AP: ಇತ್ತೀಚಿನ ದಿನಗಳಲ್ಲಿ ಚಿತ್ರ ವಿಚಿತ್ರವಾದಂತಹ ಪ್ರಕರಣಗಳು ಪೊಲೀಸ್ ಠಾಣೆಯಲ್ಲಿ. ಕೆಲವೊಮ್ಮೆ ಅದಕ್ಕೆ ತಲೆ, ಬುಡ ಏನೋ ಇರುವುದಿಲ್ಲ. ಆದರೂ ಕೂಡ ಯಾವುದಾದರೂ ಒಂದು ಕಾನೂನನ್ನು ಪತ್ತೆ ಮಾಡಿಕೊಂಡು ಕೆಲವರು ದೂರು ದಾಖಲಿಸುತ್ತಾರೆ. ಇದೀಗ ಅಂತದ್ದೇ ಒಂದು ವಿಚಿತ್ರ ಪ್ರಕರಣ ಬೆಳಕಿಗೆ ಬಂದಿದ್ದು ಕುರಿಯ ತಲೆಮಾಂಸ ಎಷ್ಟು ಬೇಯ್ಸಿದರೂ ಕೂಡ ಬೇಯದ ಕಾರಣ ವ್ಯಕ್ತಿ ಒಬ್ಬರು ಪಾತ್ರೆಯನ್ನು ಹಿಡಿದುಕೊಂಡು ಪೊಲೀಸ್ ಠಾಣೆ ಮೆಟ್ಟಿಲೇರಿ ದೂರು ನೀಡಿದ್ದಾರೆ.
ಹೌದು, ಆಂಧ್ರ ಪ್ರದೇಶದ ಅನಂತಪುರ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದೆ. ಪುಟ್ಲೂರು ರಸ್ತೆಯ ನಿವಾಸಿ ಸೋದಲ ಹಾಜಿ ಎಂಬುವವರು ಮಾಂಸ ತುಂಬಿದ ಪಾತ್ರೆಯೊಂದಿಗೆ ಠಾಣೆಗೆ ಬಂದು ಎಷ್ಟೇ ಪ್ರಯತ್ನಿಸಿದರೂ ಮಾಂಸವು ಮೃದುವಾಗಿಲ್ಲ ಅಥವಾ ಸರಿಯಾಗಿ ಬೆಂದಿಲ್ಲ ಎಂದು ತಡಿಪತ್ರಿ ಪಟ್ಟಣ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಲು ಮುಂದಾಗಿದ್ದಾರೆ. ದೂರುದಾರರ ಕಂಪ್ಲೇಂಟ್ ಕೇಳಿ ಪೊಲೀಸರೇ ಶಾಕ್ ಆಗಿದ್ದಾರೆ.
ಸೋದಲ ಹಾಜಿ ಅವರು ಯುಗಾದಿ ಆಚರಣೆಯ ಸಂದರ್ಭದಲ್ಲಿ ಕುರಿ ತಲೆ ಮಾಂಸವನ್ನು ಖರೀದಿಸಿದ್ದರು. ಸಾಂಪ್ರದಾಯಿಕ ತಲೆ ಮಾಂಸದ ಕರಿ (ತಲಕುರ) ತಯಾರಿಸಲು ಪ್ರಾರಂಭಿಸಿದ್ದಾರೆ. ಆದರೆ, ಸುಮಾರು 20 ಬಾರಿ ಪ್ರಯತ್ನಗಳ ನಂತರವೂ, ಮಾಂಸವು ಬೇಯದೆ ಹಾಗೆ ಗಟ್ಟಿಯಾಗಿತ್ತು. ಇದು ದೂರುದಾರರಿಗೆ ತಲೆನೋವಾಗಿ ಪರಿಣಮಿಸಿದೆ.
ಇದರಿಂದ ನಿರಾಶೆಗೊಂಡು ಗೊಂದಲಕ್ಕೊಳಗಾದ ಹಾಜಿ, ಮಾಂಸವಿದ್ದ ಇಡೀ ಪಾತ್ರೆಯನ್ನು ನೇರವಾಗಿ ಪೊಲೀಸ್ ಠಾಣೆಗೆ ತಂದಿದ್ದಾರೆ. ಬಳಿಕ ಪೊಲೀಸರು ಮಧ್ಯ ಪ್ರವೇಶಿಸಿ ಮಾಂಸ ಮಾರಾಟಗಾರರಿಗೆ ಕರೆ ಮಾಡಿ ವಿಚಾರವನ್ನು ತಿಳಿಸಿದಾಗ ಬಹುಶಹ ಆ ಮಾಂಸ ಬಲಿತಿರಬಹುದು ಎಂದು ಬೇರೆ ಕುರಿ ಮಾಂಸವನ್ನು ಕೊಡಲು ಒಪ್ಪಿಕೊಂಡಿದ್ದಾರೆ. ಇಲ್ಲಿಗೆ ಪ್ರಕರಣ ಸುಖಾಂತ್ಯವನ್ನು ಕಂಡಿದೆ.
