# ವಿಟ್ಲ: ಕ್ರಿಕೆಟ್‌ ಪಂದ್ಯಾಟದ ಸ್ಕೋರ್‌ ವಿಚಾರಕ್ಕೆ ಗಲಾಟೆ, ಯುವಕನ ಮೇಲೆ ಹಲ್ಲೆ, ದೂರು ದಾಖಲು

- Link: https://hosakannada.com/news/vitla-clash-over-cricket-match-score-youth-attacked-complaint-filed/
- Published: 2026-10-13T19:02:09+00:00
- Author: ಹೊಸಕನ್ನಡ ನ್ಯೂಸ್

ವಿಟ್ಲ: ಕ್ರಿಕೆಟ್‌ ಪಂದ್ಯಾಟದಲ್ಲಿ ಸ್ಕೋರ್‌ ವಿಚಾರಕ್ಕೆ ಸಂಬಂಧಿಸಿದಂತೆ ಮೂವರು ಯುವಕರು ಹಲ್ಲೆ 
ಮಾಡಿ ಜೀವ ಬೆದರಿಕೆ ಹಾಕಿರುವ ಕುರಿತು ಆರೋಪಿಸಿ ಯುವಕನೊಬ್ಬ ವಿಟ್ಲ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ.

Sponsored

ರಿಜ್ವಾನ್‌ (20) ಹಲ್ಲೆಗೊಳಗಾದ ಯುವಕ. ಅ.11 ರಂದು ಶರೀಫ್‌ ಮತ್ತು ನಶಾತ್‌ ಅವರು 18 ವರ್ಷದೊಳಗಿನ
ಮಕ್ಕಳ ಆಹ್ವಾನಿತ ಎಂಟು ತಂಡಗಳ ಕ್ರಿಕೆಟ್‌ ಪಂದ್ಯಾಟವನ್ನು ವೀಕ್ಷಿಸಲು ಮಾಣಿ ಗ್ರಾಮ ಪಂಚಾಯತ್‌ ಮೈದಾನಕ್ಕೆ
ಹೋಗಿದ್ದರು.

Advertisement

Advertisement

ಮಧ್ಯಾಹ್ನ 3.30ರ ವೇಳೆಗೆ ಜಿಎಫ್‌ಸಿ ಗಡಿಯಾರ ಮತ್ತು ಮಾಣಿ ತಂಡಗಳ ನಡುವೆ ಪಂದ್ಯ ನಡೆಯುತ್ತಿದ್ದಾಗ
ಸ್ಕೋರ್‌ ವಿಚಾರಕ್ಕೆ ಮಾತಿನ ಚಕಮಕಿ ನಡೆದಿದೆ. ಈ ವೇಳೆ ಗಡಿಯಾರ ತಂಡದ ಸಮ್ಮಾಸ್‌ ಎನ್ನುವಾತ ರಿಜ್ವಾನ್‌
ಅವರ ಸ್ನೇಹಿತ ನಶಾತ್‌ಗೆ ಅವಾಚ್ಯ ಶಬ್ದಗಳಿಂದ ಬೈದಿದ್ದಾನೆ ಎನ್ನಲಾಗಿದೆ.

ಇದನ್ನು ಪ್ರಶ್ನೆ ಮಾಡಿದ ರಿಜ್ವಾನ್‌ನ ತಲೆ ಮತ್ತು ಮುಖದ ಭಾಗಕ್ಕೆ ಸಮ್ಮಾಸ್‌ ಹಾಗೂ ಆತನ ಇಬ್ಬರು 
ಸ್ನೇಹಿತರು ಹಲ್ಲೆ ಮಾಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಸ್ಥಳದಲ್ಲಿದ್ದವರು ಹಲ್ಲೆಯನ್ನು
ತಡೆದಿದ್ದು, ನಂತರ ಸಮ್ಮಾಸ್‌ ಅಲ್ಲಿಂದ ತೆರಳುತ್ತಿರುವಾಗ ಕೊಲ್ಲುವುದಾಗಿ ಬೆದರಿಕೆ ಹಾಕಿದ್ದಾನೆ 
ಎಂದು ಆರೋಪಿಸಲಾಗಿದೆ.

ಹಲ್ಲೆಯಿಂದ ಗಾಯಗೊಂಡ ರಿಜ್ವಾನ್‌ ವಿಟ್ಲ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ಚಿಕಿತ್ಸೆ ಪಡೆದಿದ್ದಾರೆ.
ಈ ಕುರಿತು ವಿಟ್ಲ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರಿದಿದೆ.

Advertisement