# ಕುಂದಾಪುರ ಸಹಾಯಕ ಆಯುಕ್ತರಾಗಿ ರಶ್ಮಿ ಎಸ್. ಆರ್. ನೇಮಕ

- Link: https://hosakannada.com/news/rashmi-s-r-appointed-as-kundapur-assistant-commissioner/
- Published: 2025-04-02T08:55:20+00:00
- Author: ಹೊಸಕನ್ನಡ ನ್ಯೂಸ್

Kundhapura : ಕುಂದಾಪುರ ಉಪ ವಿಭಾಗಾಧಿಕಾರಿ ಮಹೇಶ್ಚಂದ್ರ ಅವರನ್ನು ಇಲಾಖೆ ತಕ್ಷಣದಿಂದ ಜಾರಿಗೆ 
ಬರುವಂತೆ ಅಮಾನತುಗೊಳಿಸಿ ಸರ್ಕಾರ ಆದೇಶ ಹೊರಡಿಸಿದೆ. ಮಹೇಶ್ಚಂದ್ರ ಅವರು ಉಡುಪಿ ನಗರಾಭಿವೃದ್ಧಿ ಪ್ರಾಧಿಕಾರದ
ಆಯುಕ್ತರಾಗಿದ್ದ ಸಂದರ್ಭ ಬಡನಿಡಿಯೂರು ಗ್ರಾಮ ಪಂಚಾಯತ್ ವ್ಯಾಪ್ತಿಯ ವಾಣಿಯ ವಾಣಿಜ್ಯ ಉದ್ದೇಶದ ರೆಸಾರ್ಟ್
ನಿರ್ಮಾಣ ವಿಚಾರದಲ್ಲಿ ಉದ್ಯಾನ ಮತ್ತು ಬಯಲು ಜಾಗದ ವಲಯದಿಂದ ವಾಣಿಜ್ಯ ವಲಯಕ್ಕೆ ಭೂ ಉಪಯೋಗ ಬದಲಾವಣೆಯ
ಕಡತದಲ್ಲಿ ಸರ್ವೆ ನಕ್ಷೆ ಸೇರಿದಂತೆ ವಿವಿಧ ದಾಖಲೆಗಳನ್ನು ನಿಯಮ ಮೀರಿ ನಕಲಿಯಾಗಿ ಸೃಷ್ಟಿಸಿದ್ದಾರೆ
ಎನ್ನುವ ಆರೋಪವಿತ್ತು. ನಕಲಿ ದಾಖಲೆ ಸೃಷ್ಟಿಸಿರುವ ಅಧಿಕಾರಿ ಮಹೇಶ್ಚಂದ್ರ ವಿರುದ್ಧ ಶಿಸ್ತು ಕ್ರಮ
ಜರುಗಿಸುವಂತೆ ಉಡುಪಿ ಶಾಸಕರು ಮನವಿ ಮಾಡಿದ್ದರು.

Sponsored

ಉಡುಪಿ ಶಾಸಕರ ದೂರಿನಂತೆ ಉಡುಪಿ ಜಿಲ್ಲಾಧಿಕಾರಿ ವಿದ್ಯಾ ಕುಮಾರಿ ಈ ಕುರಿತು ವಿಸ್ತೃತ ವರದಿಯನ್ನು
ಸಿದ್ಧಪಡಿಸಿ ಸರಕಾರಕ್ಕೆ ಸಲ್ಲಿಸಿದ್ದರು. ವರದಿಯನ್ನ ಪರಿಶೀಲಿಸಿದ ಸರ್ಕಾರದ ಅಧೀನ ಕಾರ್ಯದರ್ಶಿಯವರು
ಕುಂದಾಪುರ ಉಪ ವಿಭಾಗಾಧಿಕಾರಿಯಾಗಿರುವ ಮಹೇಶ್ಚಂದ್ರ ಅವರನ್ನು ಇಲಾಖೆ ವಿಚಾರಣೆಯನ್ನು ಬಾಕಿ ಇರಿಸಿ
ತಕ್ಷಣಕ್ಕೆ ಜಾರಿಗೆ ಬರುವಂತೆ ಅಮಾನತುಗೊಳಿಸಿ ಆದೇಶ ಹೊರಡಿಸಿದ್ದಾರೆ. ಸದ್ಯ ಮುಂದಿನ ಆದೇಶದವರೆಗೂ
ಕುಂದಾಪುರ ಉಪ ವಿಭಾಗಾಧಿಕಾರಿ ಹುದ್ದೆಯನ್ನು ಪ್ರಭಾರಿಯಾಗಿ ಬ್ರಹ್ಮಾವರ ತಹಶೀಲ್ದಾರ್ ಶ್ರೀಕಾಂತ್ 
ಹೆಗ್ಡೆ ನಿರ್ವಹಿಸುವಂತೆ ಸೂಚಿಸಲಾಗಿದೆ.

Advertisement

Advertisement

ಕಳೆದ ವರ್ಷ ಕುಂದಾಪುರದ ಉಪ ವಿಭಾಗಾಧಿಕಾರಿಯಾಗಿ ಜನಮನ್ನಣೆಗೆ ಪಾತ್ರರಾಗುವ ಜೊತೆಗೆ, ಜನ ಸ್ನೇಹಿ,
ದಕ್ಷ ಅಧಿಕಾರಿಯಾಗಿದ್ದ ರಶ್ಮಿ ಅವರ ವರ್ಗಾವಣೆಯ ಬಳಿಕ ಮಹೇಶ್ಚಂದ್ರ ಅವರನ್ನು ಅವರ ಸ್ಥಾನಕ್ಕೆ ನೇಮಕಗೊಳಿಸಲಾಗಿತ್ತು.
ಬೈಂದೂರು ಮಾಜಿ ಶಾಸಕರು, ಆಪ್ತರೊರ್ವರ ಜಾಗಕ್ಕೆ ಸಂಬಂಧಿಸಿದಂತೆ ದಾಖಲೆಗಳನ್ನು ಸೃಷ್ಟಿಸುವಂತೆ ಅಂದಿನ
ಉಪ ವಿಭಾಗಾಧಿಕಾರಿ ರಶ್ಮಿ ಅವರ ಬಳಿ ಒತ್ತಡ ಹೇರಿದ್ದರು‌. ಪ್ರಾಮಾಣಿಕತೆ ಮತ್ತು ದಕ್ಷತೆಗೆ ಹೆಸರುವಾಸಿಯಾದ
ಉಪ ವಿಭಾಗಾಧಿಕಾರಿ ರಶ್ಮಿ ಅವರು ಇಲಾಖೆಯ ವ್ಯಾಪ್ತಿಯಲ್ಲಿ ಆಗುವ ಕೆಲಸವಾದರೆ ಮಾಡಿ ಕೊಡುವುದಾಗಿ ತಿಳಿಸಿದ್ದರು.
ಇದಾದ ಬಳಿಕ ನಿರಂತರವಾಗಿ ರಶ್ಮಿ ಅವರಿಗೆ ಮಾಜಿ ಶಾಸಕರು ಒತ್ತಡ ಹೇರಿದ್ದರು ಎನ್ನಲಾಗಿದೆ. ಯಾವುದೇ
ಒತ್ತಡಕ್ಕೂ ಬಗ್ಗದ ದಕ್ಷ ಅಧಿಕಾರಿ ರಶ್ಮಿ ಅವರನ್ನು ರಾತ್ರೋರಾತ್ರಿ ತಮ್ಮ ರಾಜಕೀಯ ಪ್ರಭಾವ ಬಳಸಿ 
ಮಾಜಿ ಶಾಸಕರು ವರ್ಗಾವಣೆ ಗೊಳಿಸಿದ್ದರು. ಸದ್ಯ ರಶ್ಮಿ ಅವರ ತೆರವಾದ ಸ್ಥಾನಕ್ಕೆ ಬಂದ ಮಹೇಶ್ಚಂದ್ರ
ಅವರು ನಕಲಿ ದಾಖಲೆಯ ಸೃಷ್ಟಿ ಆರೋಪದಡಿ ಅಮಾನತಾಗಿದ್ದು, ಮತ್ತೆ ಕುಂದಾಪುರದ ಉಪ ವಿಭಾಗಾಧಿಕಾರಿಯಾಗಿ
ರಶ್ಮಿ ಅವರನ್ನು ಸರಕಾರ ನಿಯುತ್ತಿ ಗೊಳಿಸಿದೆ. ಸದ್ಯ ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಸೇವೆ ಸಲ್ಲಿಸುತ್ತಿರುವ
ರಶ್ಮಿ ಅವರಿಗೆ ಅಲ್ಲಿನ ಕರ್ತವ್ಯದಿಂದ ಬಿಡುಗಡೆ ಸಿಕ್ಕ ಬಳಿಕ, ತಕ್ಷಣ ಕುಂದಾಪುರದ ಉಪವಿಭಾಗಾಧಿಕಾರಿಯಾಗಿ
ಅಧಿಕಾರ ಸ್ವೀಕರಿಸಲಿದ್ದಾರೆ.

ಇನ್ನು ಕುಂದಾಪುರದಲ್ಲಿ ಉಪ ವಿಭಾಗಾಧಿಕಾರಿ ಮಹೇಶ್ಚಂದ್ರ ಅವರ ಅಮಾನತು ವಿಚಾರವಾಗಿ ಸಾಕಷ್ಟು ಚರ್ಚೆ
ನಡೆಯುತ್ತಿದೆ. ಉಡುಪಿ ಜಿಲ್ಲಾಧಿಕಾರಿ ವಿದ್ಯಾ ಕುಮಾರಿ ಮತ್ತು ಮಹೇಶ್ಚಂದ್ರ ಅವರ ನಡುವಿನ ತಿಕ್ಕಾಟ
ಅಮಾನತಿಗೆ ಕಾರಣವಾಗಿದೆ, ಐಎಎಸ್ ಮತ್ತು ಕೆಎಎಸ್ ಅಧಿಕಾರಿಗಳ ಒಳ ಜಗಳದಿಂದ ಅಮಾನತು ಶಿಕ್ಷೆ ಸಿಕ್ಕಿದೆ
ಎನ್ನುವ ಗಾಳಿ ಸುದ್ದಿಗಳು ಹರಿದಾಡುತ್ತಿದೆ.

Advertisement