# ಸ್ನ್ಯಾಪ್‌ಚಾಟ್‌ನಲ್ಲಿ ಮೆಸೇಜ್ ಮಾಡಿ 4.84 ಲಕ್ಷ ರೂ ದೋಚಿದ ಕಿಲಾಡಿ – ಹುಡುಗಿ ಅಂತ ಮಂಗನಾದ ಪೆಂಗ

- Link: https://hosakannada.com/news/thief-steals-rs-4-84-lakh-by-messaging-girl-on-snapchat/
- Published: 2026-06-04T10:47:55+00:00
- Author: ಹೊಸಕನ್ನಡ ನ್ಯೂಸ್

ದಿನ ಕಳೆದಂತೆ ಸೈಬರ್ ವಂಚಕರ ಹಾವಳಿ ಜೋರಾಗಿದೆ. ಒಂದಲ್ಲ ಒಂದು ಸೋಗಿನಲ್ಲಿ ಬಂದು ಜನರ ಬಳಿ ಹಣವನ್ನು
ಪೀಕುತಿದ್ದಾರೆ. ಈ ಬಗ್ಗೆ ಪ್ರತಿನಿತ್ಯ ನಾವು ಸೋಶಿಯಲ್ ಮೀಡಿಯಾದಲ್ಲಿ ನೋಡಿದರೂ ಕೂಡ ಜನರು ಮಂಗವಾಗುವುದು
ನಿಲ್ಲುತ್ತಿಲ್ಲ. ಇದೀಗ ಅಂತದ್ದೇ ಒಂದು ಘಟನೆ ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರಿನಲ್ಲಿ ನಡೆದಿದ್ದು,
ಪುತ್ತೂರು ನಿವಾಸಿಯೊಬ್ಬರು ಬರೋಬ್ಬರಿ 4,84,203 ಕಳೆದುಕೊಂಡ ಘಟನೆ ನಡೆದಿದೆ. 

Sponsored

ಯಸ್, ಕಿಲಾಡಿ ಒಬ್ಬ ತಾನು ಹುಡುಗಿ ಎಂದು ಹೇಳಿಕೊಂಡು ಸ್ನ್ಯಾಪ್‌ಚಾಟ್ ಮೂಲಕ ಪರಿಚಯವಾಗಿ, ಹಣಕಾಸಿನ
ತೊಂದರೆಯ ನೆಪವೊಡ್ಡಿ ಪುತ್ತೂರು ನಿವಾಸಿಯೊಬ್ಬರಿಗೆ ಬರೊಬ್ಬರಿ 4,84,203 ರೂಪಾಯಿ ವಂಚಿಸಿರುವ ಆಘಾತಕಾರಿ
ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ ಪುತ್ತೂರು ನಗರ ಪೊಲೀಸ್ ಠಾಣೆಯಲ್ಲಿ ವಂಚಕನ ವಿರುದ್ಧ ಕ್ರಿಮಿನಲ್
ಮೊಕದ್ದಮೆ ದಾಖಲಾಗಿದೆ.

Advertisement

Advertisement

ಪೊಲೀಸ್ ದೂರಿನ ವಿವರಗಳ ಪ್ರಕಾರ, ಪುತ್ತೂರಿನ ನಿವಾಸಿಯಾದ ಸಂತ್ರಸ್ತರಿಗೆ ಕಳೆದ 2025 ರ ಡಿಸೆಂಬರ್
ತಿಂಗಳಿನಲ್ಲಿ ಸ್ನ್ಯಾಪ್‌ಚಾಟ್ ಆಯಪ್‌ನಲ್ಲಿ ‘annapornagowd26’ ಎಂಬ ಐಡಿಯಿಂದ ಮೆಸೇಜ್ ಬಂದಿತ್ತು.
ಅಪರಿಚಿತ ವ್ಯಕ್ತಿಯೊಬ್ಬ ತಾನು ‘ಅನ್ನಪೂರ್ಣ ಗೌಡ’ ಎಂಬ ಹುಡುಗಿ ಎಂದು ಸುಳ್ಳು ಪರಿಚಯ ಮಾಡಿಕೊಂಡಿದ್ದಲ್ಲದೆ,
ತಾನು ಬೆಂಗಳೂರಿನ ಪ್ರಸಿದ್ಧ ‘ವಿಪ್ರೋ’ (Wipro) ಕಂಪನಿಯಲ್ಲಿ ಕೆಲಸ ಮಾಡುತ್ತಿರುವುದಾಗಿ ನಂಬಿಸಿ,
ತನ್ನ ವಾಟ್ಸಾಪ್ ನಂಬರ್ ಹಂಚಿಕೊಂಡಿದ್ದಾನೆ. ಅಂದಿನಿಂದ ಇಬ್ಬರೂ ವಾಟ್ಸಾಪ್ ಮೂಲಕ ನಿರಂತರ ಚಾಟಿಂಗ್
ಮುಂದುವರಿಸಿದ್ದಾರೆ.

ಇದನ್ನೇ ಬಂಡವಾಳ ಮಾಡಿಕೊಂಡ ವಂಚಕ, ತನಗೆ ತೀವ್ರ ಹಣಕಾಸಿನ ತೊಂದರೆ ಎದುರಾಗಿದೆ ಎಂದು ಹಲವು ಕಟ್ಟುಕಥೆಗಳನ್ನು
ಹೇಳಿ ಸಂತ್ರಸ್ತನಿಂದ ಹಂತ ಹಂತವಾಗಿ ಒಟ್ಟು 4,84,203/- ರೂಪಾಯಿಗಳನ್ನು ತನ್ನ ಖಾತೆಗೆ ವರ್ಗಾಯಿಸಿಕೊಂಡಿದ್ದಾನೆ.
ಹಣ ಪಡೆದ ಬಳಿಕ ಆಕೆ ವಾಪಸ್ ನೀಡದೆ ಸತಾಯಿಸಿದಾಗ ಸಂತ್ರಸ್ತನಿಗೆ ಸಂಶಯ ಬಂದು, ಈ ಬಗ್ಗೆ ಅವರು ತನ್ನ
ಆಪ್ತ ಗೆಳೆಯರ ಬಳಿ ವಿಷಯ ತಿಳಿಸಿ, ಆ ಸ್ನ್ಯಾಪ್‌ಚಾಟ್ ಐಡಿ ಹಾಗೂ ವಾಟ್ಸಾಪ್ ಖಾತೆಯ ಬಗ್ಗೆ  ವಿಚಾರಿಸಿದಾಗ
ಅವರಿಗೆ ಜನ್ಮದಲ್ಲೇ ಮರೆಯಲಾಗದ ಶಾಕ್ ಕಾದಿತ್ತು! ಯಾಕೆಂದ್ರೆ, ತಾನು ಇಷ್ಟು ದಿನ ಪ್ರೀತಿಯಿಂದ ಮಾತನಾಡಿದ್ದು
ಮತ್ತು ಹಣ ನೀಡಿದ್ದು ಹುಡುಗಿಗಲ್ಲ, ಬದಲಿಗೆ ಹುಡುಗನಿಗೆ ಎಂಬ ಅಸಲಿ ಸತ್ಯ ಬಯಲಾಗಿದೆ. 

ಸದ್ಯ ಅವರು ತನ್ನನ್ನು ಹುಡುಗಿ ಎಂದು ನಂಬಿಸಿ, ಮೆಸೇಜ್ ಮೂಲಕ ಪುಸಲಾಯಿಸಿ ಲಕ್ಷಾಂತರ ರೂಪಾಯಿ ಪಡೆದು
ವಾಪಸ್ ನೀಡದೆ ನಂಬಿಕೆ ದ್ರೋಹ ಎಸಗಿರುವ ವಂಚಕನ ವಿರುದ್ಧ ಸಂತ್ರಸ್ತರು ಪುತ್ತೂರು ನಗರ ಪೊಲೀಸ್ ಠಾಣೆಗೆ
ದೂರು ನೀಡಿದ್ದಾರೆ.

Advertisement
