Aishwarya Lakshmi : ಇತ್ತೀಚಿನ ದಿನಗಳಲ್ಲಿ ಹೆಚ್ಚಿನ ನಟಿಯರು ಮದುವೆಯ ಬಗ್ಗೆ ಆಸಕ್ತಿಯನ್ನೇ ತೋರದೆ, ಆ ಕುರಿತಾಗಿ ತಮ್ಮ ಮನಸ್ಸು ಇಚ್ಛೆ ಹೇಳಿಕೆಗಳನ್ನು ಹೊರಬಿಡುತ್ತಿದ್ದಾರೆ. ಅಂತೆಯೇ ಇದೀಗ ನಟಿ ಐಶ್ವರ್ಯ ಲಕ್ಷ್ಮಿ ಅವರು ಮದುವೆ ಬಗ್ಗೆ ಹಂಚಿಕೊಂಡಿರುವ ಅಭಿಪ್ರಾಯ ಸೋಷಿಯಲ್ ಮೀಡಿಯಾದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
ಐಶ್ವರ್ಯ ಲಕ್ಷ್ಮಿ ಅವರ ದೃಷ್ಟಿಯಲ್ಲಿ, “ಸಂಬಂಧ ಅನ್ನೋದು ಇಬ್ಬರು ವ್ಯಕ್ತಿಗಳ ನಡುವಿನ ತಿಳುವಳಿಕೆ, ನಂಬಿಕೆ ಮತ್ತು ಗೌರವವನ್ನು ಆಧರಿಸಿದೆ. ಅದು ಕೇವಲ ಕಾನೂನಿಂದ ಬಲಗೊಳ್ಳುವುದಿಲ್ಲ. ಕೆಲವರು ಮದುವೆ ಇಲ್ಲದೆಯೂ ಸಂತೋಷವಾಗಿ ಬದುಕಬಹುದು. ನನ್ನ 34 ವರ್ಷಗಳ ಜೀವನದಲ್ಲಿ ನಾನು ಅನೇಕ ಮದುವೆಗಳನ್ನು, ಅನೇಕ ಜನರನ್ನು ನೋಡಿದ್ದೇನೆ. ಆದರೆ ಅವರೆಲ್ಲರೂ ನಿಜವಾಗಿಯೂ ಸಂತೋಷವಾಗಿರುವ ದಂಪತಿಗಳು ಕಡಿಮೆ. ಕೈಬೆರಳೆಣಿಕೆಯಷ್ಟು ಮಂದಿ ಮಾತ್ರ ಸಿಗುತ್ತಾರೆ” ಎಂದು ಹೇಳುತ್ತಾರೆ.
ಅಲ್ಲದೆ “ಮದುವೆ ಒಂದು ತಪ್ಪು ಅಥವಾ ಅನಗತ್ಯ ಎಂದು ಅವರು ಹೇಳಿಲ್ಲ. ಬದಲಾಗಿ, ಅದು ಪ್ರತಿಯೊಬ್ಬರ ವೈಯಕ್ತಿಕ ಆಯ್ಕೆ ಎಂದು ಒತ್ತಿ ಹೇಳುತ್ತಾರೆ. ಕೆಲವರಿಗೆ ಮದುವೆ ಭದ್ರತೆ ಮತ್ತು ಸಾಮಾಜಿಕ ಮನ್ನಣೆ ನೀಡಬಹುದು; ಇತರರಿಗೆ, ಸ್ವತಂತ್ರವಾಗಿ ಬದುಕುವ ಸಂಬಂಧಗಳು ಸೂಕ್ತವಾಗಿರಬಹುದು. ಯಾವುದೇ ಸಂಬಂಧವಿರಲಿ, ಪರಸ್ಪರ ಗೌರವ, ನಂಬಿಕೆ ಮತ್ತು ಜವಾಬ್ದಾರಿ ಇರಬೇಕು. ಮದುವೆಗಿಂತ ಸಂಬಂಧ, ಪ್ರೀತಿ ದೊಡ್ಡದು. ಅದಕ್ಕೆ ನನ್ನ ಬೆಂಬಲ ಎಂದು ಅವರು ಹೇಳಿದ್ದಾರೆ.