# ಗಂಡನ ಕುಡಿತ ಬಿಡಿಸಲು ಮಂತ್ರವಾದಿ ಮೊರೆ ಹೋದ ಪತ್ನಿ – ತಂತ್ರದ ಹೆಸರಲ್ಲಿ 10 ತಿಂಗಳು ನಡೆದಿದ್ದೇನು?

- Link: https://hosakannada.com/news/wife-turns-to-a-sorcerer-to-cure-husbands-drinking-habit-what-transpired-over-10-months-under-the-guise-of-occult-rituals/
- Published: 2026-09-13T11:16:06+00:00
- Author: ಹೊಸಕನ್ನಡ ನ್ಯೂಸ್

ಪತಿಯ ಮದ್ಯದ ಚಟ ಬಿಡಿಸಬೇಕು ಎಂಬ ಉದ್ದೇಶದಿಂದ ತಾಂತ್ರಿಕನ ಮೊರೆ ಹೋದ ವಿವಾಹಿತ ಮಹಿಳೆಯೊಬ್ಬರಿಗೆ
ಆಘಾತಕಾರಿ ಅನುಭವವಾಗಿದೆ. ಹಾಗಿದ್ರೆ 10 ತಿಂಗಳಲ್ಲಿ ನಡೆದಿದ್ದೇನು ಗೊತ್ತಾ?

Sponsored

ಮಧ್ಯಪ್ರದೇಶದ ಗ್ವಾಲಿಯರ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದ್ದು, ತಂತ್ರ-ಮಂತ್ರದ ಮೂಲಕ ಪತಿಯ
ಕುಡಿತದ ಚಟ ಬಿಡಿಸುವುದಾಗಿ ನಂಬಿಸಿದ ವ್ಯಕ್ತಿಯೊಬ್ಬ ಮಹಿಳೆಯ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ
ಎಂಬ ಆರೋಪ ಕೇಳಿಬಂದಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಆರೋಪಿ ಕಮಲ್ ರಾಥೋರ್ ಅಲಿಯಾಸ್ ಪಟೇಲ್
ಎಂಬಾತನನ್ನು ಬಂಧಿಸಿದ್ದಾರೆ.

Advertisement

Advertisement

ಅಷ್ಟಕ್ಕೂ ಆಗಿದ್ದೇನು?

ಸುಮಾರು ಒಂದು ವರ್ಷದ ಹಿಂದೆ ಪತಿಯ ಮದ್ಯದ ಚಟ ಬಿಡಿಸುವ ಉದ್ದೇಶದಿಂದ ಮಹಿಳೆ ದೇವಸ್ಥಾನಕ್ಕೆ ತೆರಳಿದ್ದರು.
ಅಲ್ಲಿಗೆ ಬಂದಿದ್ದ ಕಮಲ್ ರಾಥೋರ್ ಅಲಿಯಾಸ್ ಪಟೇಲ್, ತಾನು ತಾಂತ್ರಿಕ ಎಂದು ಪರಿಚಯಿಸಿಕೊಂಡಿದ್ದಾನೆ
ಎನ್ನಲಾಗಿದೆ. ಪತಿಯ ಮದ್ಯದ ಚಟವನ್ನು ಬಿಡಿಸುವುದಾಗಿ ಹೇಳಿ ಮಹಿಳೆಗೆ ಹಲವು ಬಾರಿ ಭಸ್ಮ ನೀಡಿದ್ದಾನೆ.
ಈ ಮೂಲಕ ಆಕೆಯೊಂದಿಗೆ ಪರಿಚಯ ಬೆಳೆಸಿಕೊಂಡ ಆರೋಪಿ, ಬಳಿಕ ಮಹಿಳೆಯ ಮನೆಗೂ ಆಗಾಗ್ಗೆ ಭೇಟಿ ನೀಡುತ್ತಿದ್ದ
ಎಂದು ದೂರಿನಲ್ಲಿ ತಿಳಿಸಲಾಗಿದೆ.

**ಲಡ್ಡು ನೀಡಿ ಪ್ರಜ್ಞೆ ತಪ್ಪಿಸಿ ದೌರ್ಜನ್ಯ?**

ಮಹಿಳೆಯ ದೂರಿನ ಪ್ರಕಾರ, 2025ರ ಅಕ್ಟೋಬರ್‌ನಲ್ಲಿ ಆರೋಪಿ ಮಧ್ಯಾಹ್ನದ ವೇಳೆಯಲ್ಲಿ ಆಕೆಯ ಮನೆಗೆ ಬಂದಿದ್ದಾನೆ.
ತಂತ್ರ-ಮಂತ್ರ ಮಾಡಿರುವುದಾಗಿ ಹೇಳಿ ಪ್ರಸಾದದ ರೂಪದಲ್ಲಿ ಲಡ್ಡು ನೀಡಿದ್ದಾನೆ. ಲಡ್ಡು ತಿಂದ ಬಳಿಕ
ತಾನು ಪ್ರಜ್ಞೆ ಕಳೆದುಕೊಂಡಿದ್ದು, ಇದೇ ಸಂದರ್ಭದಲ್ಲಿ ಆರೋಪಿ ತನ್ನ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದಾನೆ
ಎಂದು ಮಹಿಳೆ ಆರೋಪಿಸಿದ್ದಾರೆ. ಘಟನೆಯ ಬಳಿಕ ಈ ವಿಚಾರವನ್ನು ಯಾರಿಗಾದರೂ ತಿಳಿಸಿದರೆ ಸಮಾಜದಲ್ಲಿ 
ತನ್ನನ್ನು ಕೆಟ್ಟದಾಗಿ ಬಿಂಬಿಸುವುದಾಗಿ ಹಾಗೂ ಪತಿಯನ್ನು ಕೊಲೆ ಮಾಡುವುದಾಗಿ ಆರೋಪಿ ಬೆದರಿಸಿದ್ದಾನೆ
ಎನ್ನಲಾಗಿದೆ.

**ಸುಮಾರು 10 ತಿಂಗಳ ಕಾಲ ಶೋಷಣೆ ಆರೋಪ**

ಮಹಿಳೆಯ ಮೌನದ ಲಾಭ ಪಡೆದ ಆರೋಪಿ ನಿರಂತರವಾಗಿ ಆಕೆಯನ್ನು ಶೋಷಿಸುತ್ತಿದ್ದ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.
ಕೊನೆಯದಾಗಿ 2026ರ ಆಗಸ್ಟ್ 8ರಂದು ಆರೋಪಿ ತನ್ನ ಮೇಲೆ ದೌರ್ಜನ್ಯ ಎಸಗಿದ್ದಾನೆ ಎಂದು ಮಹಿಳೆ ಪೊಲೀಸರಿಗೆ
ತಿಳಿಸಿದ್ದಾರೆ. ನಿರಂತರ ಕಿರುಕುಳದಿಂದ ಬೇಸತ್ತ ಮಹಿಳೆ ಕೊನೆಗೆ ಸೆಪ್ಟೆಂಬರ್ 6ರಂದು ಧೈರ್ಯ ಮಾಡಿ
ತನ್ನ ಆಪ್ತ ಸ್ನೇಹಿತೆ ಹಾಗೂ ಪತಿಗೆ ನಡೆದ ಸಂಪೂರ್ಣ ವಿಚಾರವನ್ನು ತಿಳಿಸಿದ್ದಾರೆ. ಬಳಿಕ ಅವರೊಂದಿಗೆ
ಪೊಲೀಸ್ ಠಾಣೆಗೆ ತೆರಳಿ ದೂರು ದಾಖಲಿಸಿದ್ದಾರೆ.

Advertisement
