆ ಸುಮಾರು ಇಪ್ಪತ್ತು ಗ್ರಾಂ ತೂಕದವರೆಗಿನ ಆಭರಣಗಳನ್ನು ಸುಂಕ ರಹಿತವಾಗಿ ತರಲು ಅನುಮತಿಸಲಾಗುತ್ತದೆ,’ ಅಂತ ಸಿಬಿಐಸಿ ಹೇಳಿದೆ.
ಮಹಿಳಾ ಪ್ರಯಾಣಿಕರು 40 ಗ್ರಾಂವರೆಗೆ ಚಿನ್ನದ ಆಭರಣಗಳನ್ನು ಮತ್ತು ಪುರುಷ ಪ್ರಯಾಣಿಕರು 20 ಗ್ರಾಂವರೆಗೆ ಚಿನ್ನದ ಆಭರಣಗಳನ್ನು ತರಬಹುದು ಎಂಬುದು ಈ ಹೊಸ ನಿಯಮ ಹೇಳುತ್ತದೆ. ಆದರೆ ಚಿನ್ನದ ಆಭರಣಗಳು ಅವರ ವೈಯಕ್ತಿಕ ಸಾಮಾನುಗಳ ಭಾಗವಾಗಿರಬೇಕು. ಅಲ್ಲದೆ, ಸಿಬ್ಬಂದಿ ಸದಸ್ಯರನ್ನು ಹೊರತುಪಡಿಸಿ ಹದಿನೆಂಟು ವರ್ಷ ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಪ್ರಯಾಣಿಕರಿಗೆ ಮಾತ್ರ ಅವಕಾಶವನ್ನು ಕಲ್ಪಿಸಲಾಗಿದೆ.
