# ಹಬ್ಬಕ್ಕೂ ಮುನ್ನವೇ ಗ್ರಾಹಕರಿಗೆ ಶಾಕಿಂಗ್‌: ಸಕ್ಕರೆ, ಬೆಲ್ಲದ ದರ ಕೆಜಿಗೆ 75 ರೂ.ಗೆ ಹೆಚ್ಚಳ

- Link: https://hosakannada.com/news/sugar-jaggery-price-hike-karnataka-festival-season/
- Published: 2026-08-22T12:15:46+00:00
- Author: ಹೊಸಕನ್ನಡ ನ್ಯೂಸ್

**ಬೆಂಗಳೂರು: ವರಮಹಾಲಕ್ಷ್ಮಿ ಹಬ್ಬದ ಸಂಭ್ರಮ ಮುಗಿಯುತ್ತಿದ್ದಂತೆ ರಾಜ್ಯದ ಜನರಿಗೆ ದಿನಸಿ ಮಾರುಕಟ್ಟೆಯಿಂದ
ಬೆಲೆ ಏರಿಕೆಯ ಶಾಕ್ ಎದುರಾಗಿದೆ. ಸಕ್ಕರೆ ಮತ್ತು ಬೆಲ್ಲದ ದರದಲ್ಲಿ ದಿಢೀರ್ ಏರಿಕೆಯಾಗಿದ್ದು, ಸಿಹಿ
ತಿನಿಸುಗಳ ತಯಾರಿಗೆ ಸಿದ್ಧತೆ ನಡೆಸುತ್ತಿರುವ ಗ್ರಾಹಕರಿಗೆ ಹೆಚ್ಚುವರಿ ಹೊರೆ ಬಿದ್ದಿದೆ.**

Sponsored

> [ಕಸ್ತೂರಿ ರಂಗನ್ ವರದಿ ವಿರೋಧಿಸಿ ಆಗಸ್ಟ್ 27ರಂದು ಸಾಗರದಲ್ಲಿ ಬೃಹತ್ ಪ್ರತಿಭಟನೆ](https://hosakannada.com/news/kasturirangan-report-farmers-protest-sagara-august-27/)
> Advertisement
> Advertisement

ಇತ್ತೀಚಿನ ದಿನಗಳಲ್ಲಿ ಕೆಜಿಗೆ ₹50ರಿಂದ ₹55ರಷ್ಟಿದ್ದ ಸಕ್ಕರೆ ದರ ಇದೀಗ ₹70ರಿಂದ ₹75ಕ್ಕೆ ಏರಿಕೆಯಾಗಿದೆ.
ಅಲ್ಪಾವಧಿಯಲ್ಲೇ ಬೆಲೆಯಲ್ಲಿ ಗಣನೀಯ ಹೆಚ್ಚಳ ಕಂಡುಬಂದಿರುವುದು ಗ್ರಾಹಕರ ಆತಂಕಕ್ಕೆ ಕಾರಣವಾಗಿದೆ.
ಸಕ್ಕರೆ ಹಾಗೂ ಕಬ್ಬಿನ ಬಳಕೆ ಎಥೆನಾಲ್ ಉತ್ಪಾದನೆಯತ್ತ ಹೆಚ್ಚಾಗಿರುವುದು ದೇಶೀಯ ಮಾರುಕಟ್ಟೆಯಲ್ಲಿ
ಪೂರೈಕೆ ಮೇಲೆ ಪರಿಣಾಮ ಬೀರಿದೆ ಎನ್ನಲಾಗುತ್ತಿದೆ.

**ಬೆಲ್ಲದ ದರವೂ ಭಾರೀ ಏರಿಕೆ**

ಸಕ್ಕರೆಯ ಜತೆಗೆ ಬೆಲ್ಲದ ಬೆಲೆಯಲ್ಲೂ ಭಾರೀ ಏರಿಕೆ ಕಂಡುಬಂದಿದೆ. ಕಬ್ಬಿನ ಪೂರೈಕೆಯಲ್ಲಿ ವ್ಯತ್ಯಯ
ಉಂಟಾಗಿರುವ ಹಿನ್ನೆಲೆಯಲ್ಲಿ ಗಾಣಗಳಲ್ಲಿ ಬೆಲ್ಲದ ಉತ್ಪಾದನೆ ಕಡಿಮೆಯಾಗಿದೆ. ಇದರ ಪರಿಣಾಮವಾಗಿ ಮಾರುಕಟ್ಟೆಯಲ್ಲಿ
ಬೆಲ್ಲದ ದರ ವೇಗವಾಗಿ ಹೆಚ್ಚಾಗಿದೆ.

ಕೆಲ ದಿನಗಳ ಹಿಂದೆ ಕ್ವಿಂಟಲ್‌ಗೆ ಸುಮಾರು ₹4,500 ಇದ್ದ ಬೆಲ್ಲದ ಬೆಲೆ ಇದೀಗ ₹6,500ರಿಂದ ₹7,000ಕ್ಕೆ
ತಲುಪಿದೆ. ಅಂದರೆ ಕೇವಲ ಎರಡು-ಮೂರು ದಿನಗಳ ಅವಧಿಯಲ್ಲಿ ಕ್ವಿಂಟಲ್‌ಗೆ ಸುಮಾರು ₹2,000ರಷ್ಟು ಏರಿಕೆಯಾಗಿದೆ.

**ಮುಂದಿನ ಹಬ್ಬಗಳಿಗೂ ಬೆಲೆ ಏರಿಕೆ ಆತಂಕ**

ಗೌರಿ-ಗಣೇಶ ಹಬ್ಬ, ದಸರಾ ಸೇರಿದಂತೆ ಸಾಲು ಸಾಲು ಹಬ್ಬಗಳು ಎದುರಾಗುತ್ತಿರುವ ಸಂದರ್ಭದಲ್ಲಿ ಸಕ್ಕರೆ
ಮತ್ತು ಬೆಲ್ಲದ ಬೆಲೆ ಏರಿಕೆ ಗ್ರಾಹಕರಿಗೆ ಚಿಂತೆ ಮೂಡಿಸಿದೆ. ಹಬ್ಬದ ಸಂದರ್ಭದಲ್ಲಿ ಮನೆಗಳಲ್ಲಿ ಸಿಹಿ
ತಿನಿಸುಗಳ ತಯಾರಿಕೆಗೆ ಈ ಎರಡೂ ಪ್ರಮುಖ ಪದಾರ್ಥಗಳಾಗಿರುವುದರಿಂದ ಬೆಲೆ ಏರಿಕೆಯ ನೇರ ಪರಿಣಾಮ ಕುಟುಂಬಗಳ
ಖರ್ಚಿನ ಮೇಲೆ ಬೀಳುವ ಸಾಧ್ಯತೆ ಇದೆ.

> [ಕಸ್ತೂರಿ ರಂಗನ್ ವರದಿ ವಿರೋಧಿಸಿ ಆಗಸ್ಟ್ 27ರಂದು ಸಾಗರದಲ್ಲಿ ಬೃಹತ್ ಪ್ರತಿಭಟನೆ](https://hosakannada.com/news/kasturirangan-report-farmers-protest-sagara-august-27/)

ಈಗಾಗಲೇ ದಿನಬಳಕೆಯ ಹಲವು ವಸ್ತುಗಳ ಬೆಲೆ ಏರಿಕೆಯಿಂದ ಸಂಕಷ್ಟದಲ್ಲಿರುವ ಮಧ್ಯಮ ವರ್ಗದ ಕುಟುಂಬಗಳಿಗೆ
ಸಕ್ಕರೆ ಮತ್ತು ಬೆಲ್ಲದ ದರ ಹೆಚ್ಚಳ ಮತ್ತಷ್ಟು ಆರ್ಥಿಕ ಒತ್ತಡ ತಂದಿದೆ. ಮಾರುಕಟ್ಟೆಯಲ್ಲಿ ಬೆಲೆ 
ನಿಯಂತ್ರಣ ಹಾಗೂ ಪೂರೈಕೆ ಸುಧಾರಣೆಗೆ ಸಂಬಂಧಪಟ್ಟ ಇಲಾಖೆ ಅಗತ್ಯ ಕ್ರಮ ಕೈಗೊಳ್ಳಬೇಕು ಎಂಬ ಆಗ್ರಹವೂ
ಕೇಳಿಬರುತ್ತಿದೆ.

Advertisement