# ಬ್ರಸೆಲ್ಸ್‌ನಲ್ಲಿ ಮತ್ತೆ ‘ಗೋಲ್ಡನ್ ಆರ್ಮ್’ ಘರ್ಜನೆ; ಡೈಮಂಡ್ ಕಿರೀಟಕ್ಕೆ ನೀರಜ್ ರೆಡಿ!

- Link: https://hosakannada.com/news/neeraj-chopra-diamond-league-final-brussels/
- Published: 2026-08-28T14:27:04+00:00
- Author: ಹೊಸಕನ್ನಡ ನ್ಯೂಸ್

**ನವದೆಹಲಿ: **ಭಾರತದ ಜಾವೆಲಿನ್ ಸ್ಟಾರ್ ನೀರಜ್ ಚೋಪ್ರಾ ಅವರು ಡೈಮಂಡ್ ಲೀಗ್ ಫೈನಲ್‌ಗೆ ಅರ್ಹತೆ
ಪಡೆದುಕೊಂಡಿದ್ದಾರೆ. ಸೆಪ್ಟೆಂಬರ್ 4 ಮತ್ತು 5ರಂದು ಬ್ರಸೆಲ್ಸ್‌ನಲ್ಲಿ ನಡೆಯಲಿರುವ ಅಂತಿಮ ಹಂತದ 
ಸ್ಪರ್ಧೆಯಲ್ಲಿ ನೀರಜ್ ಮತ್ತೊಮ್ಮೆ ಪ್ರಶಸ್ತಿಗಾಗಿ ಹೋರಾಟ ನಡೆಸಲಿದ್ದಾರೆ.

Sponsored

ಈ ಋತುವಿನ ಡೈಮಂಡ್ ಲೀಗ್ ಸ್ಪರ್ಧೆಗಳಲ್ಲಿ ನೀರಜ್ ಒಟ್ಟು 12 ಅರ್ಹತಾ ಅಂಕಗಳನ್ನು ಕಲೆಹಾಕಿದ್ದಾರೆ.
ಜೂನ್‌ನಲ್ಲಿ ದೋಹಾದಲ್ಲಿ 85.69 ಮೀಟರ್ ಎಸೆದು ನಾಲ್ಕನೇ ಸ್ಥಾನ ಪಡೆದಿದ್ದ ಅವರು, ಬಳಿಕ ಲಾಸನ್ನೆಯಲ್ಲಿ
88.05 ಮೀಟರ್‌ಗಳ ಋತುವಿನ ಶ್ರೇಷ್ಠ ಸಾಧನೆಯೊಂದಿಗೆ ಎರಡನೇ ಸ್ಥಾನ ಗಳಿಸಿದ್ದರು.

Advertisement

Advertisement

ಗ್ಲ್ಯಾಸ್ಗೋ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲೂ ನೀರಜ್ ಗಮನಾರ್ಹ ಪ್ರದರ್ಶನ ನೀಡಿದ್ದರು. 85.83 ಮೀಟರ್
ಎಸೆದು ಬೆಳ್ಳಿ ಪದಕ ತಮ್ಮದಾಗಿಸಿಕೊಂಡಿದ್ದರು.

ಆಗಸ್ಟ್ 27ರಂದು ಜ್ಯೂರಿಚ್‌ನಲ್ಲಿ ನಡೆದ ಡೈಮಂಡ್ ಲೀಗ್ ಸ್ಪರ್ಧೆಗೆ ನೀರಜ್ ಗೈರಾಗಿದ್ದರು. ಈ ಸ್ಪರ್ಧೆಯಲ್ಲಿ
ಶ್ರೀಲಂಕಾದ ರುಮೇಶ್ ಪತಿರಾಜ್ 92.07 ಮೀಟರ್ ಎಸೆದು ಅಗ್ರಸ್ಥಾನ ಪಡೆದಿದ್ದಾರೆ. ಹೀಗಾಗಿ ಬ್ರಸೆಲ್ಸ್‌ನಲ್ಲಿ
ನೀರಜ್ ಹಾಗೂ ಪತಿರಾಜ್ ನಡುವಿನ ಪೈಪೋಟಿ ಪ್ರಮುಖ ಆಕರ್ಷಣೆಯಾಗುವ ಸಾಧ್ಯತೆಯಿದೆ.

2022ರಲ್ಲಿ ಡೈಮಂಡ್ ಲೀಗ್ ಪ್ರಶಸ್ತಿ ಗೆದ್ದ ಮೊದಲ ಭಾರತೀಯ ಎಂಬ ಇತಿಹಾಸ ನಿರ್ಮಿಸಿದ್ದ ನೀರಜ್, ನಂತರ
ಮೂರು ಬಾರಿ ರನ್ನರ್‌ಅಪ್ ಆಗಿದ್ದರು. ಇದೀಗ ಮತ್ತೊಮ್ಮೆ ಡೈಮಂಡ್ ಲೀಗ್ ಚಾಂಪಿಯನ್ ಆಗುವ ವಿಶ್ವಾಸದೊಂದಿಗೆ
ಫೈನಲ್‌ಗೆ ಸಜ್ಜಾಗಿದ್ದಾರೆ.

Advertisement