ತಾನು ಮದುವೆಯಾದ ಹೆಂಡತಿಗೆ ಶಿಕ್ಷಕಿಯಾಗಬೇಕೆಂಬ ಕನಸು. ಹೀಗಾಗಿ ಆತ ತನ್ನ ಜಮೀನು ಎಲ್ಲವನ್ನು ಮಾರಿ, ಕಷ್ಟಪಟ್ಟು ಹಣ ಹೊಂದಿಸಿ ತನ್ನ ಹೆಂಡತಿಯನ್ನು ಓದಿಸಿ ಶಿಕ್ಷಕಿಯನ್ನಾಗಿಸಿದ. ಆದರೆ ಈ ಪುಣ್ಯಾತಗಿತ್ತಿ ಕೆಲಸ ಸಿಗುತ್ತಿದ್ದಂತೆ ಗಂಡ ಹಾಗೂ ಮಗನನ್ನು ಬಿಟ್ಟು ಪ್ರಿಯಕರೊಂದಿಗೆ ಪರಾರಿಯಾಗಿರುವ ಅಚ್ಚರಿ ಘಟನೆ ಒಂದು ಬಿಹಾರದಲ್ಲಿ ನಡೆದಿದೆ.
ಸಿನಿಮೀಯ ಶೈಲಿಯ ಈ ಘಟನೆ ಬಿಹಾರದ ವೈಶಾಲಿ ಜಿಲ್ಲೆಯ ಹಾಜಿಪುರದಲ್ಲಿ ನಡೆದಿದೆ. ಅಮನ್ ಕುಮಾರ್ ಎಂಬುವವ ತನ್ನ ಪತ್ನಿ ಗುಂಜನ್ ಕುಮಾರಿಯನ್ನು ಬಿಪಿಎಸ್ಸಿ (BPSC) ಪರೀಕ್ಷೆ ಪಾಸ್ ಮಾಡಿಸಲು, ಆಕೆಯನ್ನು ಓದಿಸಲು ತನ್ನ ಆಸ್ತಿ ಪಾಸ್ತಿ ಎಲ್ಲವನ್ನು ಮಾರಿಕೊಂಡಿದ್ದ. ಆದರೆ ಸರ್ಕಾರಿ ಶಾಲಾ ಶಿಕ್ಷಕಿಯಾಗಿ ನೇಮಕವಾಗುತ್ತಿದ್ದಂತೆ ಆಕೆ ಗಂಡ ಮತ್ತು ಹತ್ತು ವರ್ಷದ ಮಗನನ್ನು ಬೀದಿಗೆ ತಳ್ಳಿದ್ದಾಳೆ.
ಇದೀಗ ಅಮನ್ ಕುಮಾರ್ ಹೆಂಡತಿಯನ್ನು ದೊಡ್ಡ ಅಧಿಕಾರಿಯನ್ನಾಗಿ ಮಾಡಬೇಕು, ಆಕೆಯ ಕನಸನ್ನು ನನಸು ಮಾಡಬೇಕು ಅಂತ ಹಗಲಿರುಳು ಕಷ್ಟಪಟ್ಟೆ. ಆದರೆ ಕೆಲಸ ಸಿಕ್ಕಿದ ಮೇಲೆ ಅವಳು ನನ್ನನ್ನೇ ಮರೆತುಬಿಟ್ಟಳು ಎಂದು ಅಮನ್ ಕಣ್ಣೀರು ಹಾಕಿದ್ದಾರೆ. ಅವರು ನೀಡುವ ಮಾಹಿತಿಯ ಪ್ರಕಾರ, ಇವರಿಬ್ಬರಿಗೂ 2013 ರಲ್ಲಿ ವಿವಾಹವಾಗಿತ್ತು. ಮದುವೆಯಾಗುವಾಗ ಗುಂಜನ್ ಕೇವಲ ಇಂಟರ್ಮೀಡಿಯೇಟ್ (ಪಿಯುಸಿ) ಮುಗಿಸಿದ್ದರು. ಆದರೆ ಮುಂದೆ ಓದಿ ಶಿಕ್ಷಕಿಯಾಗಬೇಕು ಎಂಬ ದೊಡ್ಡ ಆಸೆ ಆಕೆಗಿತ್ತು. ಅಮನ್ ಆರ್ಥಿಕವಾಗಿ ಅಷ್ಟೊಂದು ಸಬಲರಾಗಿರದಿದ್ದರೂ, ಹೆಂಡತಿಯ ಆಸೆಗೆ ಅಡ್ಡಿ ಬರಲಿಲ್ಲ. ಕೂಲಿ ಮಾಡಿ ಆಕೆಯ ಓದಿಗೆ ಯಾವುದೇ ತೊಂದರೆಯಾಗದಂತೆ ನೋಡಿಕೊಂಡರು.
ಅಷ್ಟೇ ಅಲ್ಲದೇ, 2022 ರಲ್ಲಿ ಗುಂಜನ್ ಅವರ ಪದವಿ ಬಿ.ಎಡ್ (B.Ed) ಹಾಗೂ ಬಿಪಿಎಸ್ಸಿ (BPSC) ಶಿಕ್ಷಕರ ನೇಮಕಾತಿ ಪರೀಕ್ಷೆಯ ಕೋಚಿಂಗ್ ಮತ್ತು ಫೀಸ್ ಕಟ್ಟಲು ಹಣವಿಲ್ಲದಿದ್ದಾಗ, ಅಮನ್ ತಮಗೆ ಸೇರಿದ ಪೂರ್ವಜರ ಪಿತ್ರಾರ್ಜಿತ ಭೂಮಿಯನ್ನು ಕೂಡ ಮಾರಾಟ ಮಾಡಿದ್ದರು. ಗಂಡನ ಇಷ್ಟೆಲ್ಲಾ ತ್ಯಾಗದ ಫಲವಾಗಿ ಗುಂಜನ್ 2023 ರಲ್ಲಿ ಬಿಪಿಎಸ್ಸಿ ಪರೀಕ್ಷೆಯಲ್ಲಿ ಉತ್ತಮ ಅಂಕಗಳೊಂದಿಗೆ ಉತ್ತೀರ್ಣರಾದರು. ಸುಪೌಲ್ ಜಿಲ್ಲೆಯಲ್ಲಿ ತರಬೇತಿ ಮುಗಿಸಿದ ನಂತರ ಅವರಿಗೆ ಬಿದುಪುರ ಬ್ಲಾಕ್ನ ಸರ್ಕಾರಿ ಶಾಲೆಯೊಂದರಲ್ಲಿ ಶಿಕ್ಷಕಿ ಉದ್ಯೋಗವೂ ಸಿಕ್ಕಿತು. ಗುಂಜನ್ಗೆ ಸರ್ಕಾರಿ ಕೆಲಸದ ಆರ್ಡರ್ ಕಾಪಿ ಕೈಗೆ ಸಿಗುತ್ತಿದ್ದಂತೆ ಆಕೆಯ ನಡವಳಿಕೆಯಲ್ಲಿ ಸಂಪೂರ್ಣ ಬದಲಾವಣೆ ಕಂಡುಬಂತು. ಗಂಡ ಮತ್ತು ಮಗನಿಂದ ದೂರ ಸರಿಯಲು ಆರಂಭಿಸಿದಳು. ಶಿಕ್ಷಕರ ತರಬೇತಿಯ ಸಮಯದಲ್ಲಿ ಗುಂಜನ್ ತನ್ನ ಹಳೆಯ ಕಾಲೇಜು ಸ್ನೇಹಿತನ ಜೊತೆ ಮತ್ತೆ ನಿಕಟ ಸಂಬಂಧ ಬೆಳೆಸಿಕೊಂಡಿದ್ದಾಳೆ. ಇದೇ ಕಾರಣಕ್ಕೆ ಈಗ ಗಂಡ ಮತ್ತು ಹತ್ತು ವರ್ಷದ ಮಗನ ಜೊತೆ ಬಾಳಲು ಆಕೆ ನಿರಾಕರಿಸುತ್ತಿದ್ದಾಳೆ ಎಂದು ಅಮನ್ ಗಂಭೀರ ಆರೋಪ ಮಾಡಿದ್ದಾರೆ.
ಗುಂಜನ್ ತನ್ನ ಗಂಡನಿಗೆ ಗೊತ್ತಿಲ್ಲದಂತೆ ಹಾಜಿಪುರದಲ್ಲಿ ಪ್ರತ್ಯೇಕವಾಗಿ ಬಾಡಿಗೆ ಮನೆಯೊಂದನ್ನು ಮಾಡಿಕೊಂಡು ವಾಸಿಸುತ್ತಿದ್ದಳು. ಹೇಗೋ ವಿಷಯ ತಿಳಿದುಕೊಂಡ ಅಮನ್ ಕುಮಾರ್, ಗುರುವಾರ ನೇರವಾಗಿ ಆಕೆ ಇದ್ದ ಬಾಡಿಗೆ ಮನೆಗೆ ತೆರಳಿದ್ದಾರೆ. ಅಲ್ಲಿ ಗುಂಜನ್ ತನ್ನ ಪ್ರಿಯಕರನೊಂದಿಗೆ ಇರುವುದನ್ನು ಕಂಡು ಅಮನ್ ಶಾಕ್ ಆಗಿದ್ದಾರೆ. ತಕ್ಷಣವೇ ಅವರು ಸ್ಥಳೀಯ ಪೊಲೀಸರಿಗೆ ಮಾಹಿತಿ ನೀಡಿದ್ದು, ಈ ವೇಳೆ ಇಡೀ ಏರಿಯಾದಲ್ಲಿ ದೊಡ್ಡ ಗದ್ದಲವೇ ಸೃಷ್ಟಿಯಾಗಿದೆ. ಸದ್ಯ ಈ ಘಟನೆ ಸೋಶಿಯಲ್ ಮೀಡಿಯಾದಲ್ಲಿ ವೈರಲಾಗುತ್ತಿದೆ.