# ಮಂಗಳೂರು: ಆ ಮರ ಮುಟ್ಟಬೇಡಿ, ಮುಟ್ಟಿದರೆ ಪರಿಣಾಮ ಎದುರಿಸಬೇಕಾಗುತ್ತದೆ-NHAI ಅಧಿಕಾರಿಗಳಿಗೆ ದೈವದ ಎಚ್ಚರಿಕೆ

- Link: https://hosakannada.com/news/mangalore-dont-touch-that-tree-youll-have-to-face-the-consequences-if-you-do-divine-warning-to-nhai-officials/
- Published: 2026-09-04T10:59:48+00:00
- Author: ಹೊಸಕನ್ನಡ ನ್ಯೂಸ್

ಮಂಗಳೂರು: ರಾಷ್ಟ್ರೀಯ ಹೆದ್ದಾರಿ 66 ರ ನಂತೂರು ಪದವು ಬಳಿ ಇರುವ ಭಗವಾನ್‌ ಬಬ್ಬುಸ್ವಾಮಿ ದೈವಸ್ಥಾನದ
ಆವರಣದ ರಸ್ತೆ ಡಿವೈಡರ್‌ನಲ್ಲಿರುವ ಪುರಾತನ ಸಂಪಿಗೆ ಮರದ ವಿಚಾರವಾಗಿ ಕಾರ್ಣಿಕ ದೈವ ರಾಹುಗುಳಿಗ ಉಗ್ರ
ಸ್ವರೂಪ ತಾಳಿ ಎಚ್ಚರಿಕೆ ನೀಡಿರುವ ಕುರಿತು ವರದಿಯಾಗಿದೆ. ಹಿಂದಿನ ಕಾಲದಲ್ಲಿ ಈ ಮರದ ಕಟ್ಟೆಯಲ್ಲಿಯೇ
ಮುಖ್ಯ ತೀರ್ಮಾನಗಳನ್ನು ಕೈಗೊಳ್ಳಲಾಗುತ್ತಿತ್ತು ಹಾಗೂ ಈ ಮರಕ್ಕೆ ಪೂಜೆ ಮಾಡಲಾಗುತ್ತಿತ್ತು. 

Sponsored

ನಂತೂರು ಸರ್ಕಲ್‌ ಬಳಿ ಸಾರಿಗೆ ದಟ್ಟಣೆ ನಿಯಂತ್ರಿಸಲು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಅಂಡರ್‌
ಪಾಸ್‌ ನಿರ್ಮಾಣಕ್ಕೆ ಯೋಜನೆ ರೂಪಿಸಿದೆ. ಇದರ ಅಂಗವಾಗಿ ರಸ್ತೆ ಡಿವೈಡರ್‌ನಲ್ಲಿರುವ ಪುರಾತನ ಸಂಪಿಗೆ
ಮರವನ್ನು ತೆರವು ಮಾಡಬೇಕು ಎಂದು ಎನ್‌ಹೆಚ್‌ಎಐ ಅಧಿಕಾರಿಗಳು ಆಡಳಿತ ಮಂಡಳಿಗೆ ಸೂಚಿಸಿದ್ದರು. ಇತ್ತೀಚೆಗೆ
ನಡೆದ ದೈವದ ನೇಮೋತ್ಸವದ ಸಂದರ್ಭದಲ್ಲಿ ಆಡಳಿತ ಮಂಡಳಿಯವರು ಈ ವಿಷಯವನ್ನು ದೈವದ ಎದುರು ಪ್ರಸ್ತಾಪನೆ
ಮಾಡಿದ್ದರು.

Advertisement

Advertisement

ಮರ ತೆರವಿನ ವಿಷಯ ಕೇಳಿ ರಾಹುಗುಳಿಗ ದೈವ, ಇದು ನನ್ನ ಮರ, ನನ್ನ ದೃಷ್ಟಿ ಅದರ ಮೇಲಿದೆ, ಅದನ್ನು ತೆರವು
ಮಾಡಿದರೆ ಪರಿಣಾಮ ನೆಟ್ಟಗಿರುವುದಿಲ್ಲ ಎಂದು ಎಚ್ಚರಿಸಿದೆ. ನೇರವಾಗಿ ಸಂಪಿಗೆ ಮರವನ್ನು ಹತ್ತಿ ಆದೇಶ
ನೀಡಿದೆ.

ಈ ಹಿಂದೆ ರಸ್ತೆ ಅಗಲೀಕರಣ ಮಾಡುವ ಸಂದರ್ಭದಲ್ಲಿ ಮರ ತೆರವು ಮಾಡದೆ ರಸ್ತೆ ನಿರ್ಮಾಣ ಮಾಡಲಾಗಿತ್ತು.
ಆಗ ಅಲ್ಲಿ ಸರಣಿ ಅಪಘಾತ ನಡೆಯುತ್ತಿತ್ತು. ನಂತರ ಅಪಘಾತ ತಡೆಯಲು ರಾಹುಗುಳಿದ ದೈವಕ್ಕೆ ದೈವಸ್ಥಾನದ
ಆವರಣದಲ್ಲಿ ಪ್ರತ್ಯೇಕ ಗುಡಿ ನಿರ್ಮಾಣ ಮಾಡಲಾಯಿತು. ನಂತರ ಅಲ್ಲಿ ಅಪಘಾತ ನಿಂತವು. ಆದರೆ ದೈವದ ದೃಷ್ಟಿ
ಆ ಸಂಪಿಗೆ ಮರದ ಮೇಲೆ ಇತ್ತು.

ಹಿಂದೆ ಸ್ಥಳೀಯ ಕಾರ್ಪೊರೇಟರ್‌ ಒಬ್ಬರು ಮರ ತೆರವು ಮಾಡಲು ಬಂದಾಗ ನಾಗರಹಾವೊಂದು ಪ್ರತ್ಯಕ್ಷಗೊಂಡಿದ್ದು,
ಅಲ್ಲಿಂದ ಅವರು ಹೋಗಿದ್ದರು. ಇದೀಗ ಎನ್‌ಹೆಚ್‌ಎಐ ಅಧಿಕಾರಿಗಳು ಮತ್ತೆ ಮರ ತೆರವು ಮಾಡಲು ಮುಂದಾಗಿದ್ದು,
ದಕ್ಷಿಣ ಕನ್ನಡ ಸಂಸದ ಕ್ಯಾಪ್ಟನ್‌ ಬ್ರಿಜೇಶ್‌ ಚೌಟ ಅವರು ಮಧ್ಯಪ್ರವೇಶ ಮಾಡಿ ಅಧಿಕಾರಿಗಳಿಗೆ ಸೂಕ್ತ
ಮನವರಿಕೆ ಮಾಡಬೇಕು ಎಂದು ಆಡಳಿತ ಮಂಡಳಿ ವಿನಂತಿ ಮಾಡಿದೆ.

Advertisement