# ಭಾರತದ ಮೊದಲ ಡೆಂಗ್ಯೂ ಲಸಿಕೆ ʼಕ್ಯೂಡೆಂಗಾʼ- ಡಿಸಿಜಿಐ ನಿಂದ ಅಧಿಕೃತ ಅನುಮೋದನೆ

- Link: https://hosakannada.com/news/indias-first-dengue-vaccine-qdenga-official-approval-from-dcgi/
- Published: 2026-07-21T12:31:21+00:00
- Author: ಹೊಸಕನ್ನಡ ನ್ಯೂಸ್

ಜಪಾನ್‌ ಮೂಲದ ಪ್ರಖ್ಯಾತ ʼಟಕೆಡಾ ಬಯೋಫಾರ್ಮಾಸ್ಯುಟಿಕಲ್ಸ್ʼ ಸಂಸ್ಥೆ ಅಭಿವೃದ್ಧಿಪಡಿಸಿರುವ ‘ಕ್ಯೂಡೆಂಗಾ’
ಲಸಿಕೆಗೆ ಭಾರತೀಯ ಔಷಧ ನಿಯಂತ್ರಣ ಮಹಾನಿರ್ದೇಶನಾಲಯ ಅಧಿಕೃತ ಅನುಮೋದನೆ ನೀಡಿದೆ. ಇದರೊಂದಿಗೆ ಇದು
ದೇಶದಲ್ಲಿ ಅನುಮೋದನೆ ಪಡೆದ ಮೊದಲ ಡೆಂಗ್ಯೂ ಲಸಿಕೆಯಾಗಿದೆ.

Sponsored

4 ರಿಂದ 60 ವರ್ಷ ವಯಸ್ಸಿನವರಲ್ಲಿ ಡೆಂಗ್ಯೂ ಕಾಯಿಲೆಯನ್ನು ತಡೆಗಟ್ಟಲು ಈ ಲಸಿಕೆಗೆ ಅನುಮೋದನೆ ನೀಡಲಾಗಿದೆ.‘
ಕ್ಯೂಡೆಂಗಾ’ (QDENGA) ಎಂಬುದು ಡೆಂಗ್ಯೂ ವೈರಸ್‌ನ ನಾಲ್ಕೂ ಸೆರೋಟೈಪ್‌ಗಳ ವಿರುದ್ಧ ರಕ್ಷಣೆ ನೀಡಲು
ವಿನ್ಯಾಸಗೊಳಿಸಲಾದ ‘ಲೈವ್-ಅಟೆನ್ಯುವೇಟೆಡ್ ಟೆಟ್ರಾವಲೆಂಟ್’ ಲಸಿಕೆಯಾಗಿದೆ. ಇದನ್ನು ಮೂರು ತಿಂಗಳ
ಅಂತರದಲ್ಲಿ ಎರಡು ಡೋಸ್‌ಗಳಾಗಿ ನೀಡಲಾಗುತ್ತದೆ. ಈ ಲಸಿಕೆಯನ್ನು 4 ರಿಂದ 60 ವರ್ಷ ವಯೋಮಾನದ ಒಳಗಿನ
ವ್ಯಕ್ತಿಗಳಿಗೆ ನೀಡಲು ಸುರಕ್ಷಿತ ಎಂದು ಪ್ರಮಾಣೀಕರಿಸಲಾಗಿದೆ.
 ಡೋಸ್ ವಿವರ: ಪ್ರತಿಯೊಬ್ಬರಿಗೂ ತಲಾ
0.5 ಎಂಎಲ್ (0.5 ml) ಪ್ರಮಾಣದ ಎರಡು ಇಂಜೆಕ್ಷನ್‌ಗಳನ್ನು ನೀಡಲಾಗುತ್ತದೆ.

Advertisement

Advertisement

ಕಂಪನಿಯ ಪ್ರಕಾರ, ಈ ಲಸಿಕೆಯನ್ನು ವ್ಯಕ್ತಿಗೆ ಹಿಂದೆ ಡೆಂಗ್ಯೂ ಸೋಂಕು ತಗುಲಿದೆಯೇ ಅಥವಾ ಇಲ್ಲವೇ 
ಎಂಬುದನ್ನು ಲೆಕ್ಕಿಸದೆ ನೀಡಬಹುದು ಮತ್ತು ಲಸಿಕೆ ನೀಡುವ ಮೊದಲು ಯಾವುದೇ ಪೂರ್ವ-ಪರೀಕ್ಷೆಯ ಅಗತ್ಯವಿರುವುದಿಲ್ಲ.
ಭಾರತದಲ್ಲಿ ಡೆಂಗ್ಯೂ ಸಾರ್ವಜನಿಕ ಆರೋಗ್ಯಕ್ಕೆ ಗಂಭೀರ ಸವಾಲಾಗಿ ಮುಂದುವರಿದಿರುವ ಮತ್ತು ಕಳೆದ ಎರಡು
ದಶಕಗಳಲ್ಲಿ ಇಲ್ಲಿ ವರದಿಯಾದ ಪ್ರಕರಣಗಳ ಸಂಖ್ಯೆ ಸುಮಾರು 11 ಪಟ್ಟು ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ
ಈ ಅನುಮೋದನೆ ದೊರೆತಿದೆ. ಜಾಗತಿಕ ಮಟ್ಟದಲ್ಲಿ ಡೆಂಗ್ಯೂವಿನ ಒಟ್ಟು ಹೊರೆಯಲ್ಲಿ ಭಾರತವು ಸುಮಾರು ಮೂರನೇ
ಒಂದು ಭಾಗದಷ್ಟು ಪಾಲನ್ನು ಹೊಂದಿದೆ; ಆದಾಗ್ಯೂ, ಸೋಂಕಿನ ನೈಜ ಸಂಖ್ಯೆಯು ವರದಿಯಾದ ಪ್ರಕರಣಗಳಿಗಿಂತ
ಗಣನೀಯವಾಗಿ ಹೆಚ್ಚಿರಬಹುದು ಎಂದು ಮಾದರಿ ಅಧ್ಯಯನಗಳು ಸೂಚಿಸುತ್ತವೆ.

ಏಷ್ಯಾ, ಲ್ಯಾಟಿನ್ ಅಮೇರಿಕಾ ಮತ್ತು ಯುರೋಪ್‌ನಾದ್ಯಂತ 43 ದೇಶಗಳಲ್ಲಿ ‘ಕ್ವೆಡೆಂಗಾ’ ಲಸಿಕೆಗೆ ಅನುಮೋದನೆ
ದೊರೆತಿದ್ದು, ಸಾರ್ವಜನಿಕ ಹಾಗೂ ಖಾಸಗಿ ಲಸಿಕಾ ಕಾರ್ಯಕ್ರಮಗಳ ಮೂಲಕ 32 ದಶಲಕ್ಷಕ್ಕೂ ಹೆಚ್ಚು ಡೋಸ್‌ಗಳನ್ನು
ವಿತರಿಸಲಾಗಿದೆ ಎಂದು ಟಕೆಡಾ ತಿಳಿಸಿದೆ. ಡೆಂಗ್ಯೂ ಸೋಂಕು ವ್ಯಾಪಕವಾಗಿ ಹರಡುವ ಪ್ರದೇಶಗಳಲ್ಲಿ ಇದರ
ಬಳಕೆಗೆ ವಿಶ್ವ ಆರೋಗ್ಯ ಸಂಸ್ಥೆಯು (WHO) ಶಿಫಾರಸು ಮಾಡಿದ್ದು, ಸಂಸ್ಥೆಯ ‘ಪೂರ್ವ-ಅರ್ಹತೆ’ಯನ್ನೂಇದು
ಪಡೆದುಕೊಂಡಿದೆ. ಪ್ರಸ್ತುತ ಇದನ್ನು ಬ್ರೆಜಿಲ್‌ನ ರಾಷ್ಟ್ರೀಯ ಲಸಿಕಾ ಕಾರ್ಯಕ್ರಮದಲ್ಲಿ ಸೇರಿಸಲಾಗಿದ್ದು,
ಅರ್ಜೆಂಟೀನಾ, ಕೊಲಂಬಿಯಾ ಮತ್ತು ಇಂಡೋನೇಷ್ಯಾದಲ್ಲಿ ಸಾರ್ವಜನಿಕ ಕಾರ್ಯಕ್ರಮಗಳ ಮೂಲಕವೂ ಇದು ಲಭ್ಯವಿದೆ.

ಭಾರತದಲ್ಲಿ ಲಸಿಕೆಯ ಯೋಜನೆ ಮತ್ತು ಲಭ್ಯತೆಗೆ ಬೆಂಬಲ ನೀಡಲು ಭಾರತೀಯ ನಿಯಂತ್ರಣಾ ಪ್ರಾಧಿಕಾರಗಳು,
ಸಾರ್ವಜನಿಕ ಆರೋಗ್ಯ ವಲಯದ ಪಾಲುದಾರರು ಮತ್ತು ಆರೋಗ್ಯ ಸೇವೆ ಒದಗಿಸುವವರೊಂದಿಗೆ ಕೆಲಸ ಮಾಡುವುದಾಗಿ
ಕಂಪನಿಯು ತಿಳಿಸಿದೆ.

Advertisement