Euthanasia : ಕೆಲವು ದಿನಗಳ ಹಿಂದೆ 13 ವರ್ಷದಿಂದ ಕೋಮಾದಲ್ಲಿರುವ 32 ವರ್ಷದ ಹರೀಶ್ ರಾಣಾ ದಯಾಮರಣಕ್ಕೆ ಅನುಮತಿ ನೀಡಿ ಸುಪ್ರೀಂ ಕೋರ್ಟ್ ಮಹತ್ವದ ತೀರ್ಪು ನೀಡಿದ್ದು, ಇದು ಭಾರತದಲ್ಲಿ ನ್ಯಾಯಾಲಯವು ನೀಡಿದ ಮೊದಲ ದಯಾಮರಣ ಪ್ರಕರಣ ಎಂದು ಐತಿಹಾಸಿಕ ಮಹತ್ವವನ್ನು ಪಡೆದುಕೊಂಡಿತ್ತು. ಈ ಬೆನ್ನಲ್ಲೇ ಇದೀಗ 25 ವರ್ಷದ ಯುವತಿ ಒಬ್ಬಳು ಸುದೀರ್ಘ ಕಾನೂನು ಹೋರಾಟ ಮಾಡಿ ದಯಾಮರಣದ ಆಯ್ಕೆ ಮಾಡಿಕೊಂಡಿದ್ದಾಳೆ.
ಹೌದು, ಸ್ಪೇನ್ ದೇಶದ 25ವರ್ಷದ ನೋಲಿಯಾ ಎಂಬ ಯುವತಿ ದೀರ್ಘಕಾಲದ ಕಾನೂನು ಹೋರಾಟದ ಬಳಿಕ, ಇಚ್ಛಾಮರಣ (Euthanasia) ಆಯ್ಕೆ ಮಾಡಿಕೊಂಡಿದ್ದಾಳೆ. ಹಲವು ವರ್ಷಗಳ ದೈಹಿಕ ನೋವು ಮತ್ತು ಮಾನಸಿಕ ಯಾತನೆಯಿಂದ ಬಳಲುತ್ತಿದ್ದ ಕಾರಣ ಈಕೆ ಈ ನಿರ್ಧಾರಕ್ಕೆ ಬಂದಿದ್ದಾಳೆ. ಹಾಗಿದ್ರೆ ಆಕೆಗೆ ಇದ್ದ ಸಮಸ್ಯೆ ಏನು?
ಬಾರ್ಸಿಲೋನಾ ಮೂಲದ ನೋಲಿಯಾ ಅವರು ತಮ್ಮ ಜೀವನದಲ್ಲಿ 2022ರಲ್ಲಿ ನಡೆದ ಘೋರ ಘಟನೆಯಿಂದ ಜರ್ಜರಿತರಾಗಿದ್ದಾರೆ. ಅದೇನೆಂದರೆ ಮಾದಕ ವ್ಯಸನಿಗಳಿಗಾಗಿ ಇದ್ದ ಸರಕಾರಿ ಮೇಲ್ವಿಚಾರಣೆಯ ಕೇಂದ್ರದಲ್ಲಿ ಈಕೆ ಇದ್ದಾಗ ಅಲ್ಲಿ ಮೂವರು ಪುರುಷರು ಆಕೆಯ ಮೇಲೆ ಸಾಮೂಹಿಕ ಲೈಂಗಿಕ ದೌರ್ಜನ್ಯ ಎಸಗಿದರು. ಇದರಿಂದ ಬದುಕುಳಿದರೂ ಮಾನಸಿಕ ಆಘಾತಕ್ಕೆ ತುತ್ತಾದರು. ಕೆಲವು ತಿಂಗಳ ಬಳಿಕ, ಐದನೇ ಮಹಡಿಯಿಂದ ಜಿಗಿದು ಆತ್ಮಹತ್ಯೆಗೆ ಯತ್ನಿಸಿದರು. ಆದರೆ ಅಲ್ಲೂ ಅವರು ಬದುಕುಳಿದರು. ಬೆನ್ನುಹುರಿಗೆ ಆದ ಭಾರೀ ಗಾಯಗಳಿಂದಾಗಿ ಆಕೆಗೆ ಸೊಂಟದಿಂದ ಕೆಳಗೆ ಶಾಶ್ವತ ಪಾರ್ಶ್ವವಾಯುವಿಗೆ (paralysis) ತುತ್ತಾದರು. ಆಗಿನಿಂದ ಅವರು ವೀಲ್ಚೇರ್ನಲ್ಲೇ ಬದುಕುತ್ತಿದ್ದಾರೆ. ನಿರಂತರ ದೈಹಿಕ ನೋವು. ಜೊತೆಗೆ ನಿದ್ರೆ ಬಾರದ ಸಮಸ್ಯೆ. ಆಹಾರ ಸೇವನೆ ಸರಿಯಾಗದ ಸಮಸ್ಯೆ, ತೆಗೆದುಕೊಂಡ ಆಹಾರ ನಿಲ್ಲುವುದಿಲ್ಲ. ನೂರಾರು ರೀತಿಯ ಮಾತ್ರೆ, ಔಷಧಗಳ ಸೇವನೆ ಹೀಗೆ ಹಲವಾರು ವಿಚಾರಗಳಿಂದ ಅವರು ರೋಸಿ ಹೋಗಿದ್ದಾರೆ.
ಸ್ಪೇನ್ನಲ್ಲಿ 2021ರಲ್ಲಿ ಇಚ್ಛಾಮರಣ ಕಾನೂನುಬದ್ಧಗೊಂಡ ನಂತರ, ನೋಲಿಯಾ 2024ರಲ್ಲಿ ಮರಣಕ್ಕಾಗಿ ಅರ್ಜಿ ಸಲ್ಲಿಸಿದ್ದು ಅವರ ಎಲ್ಲ ಸ್ಥಿತಿಗಳನ್ನು ಅವಲೋಕಿಸಿ ನ್ಯಾಯಾಲಯವು ದಯಾಮರಣವನ್ನು ಕರುಣಿಸಿದೆ. ನೋಲಿಯಾ ಅವರ ಪೋಷಕರು ಇದಕ್ಕೆ ವಿರುದ್ಧವಾಗಿ ನ್ಯಾಯಕ್ಕೆ ಆಫೀಲು ಸಲ್ಲಿಸಿದರು ಕೂಡ ಅದು ತಿರಸ್ಕೃತಗೊಂಡಿದೆ. ಇನ್ನು ನೋಲಿಯಾ ಅವರು ತಮ್ಮ ಕೊನೆಯ ಕ್ಷಣಗಳು ಹೇಗಿರಬೇಕು ಎಂಬ ಬಗ್ಗೆ ಕೂಡ ಮಾತನಾಡಿದ್ದಾರೆ. ತಮ್ಮ ಇಷ್ಟದ ಉಡುಪು ಮತ್ತು ಮೇಕಪ್ನಲ್ಲಿ ಶಾಂತಿಯುತವಾಗಿ ಬದುಕಿಗೆ ವಿದಾಯ ಹೇಳಲು ಬಯಸುತ್ತೇನೆ ಎಂದಿದ್ದಾರೆ.
ಇನ್ನು ಕೊನೆಗೂ ನೋಲಿಯಾ ಕ್ಯಾಸ್ಟಿಲ್ಲೋ ಅವರು ಗುರುವಾರ ಆರೈಕೆ ಕೇಂದ್ರದಲ್ಲಿ ಇಚ್ಛಾಮರಣಕ್ಕೆ ಒಳಗಾದರು. ತಮ್ಮ ನೋವಿನಿಂದ ಮುಕ್ತರಾಗಲು ಮತ್ತು ಶಾಂತಿಯನ್ನು ಕಂಡುಕೊಳ್ಳಲು ಈ ನಿರ್ಧಾರ ಕೈಗೊಂಡಿರುವುದಾಗಿ ಅವರು ಅಂತಿಮ ಸಂದೇಶ ನೀಡಿದರು. ಈ ಘಟನೆ, ಇಚ್ಛಾಮರಣದ ಬಗ್ಗೆ ಜಗತ್ತಿನಾದ್ಯಂತ ಮತ್ತೆ ಚರ್ಚೆಗೆ ಕಾರಣವಾಗಿದೆ.