# ಅಕ್ಕಿ ದರ ಸದ್ಯದಲ್ಲೇ ಕೆಜಿಗೆ 100ರೂ !!

- Link: https://hosakannada.com/news/rice-price-will-soon-be-rs-100-per-kg/
- Published: 2026-08-11T08:25:23+00:00
- Author: ಹೊಸಕನ್ನಡ ನ್ಯೂಸ್

ಬರಗಾಲದ ಬಿಸಿ ರಾಜ್ಯದ ಭತ್ತದ ಕಣಜಗಳು ಬರಿದಾಗುತ್ತಿದ್ದು, ಭತ್ತದ ನಾಟಿ ಪ್ರಮಾಣದಲ್ಲಿ ದಾಖಲೆಯ ಕುಸಿತ
ಕಂಡಿದೆ. ಇದರ ನೇರ ಪರಿಣಾಮವಾಗಿ ಕರ್ನಾಟಕ, ಆಂಧ್ರಪ್ರದೇಶ, ತೆಲಂಗಾಣ, ಕೇರಳ ಮತ್ತು ತಮಿಳುನಾಡಿನಲ್ಲಿ
ಅಕ್ಕಿ ದರಗಳು ಗಗನಕ್ಕೇರಿದ್ದು, ಗ್ರಾಹಕರ ಜೇಬಿಗೆ ತೀವ್ರ ಕತ್ತರಿ ಬಿದ್ದಿದೆ. ರೈಸ್ ಮಿಲ್‌ಗಳು ಒಂದೊಂದಾಗಿ
ಬಾಗಿಲು ಮುಚ್ಚುವ ಭೀತಿ ಎದುರಿಸುತ್ತಿವೆ. ಅಲ್ಲದೆ ಶೀಘ್ರದಲ್ಲೇ ಕೆಜಿಗೆ 100 ರೂಪಾಯಿ ತಲುಪುವ ಭೀತಿ
ಎದುರಾಗಿದೆ.

Sponsored

ರಾಜ್ಯದ ‘ಭತ್ತದ ಕಣಜ’ಗಳೆಂದೇ ಹೆಸರುವಾಸಿಯಾದ ರಾಯಚೂರು, ಬಳ್ಳಾರಿ ಹಾಗೂ ಕೊಪ್ಪಳ ಸೇರಿದಂತೆ ಹಲವು
ಜಿಲ್ಲೆಗಳಲ್ಲಿ ಸತತ ನೀರಿನ ಅಭಾವದಿಂದಾಗಿ ಭತ್ತ ಬಿತ್ತನೆ ಪ್ರಮಾಣದಲ್ಲಿ ಭಾರಿ ಕುಸಿತ ಕಂಡಿದೆ. ಈ
ವರ್ಷ 10 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಭತ್ತ ಬಿತ್ತನೆಯ ಗುರಿ ಹೊಂದಲಾಗಿತ್ತಾದರೂ, ಕೇವಲ ಶೇ. 20ರಷ್ಟು
ಜಾಗದಲ್ಲಿ ಮಾತ್ರ ನಾಟಿ ಕಾರ್ಯ ನಡೆದಿದೆ. ಕಾವೇರಿ ಮತ್ತು ತುಂಗಭದ್ರಾ ಜಲಾಶಯಗಳ ಅಚ್ಚುಕಟ್ಟು ಪ್ರದೇಶಗಳಲ್ಲೂ
ನೀರಿನ ಕೊರತೆಯಿಂದಾಗಿ ರೈತರು ನಾಟಿ ಮಾಡಲು ಹಿಂದೇಟು ಹಾಕಿದ್ದಾರೆ.

Advertisement

Advertisement

ಮಳೆ ಅಭಾವದಿಂದ ಸ್ಥಳೀಯವಾಗಿ ಉತ್ಪಾದನೆ ತಗ್ಗಿರುವುದಷ್ಟೇ ಅಲ್ಲದೆ, ನೆರೆರಾಜ್ಯಗಳಾದ ಆಂಧ್ರಪ್ರದೇಶ
ಹಾಗೂ ತೆಲಂಗಾಣದಲ್ಲೂ ಭತ್ತದ ಇಳುವರಿ ಕಡಿಮೆಯಾಗಿದೆ. ಇದರಿಂದಾಗಿ ಹೊರರಾಜ್ಯಗಳಿಂದ ಕರ್ನಾಟಕಕ್ಕೆ 
ಬರುವ ಅಕ್ಕಿ ಪೂರೈಕೆ ಸಂಪೂರ್ಣ ನಿಂತುಹೋಗಿದೆ. ಪ್ರಸ್ತುತ ಪ್ರಮುಖ ನಗರಗಳ ಚಿಲ್ಲರೆ ಮಾರುಕಟ್ಟೆಯಲ್ಲಿ
50 ರೂಪಾಯಿಯಷ್ಟಿದ್ದ ಸಾಮಾನ್ಯ ಅಕ್ಕಿಯ ಬೆಲೆ ಈಗಷ್ಟೇ 70 ರಿಂದ 80 ರೂಪಾಯಿಯ ಗಡಿ ದಾಟಿದೆ. ಮಳೆಯ
ಸ್ಥಿತಿ ಹೀಗೆಯೇ ಮುಂದುವರಿದರೆ ಶೀಘ್ರದಲ್ಲೇ ಬೆಲೆ 100 ರೂಪಾಯಿಗೆ ಮುಟ್ಟಲಿದೆ ಎಂದು ವ್ಯಾಪಾರಿಗಳು
ಕಳವಳ ವ್ಯಕ್ತಪಡಿಸಿದ್ದಾರೆ.

ಬಿತ್ತನೆ ಪ್ರಮಾಣದಲ್ಲಿ ಭಾರಿ ಕುಸಿತ

ಕರ್ನಾಟಕದಲ್ಲಿ 2026-27 ಸಾಲಿನಲ್ಲಿ ಒಟ್ಟು 10 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಭತ್ತ ಬಿತ್ತನೆ ಮಾಡುವ
ಗುರಿ ಹೊಂದಲಾಗಿತ್ತು. ಆದರೆ, ಜುಲೈ-ಆಗಸ್ಟ್ ವೇಳೆಗೆ ಕೇವಲ 2.02 ಲಕ್ಷ ಹೆಕ್ಟೇರ್ (ಶೇ. 20) ಪ್ರದೇಶದಲ್ಲಿ
ಮಾತ್ರ ಬಿತ್ತನೆಯಾಗಿದೆ.ರಾಜ್ಯದ ‘ಭತ್ತದ ಕಣಜ’ ಎನಿಸಿಕೊಂಡಿರುವ ರಾಯಚೂರು, ಬಳ್ಳಾರಿ ಮತ್ತು ಕೊಪ್ಪಳ
ಜಿಲ್ಲೆಗಳಲ್ಲಿ ಸತತ ಎರಡನೇ ವರ್ಷವೂ ನೀರಿಲ್ಲದೆ ಬಿತ್ತನೆ ಕುಸಿದಿದೆ.

**ಎಲ್ಲಿ ಎಷ್ಟು?**

ರಾಯಚೂರು: 1.90 ಲಕ್ಷ ಹೆಕ್ಟೇರ್ ಗುರಿಯಲ್ಲಿ ಕೇವಲ 4,020 ಹೆಕ್ಟೇರ್ (ಶೇ. 2) ಬಿತ್ತನೆ.

ಬಳ್ಳಾರಿ: 87,741 ಹೆಕ್ಟೇರ್ ಪೈಕಿ ಕೇವಲ 6,397 ಹೆಕ್ಟೇರ್ (ಶೇ. 10) ಬಿತ್ತನೆ.

ದಾವಣಗೆರೆ: ಕೇವಲ ಶೇ. 1 ಬಿತ್ತನೆ.

ಮೈಸೂರು, ಮಂಡ್ಯ: ಕೆಆರ್‌ಎಸ್ ಹಾಗೂ ಕಬಿನಿ ನಾಲೆಗಳಿಗೆ ನೀರು ಹರಿಸದ ಹಿನ್ನೆಲೆಯಲ್ಲಿ ರೈತರು ನಾಟಿ
ಕಾರ್ಯಕ್ಕೇ ಕೈಹಾಕಿಲ್ಲ.

ಮಳೆಯಾಶ್ರಿತ ಜಿಲ್ಲೆಗಳಲ್ಲಿ ಸುಧಾರಣೆ: ಬೆಳಗಾವಿ (ಶೇ. 89), ಧಾರವಾಡ (ಶೇ. 85), ದಕ್ಷಿಣ ಕನ್ನಡ(
ಶೇ. 82), ಬೀದರ್ (ಶೇ. 79) ಹಾಗೂ ಗದಗ (ಶೇ. 67) ಜಿಲ್ಲೆಗಳಲ್ಲಿ ಉತ್ತಮ ಮಳೆಯಾಗಿದ್ದರಿಂದ ಬಿತ್ತನೆ
ನಡೆದಿದೆ.

Advertisement