# ರೇಣುಕಾಸ್ವಾಮಿ ಕೊಲೆ ಆರೋಪಿಗಳಿಗೆ ನಡುಕ – ದರ್ಶನ್ ಆಪ್ತ ಗೆಳೆಯ ಪ್ರದೋಶ್‌ ಕರಾಳ ಸತ್ಯ ಬಯಲು!!

- Link: https://hosakannada.com/news/trembling-for-the-accused-in-renukaswamys-murder-darshans-close-friend-pradosh-karalas-dark-truth-is-revealed/
- Published: 2026-08-10T15:27:32+00:00
- Author: ಹೊಸಕನ್ನಡ ನ್ಯೂಸ್

ರಾಜಧಾನಿಯನ್ನು ಬೆಚ್ಚಿಬೀಳಿಸಿದ್ದ ಚಿತ್ರದುರ್ಗದ ರೇಣುಕಾಸ್ವಾಮಿ ಭೀಕರ ಕೊಲೆ ಪ್ರಕರಣದಲ್ಲಿ ದಿನಕ್ಕೊಂದು
ಹೊಸ ತಿರುವು ಸಿಗುತ್ತಿದ್ದು, ಇದೀಗ ಪ್ರಕರಣದ ಪ್ರಮುಖ ಆರೋಪಿಗಳಲ್ಲಿ ಒಬ್ಬನಾದ ಪ್ರದೂಶ್ ಜೈಲು ವಾಸಕ್ಕೆ
ಬೇಸತ್ತು ಹೊರಬರಲು ಕಸರತ್ತು ನಡೆಸುತ್ತಿದ್ದು, ನ್ಯಾಯಾಲಯಕ್ಕೆ ಮಾಫಿ ಸಾಕ್ಷಿ ಆಗಲು ಅರ್ಜಿ ಸಲ್ಲಿಸುವ
ಮೂಲಕ ಪ್ರಕರಣಕ್ಕೆ ಹಠಾತ್ ಟ್ವಿಸ್ಟ್ ನೀಡಿದ್ದಾನೆ.

Sponsored

ಹೌದು, ಕಳೆದ ಇಪ್ಪತ್ತು ದಿನಗಳ ಹಿಂದೆಯೇ ನಟ ದರ್ಶನ್ ಜೊತೆ ಪ್ರದೂಶ್ ಮನಸ್ಥಾಪ ಮಾಡಿಕೊಂಡಿದ್ದ ಎನ್ನಲಾಗಿದೆ.“
ನನ್ನ ಈ ಸ್ಥಿತಿಗೆ ಮತ್ತು ಜೈಲು ವಾಸಕ್ಕೆ ದರ್ಶನ್ ಕಾರಣ” ಎಂದು ಆರೋಪಿಸಿ ಅವರ ನಡುವೆ ದೊಡ್ಡ ಮಟ್ಟದ
ಗಲಾಟೆಯಾಗಿತ್ತು. ದರ್ಶನ್ ಜೊತೆ ಬ್ಯಾರಕ್‌ನಲ್ಲಿ ಸರಿ ಹೋಗುತ್ತಿಲ್ಲ ಹಾಗೂ ಸಮಸ್ಯೆ ಆಗುತ್ತಿದೆ ಎಂದು
ಜೈಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದ ಪ್ರದೂಶ್, ತನ್ನನ್ನು ಪ್ರತ್ಯೇಕ ಸೆಲ್‌ಗೆ ಶಿಫ್ಟ್ ಮಾಡುವಂತೆ
ಕೋರಿದ್ದ. ಅದರಂತೆ ಆತನನ್ನು ಕ್ವಾರಂಟೈನ್ ಸೆಲ್‌ನ ಪ್ರತ್ಯೇಕ ಬ್ಯಾರಕ್‌ಗೆ ಶಿಫ್ಟ್ ಮಾಡಲಾಗಿತ್ತು.
ಪ್ರತ್ಯೇಕ ಬ್ಯಾರಕ್‌ನಲ್ಲಿದ್ದ ವಾರದ ಬಳಿಕ ತನ್ನ ವಕೀಲರೊಂದಿಗೆ ಸುದೀರ್ಘ ಚರ್ಚೆ ನಡೆಸಿ, ಮಾಫಿ ಸಾಕ್ಷಿಯಾಗಲು
ಸಕಲ ಸಿದ್ಧತೆ ಮಾಡಿಕೊಂಡು ಅರ್ಜಿ ಸಲ್ಲಿಸಿದ್ದಾನೆ.ಸದ್ಯ ದರ್ಶನ್ ನಡೆಸಿದ ಹಲ್ಲೆ ಹಾಗೂ ಕೃತ್ಯದ ಸಂಪೂರ್ಣ
ಸತ್ಯವನ್ನು ಬಹಿರಂಗಪಡಿಸುವುದಾಗಿ ಆತ ತಿಳಿಸಿದ್ದು, ಈ ಬೆಳವಣಿಗೆಯು ಪ್ರಕರಣದಲ್ಲಿ ತೀವ್ರ ಸಂಚಲನ 
ಮೂಡಿಸಿದೆ.

Advertisement

Advertisement

ರೇಣುಕಾಸ್ವಾಮಿ ಕೊಲೆಯ ನೈಜ ರಹಸ್ಯ ಬಿಚ್ಚಿಟ್ಟ ಪ್ರದೂಶ್ : ನ್ಯಾಯಾಲಯಕ್ಕೆ ಸಲ್ಲಿಕೆಯಾಗಿರುವ ಅರ್ಜಿಯಲ್ಲಿ
ಪ್ರದೂಶ್ ಕೊಲೆ ನಡೆದ ದಿನದ ಭೀಕರ ಸತ್ಯಗಳನ್ನು ಬಿಚ್ಚಿಟ್ಟಿದ್ದಾನೆ ಎನ್ನಲಾಗಿದೆ. ನಾನು ಎಷ್ಟು ತಡೆದರೂ
ಅವರು ರೇಣುಕಾಸ್ವಾಮಿಯನ್ನು ಸಾಯಿಸುವ ನಿರ್ಧಾರ ಮಾಡಿಬಿಟ್ಟಿದ್ದರು. ‘ಬೇಡ ಹೊಡೆಯೋದು ಬಿಡಿ ಸರ್’ 
ಅಂದರೂ ಯಾರೂ ನನ್ನ ಮಾತು ಕೇಳಲಿಲ್ಲ. ರೇಣುಕಾಸ್ವಾಮಿಗೆ ಸಿಗರೇಟ್‌ನಿಂದ ಸುಟ್ಟು ಅಮಾನುಷವಾಗಿ ಹಿಂಸೆ
ನೀಡಿದರು. ನಾನೇ ಆತನಿಗೆ ಊಟ ಮತ್ತು ನೀರು ಕೊಟ್ಟಿದ್ದೆ. ನಟ ದರ್ಶನ್ ಸಹ ರೇಣುಕಾಸ್ವಾಮಿ ಮೇಲೆ ಮಾರಣಾಂತಿಕವಾಗಿ
ಹಲ್ಲೆ ನಡೆಸಿದರು.

ರೇಣುಕಾಸ್ವಾಮಿ ಮೊಬೈಲ್ ಚೆಕ್ ಮಾಡಿದಾಗ, ಆತ ಪವಿತ್ರಾಗೌಡಗೆ ಮಾತ್ರವಲ್ಲದೆ ಇನ್ನು ಮೂವರಿಗೆ ಮೆಸೇಜ್
ಕಳುಹಿಸಿದ್ದು ಗೊತ್ತಾಯಿತು. ಇದರಿಂದ ಕೋಪಗೊಂಡು ಭೀಕರವಾಗಿ ಹಲ್ಲೆ ನಡೆಸಿದರು. ಆ ನಂತರ ಡ್ರೈವರ್ 
ರವಿಶಂಕರ್ ಬಂದು ರೇಣುಕಾಸ್ವಾಮಿ ಸತ್ತುಹೋಗಿದ್ದಾನೆ ಎಂದು ತಿಳಿಸಿದರು. ನಂತರ ಕೊಲೆ ಕೇಸ್‌ನಲ್ಲಿ 
ಸಹಾಯ ಮಾಡದೇ ಹೋದರೆ ನಾನು ಬದುಕುವುದಿಲ್ಲ ಎಂದು ದರ್ಶನ್ ಹೇಳಿದ್ದರಿಂದ ನಾನು ಅನಿವಾರ್ಯವಾಗಿ ಸಹಾಯ
ಮಾಡಬೇಕಾಯಿತು ಎಂದು ಪ್ರದೋಶ್‌ ತಿಳಿಸಿದ್ದಾನೆ.

ಅರ್ಜಿಯಲ್ಲಿ ಏನಿದೆ?

ಜಯನಗರದ ನ್ಯಾಷನಲ್ ಕಾಲೇಜು ಮೈದಾನದಲ್ಲಿ ಕ್ರಿಕೆಟ್ ಆಡುತ್ತಿದ್ದ ವೇಳೆ 2003 ರಿಂದ ದರ್ಶನ್‌ ನನಗೆ
ಪರಿಚಯ. 2024 ರ ಜೂನ್ 8 ರಂದು ನಾನು ದರ್ಶನ್ ಮನೆಗೆ ತೆರಳಿದ್ದೆ. ಅಲ್ಲಿಂದ ನನ್ನನ್ನು ದರ್ಶನ್‌ ‘
ಸ್ಟೋನಿ ಬ್ರೂಕ್ಸ್’ ರೆಸ್ಟೋರೆಂಟ್‌ಗೆ ಕರೆದೊಯ್ದರು. ಮಧ್ಯಾಹ್ನ 3 ಗಂಟೆಗೆ ಪವನ್ ರೆಸ್ಟೋರೆಂಟ್‌ಗೆ
ಬಂದು ದರ್ಶನ್‌ಗೆ ಮೊಬೈಲ್‌ನಲ್ಲಿ ಏನೋ ತೋರಿಸಿದ್ದ. ಅದನ್ನು ನೋಡಿ ಕೋಪಗೊಂಡ ದರ್ಶನ್, ತಕ್ಷಣವೇ ಪವಿತ್ರಾ
ಗೌಡಗೆ ಕರೆ ಮಾಡಿ ಮಾತನಾಡಿದರು. ಬಳಿಕ ಪವಿತ್ರಾ ಗೌಡ ನಿವಾಸದ ಕಡೆಗೆ ಕಾರು ಚಲಾಯಿಸುವಂತೆ ನನಗೆ ಸೂಚಿಸಿದರು.

ಸಂಜೆ 4:30 ಕ್ಕೆ ಪವಿತ್ರಾ ಗೌಡ ನಿವಾಸ ತಲುಪಿದ ದರ್ಶನ್ ಹಾಗೂ ಪವಿತ್ರಾ, ಒಂದೇ ಕಾರಿನಲ್ಲಿ ಆರ್‌ಆರ್
ನಗರದ ಪಟ್ಟಣಗೆರೆ ಶೆಡ್‌ಗೆ ತಲುಪಿದರು. ಶೆಡ್‌ಗೆ ಪ್ರವೇಶಿಸಿದಾಗ 30 ವರ್ಷದ ರೇಣುಕಾಸ್ವಾಮಿ ತಲೆಬಾಗಿಸಿಕೊಂಡು
ಕುಳಿತಿದ್ದ. ಆತನ ಸುತ್ತ ರಾಘವೇಂದ್ರ, ಪವನ್, ನಾಗರಾಜ್ ಹಾಗೂ ನಂದೀಶ್ ಇದ್ದರು. “ನನ್ನ ಪವಿತ್ರಾಗೆ
ಅಶ್ಲೀಲ ಮೆಸೇಜ್ ಕಳುಹಿಸುತ್ತೀಯಾ?” ಎಂದು ಅವಾಚ್ಯ ಶಬ್ದಗಳಿಂದ ನಿಂದಿಸಿದ ದರ್ಶನ್, ರೇಣುಕಾಸ್ವಾಮಿಗೆ
ಹೊಡೆದರು. ನಂತರ ದರ್ಶನ್ ಸೂಚನೆಯಂತೆ ಪವಿತ್ರಾ ಗೌಡ ಚಪ್ಪಲಿಯಿಂದ ರೇಣುಕಾಸ್ವಾಮಿಗೆ ಹೊಡೆದರು. ರೇಣುಕಾಸ್ವಾಮಿಯ
ಬಟ್ಟೆ ಬಿಚ್ಚಿ ಒಳಉಡುಪಿನಲ್ಲಿ ನಿಲ್ಲಿಸಲಾಯಿತು. ನಂದೀಶ್ ಆತನನ್ನು ಟಾಟಾ ಏಸ್ ವಾಹನಕ್ಕೆ ನೇಣು ಹಾಕಲು
ಯತ್ನಿಸಿದರೆ, ನಾಗರಾಜ್ ನೈಲಾನ್ ಹಗ್ಗದಿಂದ ಹಾಗೂ ನಂದೀಶ್-ಪವನ್ ಮರದ ಕೋಲಿನಿಂದ ಬಾರಿಸಿದರು. 

ರೇಣುಕಾಸ್ವಾಮಿಯ ಇನ್‌ಸ್ಟಾಗ್ರಾಂನಲ್ಲಿ ‘ಗೌತಮ್’ ಹೆಸರಿನ ಪ್ರೊಫೈಲ್ ಪತ್ತೆಯಾಯಿತು. ಅದರಲ್ಲಿ ಹಲವು
ಮಹಿಳೆಯರಿಗೆ ಅಶ್ಲೀಲ ಮೆಸೇಜ್ ಕಳುಹಿಸಿದ್ದು ಕಂಡುಬಂದಾಗ ದರ್ಶನ್ ಆತನ ಒಳ ಉಡುಪನ್ನೂ ತೆಗೆಸಿ, ಖಾಸಗಿ
ಅಂಗಕ್ಕೆ ಸಾಲು ಸಾಲು ಒದೆಗಳನ್ನು ನೀಡಿದರು. ಕೊನೆಗೆ ಎರಡೂ ಕಾಲುಗಳಿಂದ ರೇಣುಕಾಸ್ವಾಮಿಯ ಎದೆ ತುಳಿದು
ವಿನಯ್ ಜೊತೆ ಸಂಜೆ 5:30 ಕ್ಕೆ ಸ್ಥಳದಿಂದ ತೆರಳಿದರು. ಈ ಮಧ್ಯೆ ಶವ ಸಾಗಾಟ, ಸಾಕ್ಷಿ ಮುಚ್ಚಿಹಾಕಲು
ಮತ್ತು ಪೊಲೀಸರಿಗೆ ಶರಣಾಗುವವರಿಗೆ ನೀಡಲು 30 ಲಕ್ಷ ರೂ. ಹಣವನ್ನು ಹೇಗೆ ಹೊಂದಿಸಲಾಯಿತು ಹಾಗೂ ಯಾರ್ಯಾರಿಗೆ
ಹಂಚಲಾಯಿತು ಎಂಬ ಸಂಪೂರ್ಣ ವಹಿವಾಟಿನ ವಿವರವನ್ನೂ ಪ್ರದೋಷ್ ಬರೆದಿದ್ದಾರೆ.

ಹಲ್ಲೆ ನಡೆಯುತ್ತಿದ್ದಾಗ ನಾನು ರೇಣುಕಾಸ್ವಾಮಿಯನ್ನು ರಕ್ಷಿಸಲು ಯತ್ನಿಸಿದೆ, ಹಲ್ಲೆ ನಿಲ್ಲಿಸುವಂತೆ
ದರ್ಶನ್ ಮತ್ತು ಇತರರಲ್ಲಿ ಮನವಿ ಮಾಡಿದೆ. ಆದರೆ ಅವರು ಕೇಳಲಿಲ್ಲ. ಈ ಇಡೀ ಕೃತ್ಯದಲ್ಲಿ ಭಾಗಿಯಾಗಿದ್ದಕ್ಕೆ
ನನಗೆ ಈಗ ತೀವ್ರ ಪಶ್ಚಾತ್ತಾಪವಾಗುತ್ತಿದ್ದು, ನ್ಯಾಯಾಲಯದ ಮುಂದೆ ಸತ್ಯ ಹೇಳಲು ಮಾಫಿ ಸಾಕ್ಷಿಯಾಗುತ್ತಿದ್ದೇನೆ
ಎಂದು ಪ್ರದೋಷ್ ತಮ್ಮ 11 ಪುಟಗಳ ಸುದೀರ್ಘ ಅರ್ಜಿಯಲ್ಲಿ ಉಲ್ಲೇಖಿಸಿದ್ದಾನೆ.

Advertisement