# ಕಲಬುರಗಿ : 8000 ಜನರಿರೋ ಈ ಊರಲ್ಲಿ 2000ಕ್ಕೂ ಹೆಚ್ಚು ಮಂದಿಯ ಹೆಸರು ಸಾಬಣ್ಣ, ಸಾಬಮ್ಮ!!

- Link: https://hosakannada.com/news/in-this-town-of-8000-people-more-than-2000-people-are-named-sabanna-sabamma/
- Published: 2026-08-17T13:14:25+00:00
- Author: ಹೊಸಕನ್ನಡ ನ್ಯೂಸ್

ಒಂದು ಊರಿನಲ್ಲಿ ಒಂದೇ ಪ್ರೀತಿಯ ಹೆಸರನ್ನು ಇಟ್ಟುಕೊಂಡಿರುವ ಕೆಲವೇ ಕೆಲವು ಬೆರಳೆಣಿಕೆಯ ಮಂದಿ ಸಿಗಬಹುದು.
ಅದು ಬೇಕಂತಲೇ ಎಂದು ಇಡುವುದಲ್ಲ. ಒಬ್ಬರಿಗೊಬ್ಬರು ಪರಿಚಯವಿಲ್ಲದೆ ಸಂಪರ್ಕವಿಲ್ಲದೆ ಆಕಸ್ಮಿಕವಾಗಿ
ನಾಮಕರಣ ಮಾಡುವ ಸಂದರ್ಭಗಳು. ಆದರೆ ಕರ್ನಾಟಕದ ಇದೊಂದು ಊರಿಗೆ ಹೋದರೆ ನೀವು ಬರೋಬ್ಬರಿ ಎರಡು ಸಾವಿರ
ಜನರು ಒಂದೇ ರೀತಿ ಹೆಸರನ್ನು ಇಟ್ಟುಕೊಂಡಿರುವುದನ್ನು ಕಾಣಬಹುದು.

Sponsored

ಹೌದು, ಕಲಬುರಗಿ ಜಿಲ್ಲೆಯ ಚಿತ್ತಾಪುರ ತಾಲೂಕಿನ ಲಾಡ್ಲಾಪುರ ಗ್ರಾಮದಲ್ಲಿ ಸುಮಾರು ಎಂಟು ಸಾವಿರ ಮಂದಿ
ವಾಸವಿದ್ದಾರೆ. ಇವರ ಪೈಕಿ ಬರೋಬ್ಬರಿ ಎರಡು ಸಾವಿರ ಮಂದಿಯ ಹೆಸರು ‘ಸಾಬಣ್ಣ’ ಮತ್ತು ‘ಸಾಬಣ್ಣ’ ಎಂದು.
ಇಡೀ ಗ್ರಾಮವೇ ಈ ಅಪರೂಪದ ಪರಂಪರೆಯನ್ನು ಹೆಮ್ಮೆಯಿಂದ ಅಪ್ಪಿಕೊಂಡಿದೆ. ಒಂದು ವೇಳೆ ಈ ಊರಿಗೆ ಕಾಲಿಟ್ಟರೆ
ನೀವು ಹೆಸರು ಹೇಳಿ ತಮಗೆ ಬೇಕಾದ ವ್ಯಕ್ತಿಯನ್ನು ಹುಡುಕಲು ಸಾಧ್ಯವಿಲ್ಲ. ಅವರ ಮುಖದ ಗುರುತನ್ನು ಹಿಡಿದೆ
ನೀವು ಅವರ ಮನೆ ಎಲ್ಲೆಂದು ಕೇಳಬೇಕು. 

Advertisement

Advertisement

ಇಲ್ಲಿನ ಪ್ರತಿಯೊಂದು ಮನೆಯಲ್ಲೂ ಸಣ್ಣ ಸಾಬಣ್ಣ, ದೊಡ್ಡ ಸಾಬಣ್ಣ, ಸಣ್ಣ ಸಾಬಮ್ಮ, ದೊಡ್ಡ ಸಾಬಮ್ಮ 
ಒಂದೇ ಸೂರಿನಲ್ಲಿ ಸಿಗುತ್ತಾರೆ. ಅಜ್ಜ-ಅಜ್ಜಿಯಿಂದ ಹಿಡಿದು ಮಕ್ಕಳು ಮತ್ತು ಮೊಮ್ಮಕ್ಕಳವರೆಗೆ ಎಲ್ಲರ
ಹೆಸರೂ ಒಂದೇ. ಊರಿನಲ್ಲಿ ಈ ಹೆಸರು ಹಿಡಿದು ಕೂಗಿದರೆ ಕನಿಷ್ಟ ಹತ್ತು ಜನ ತಿರುಗಿ ನೋಡುವ ಕಾರಣಕ್ಕೆ
ಮನೆತನದ ಅಡ್ಡ ಹೆಸರು ಅಥವಾ ಸಣ್ಣ-ದೊಡ್ಡ ಎಂದು ಸೇರಿಸಿ ಕರೆಯಲಾಗುತ್ತದೆ. ಹೊಸ ತಲೆಮಾರಿನ ಯುವ ದಂಪತಿ
ಕೂಡ ಅಪ್ಪ-ಅಮ್ಮ, ಅಜ್ಜ-ಅಜ್ಜಿ ಹೆಸರು ಅಳಿಯಬಾರದು ಎಂಬ ಕಾರಣಕ್ಕೆ ತಮ್ಮ ಮಕ್ಕಳಿಗೆ ಸಾಬಣ್ಣ, ಸಾಬಮ್ಮ
ಎಂದೇ ಹೆಸರಿಡುತ್ತಿದ್ದು, ಕಳೆದ ಮೂರ್ನಾಲ್ಕು ತಲೆಮಾರಿನಿಂದ ಈ ಸಂಪ್ರದಾಯ ಜೀವಂತವಾಗಿದೆ. ಅಷ್ಟೇ 
ಅಲ್ಲದೆ ಕೇವಲ ಒಂದು ಜಾತಿಗೆ ಮಾತ್ರ ಈ ಹೆಸರು ಸೀಮಿತವಾಗಿಲ್ಲ ಊರಲ್ಲಿ ಇರುವ ಬೇರೆ ಬೇರೆಯ ಜಾತಿಯವರೆಲ್ಲರೂ
ಕೂಡ ಇದೇ ಹೆಸರನ್ನು ಇಟ್ಟುಕೊಳ್ಳುತ್ತಾರೆ.

ಈ ಹೆಸರಿಡಲು ಕಾರಣ ಏನು?

ಗ್ರಾಮದ ಕೊನೆಯಲ್ಲಿರುವ ಎತ್ತರದ ಬಳಪದ ಗುಡ್ಡದ ಮೇಲೆ ಹಾಜಿ ಸರ್ವರ್‌ದರ್ಗಾ ಇದೆ. ಇದನ್ನು ಹಿಂದೂಗಳು
ಭಕ್ತಿಯಿಂದ ಹಾದಿಶರಣ ಎಂದು ಕರೆಯುತ್ತಾರೆ. ಪ್ರತಿವರ್ಷ ಬೇಸಗೆಯ ದವನದ ಹುಣ್ಣಿಮೆ ನಂತರದ ಗುರುವಾರ
ಇಲ್ಲಿ ನಡೆಯುವ ಭವ್ಯ ಜಾತ್ರೆಗೆ ಸಾವಿರಾರು ಭಕ್ತರು ಆಗಮಿಸುತ್ತಾರೆ. ಹಲವು ವರ್ಷಗಳ ಹಿಂದೆ ಸೂಫಿ 
ಸಂತ ಹಾಜಿ ಸಾಹೇಬರು ಲೋಕ ಸಂಚಾರ ಮಾಡುತ್ತಾ ಈ ಗುಡ್ಡದ ಬಳಿ ಬಂದಾಗ, ಅಲ್ಲಿಗೆ ಬಂದ ಹಿಂದೂ ಮತ್ತು 
ಮುಸ್ಲಿಂ ಯುವಕರಲ್ಲಿ ಒಬ್ಬರಲ್ಲಿ ನೀರು, ಇನ್ನೊಬ್ಬರಲ್ಲಿ ಹಾಲು ಕೇಳಿ ಕುಡಿದು, ಇಬ್ಬರಿಗೂ ಆಶೀರ್ವದಿಸಿ
ಗುಡ್ಡದ ಮರೆಯಲ್ಲಿ ಕಣ್ಮರೆಯಾದರೆಂಬ ಪ್ರತೀತಿ ಇದೆ. ಅಂದಿನಿಂದ ಆ ಸಂತರ ನೆನಪಿನಲ್ಲಿ, ಭಕ್ತಿಯ ಸಂಕೇತವಾಗಿ
ಊರಿನವರೆಲ್ಲ ತಮ್ಮ ಮಕ್ಕಳಿಗೆ ಸಾಬಣ್ಣ-ಸಾಬಮ್ಮ ಎಂದು ಹೆಸರಿಡುವ ಸಂಪ್ರದಾಯ ಬೆಳೆದು ಬಂದಿದೆಯಂತೆ.

ಇನ್ನೂ ಆಧಾರ್‌ಕಾರ್ಡ್‌, ಶಾಲಾ ದಾಖಲಾತಿ ಹಾಗೂ ಅಂಚೆ ವಿಳಾಸ ಬರೆಯುವಾಗ ತಂದೆಯ ಹೆಸರು, ಮನೆ ನಂಬರ್‌ಮತ್ತು
ಹುಟ್ಟಿದ ದಿನಾಂಕಗಳನ್ನು ಕಡ್ಡಾಯವಾಗಿ ವಿವರವಾಗಿ ಬರೆಯಬೇಕಾಗುತ್ತದೆ. ಆಗ ಈ ಸಮಸ್ಯೆ ತಲೆದೋರುವುದಿಲ್ಲವೇ
ಈಗೇನು ಮಾಡುತ್ತೀರಿ ಎಂದು ನೀವು ಪ್ರಶ್ನೆ ಕೇಳಬಹುದು.  ಆಡಳಿತಾತ್ಮಕವಾಗಿ ಇದು ಕೆಲವೊಮ್ಮೆ ಸವಾಲೆನಿಸಿದರೂ,
ಊರಿನ ಜನರಿಗೆ ಮಾತ್ರ ಇದು ಕಿರಿಕಿರಿಯಲ್ಲ, ಬದಲಾಗಿ ತಮ್ಮ ಊರಿನ ನಿಜವಾದ ಗುರುತು ಎಂದು ಇಲ್ಲಿನ ಜನ
ಹಿರಿಹಿರಿ ಹಿಗ್ಗುತ್ತಾರೆ

Advertisement